Giuanna Caviezel

Romanisches Seminar
Plattenstrasse 54
CH - 8032 Zürich

Büro PLK E 4

giuanna.caviezel@uzh.ch

L’Europeada è il campiunadi europeic da ballape da las minoritads naziunalas autoctonas. L’idea per quest turnier è naschì l’onn 2008 en il chantun Grischun sin basa d’ina concurren-za d’ideas da Svizra Turissem. La proposta da la Surselva d’organisar in eveniment da ballape che reunescha minoritads linguisticas da tut l’Europa e che preschenta la Surselva sco regiun culturalmain multifara, averta ed innovativa ha persvadì la giuria.
La finamira da mes project da doctorat è d’eruir pertge che minoritads (linguisticas) s’inscuntran, sa barattan e sa mesiran en il rom d’in grond eveniment sportiv. I vegnan examinads ils interess dals acturs involvids sco er la valur simbolica, economica e politica d’ina tala occurrenza. En il center da quest studi stat la rolla da la cuminanza rumantscha per il svilup dal campiunadi sco er l’experientscha dal:as participant:as rumantsch:as, tant a l’intern da l’atgna equipa sco er a chaschun dal barat cun autras minoritads. Plinavant vegn intercurida la rolla da la lingua entaifer la squadra rumantscha ed en las interacziuns tranter differentas cuminanzas linguisticas. I vegnan perscrutads process d’inclusiun, d’exclusiun e d’ierarchisaziun tant entaifer las singulas equipas sco er en il context da l’occurrenza sco tala. Ultra da quai vegnan considerads ils criteris che determineschan questas dinamicas, las ideologias ch’èn colliadas cun quellas sco er lur implicaziuns.

Jau hai absolvì in bachelor en communicaziun plurilingua a l’Universitad da Genevra cun dus semesters a l’exteriur a l’Universitad da Manchester ed a l’Universitad d’Aix-Marseille. En mes master hai jau studegià sociolinguistica al Center for the Study of Langauge and Society a l’Universitad da Berna. Ultra da quai hai jau lavurà sco assisstenta scientifica a l’Universitad da Trondheim ed a l’Universitad da Tromsø e sco docenta envidada a l’Universitad da Turitg. 
Mes interess da perscrutaziun includan la commodificaziun da lingua e cultura, l’economia politica da linguas, ideologias linguisticas e debattas linguistic-ideologicas, politica linguis-tica, cuntradas linguisticas e semioticas en contexts minorisads, linguas cun paucas resursas, translaziun automatica ed intelligenza artifiziala. 
Fin qua hai jau purschì ils suandants seminaris: Sociolinguistica dal rumantsch: teoria e pratica / Tenutas linguisticas e lur relevanza en contexts minorisads / Linugas minorisadas, translaziun automatica ed intelligenza artifiziala: sfidas e perspectivas. Mes proxims semi-naris vegnan ad esser deditgads a las suandantas tematicas: Purissem linguistic en contexts minoritars: autenticitad linguistica, politica da preservaziun e discurs ideologics / Pro-tecziun instituziunala e dretgs da minoritads / Da l'exclusiun a la reuniun: Scuntradas da minoritads sco lieus da barat.