Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe156

1337, 25 juin.

Type de document: charte: constitution de douaire

Objet: Constitution de douaire à titre viager par Richart de Morimont, chevalier, à Catherine,sa femme, par l’intermédiaire de Richart dit Vaydrel, chevalier, son frère et son avouédésigné par Jean dit Savaiget, écuyer, bailli de Porrentruy (voir n° 65 et n° 107),douaire consistant en tout ce qu’il a racheté de Jeanne, sa fille, femme de Bartol ditle Grave, d’Annegrahe, chevalier pour 50 l. de bâlois sur les territoires de Damphreuxet de Vendlincourt (voir n° 155). — Acte établi au nom de Richart de Morimont,chevalier, et passé sous son sceau et sous celui de Jean dit Savaiget, écuyer, bailli dePorrentruy.

Commentaire: Parchemin scellé de deux sceaux sur double queue; il subsiste celui de Richart deMorimont. AAEB, Chartes. — Analyse par J. Trouillat, Monuments…, III,p. 777-778.

1 Je, Rechairs de Morimont, chevaliers, 2 fais savoir a touz 3 que je ai douhei et douhois, baillie et delivrey en nom de douhaire, pour moi \2 et pour mes hoirs, may tres bien amey feme, dame Katherine, a say vie tant soulemant, par lai main de monssi Rechairt \3 dit Vendrey, de Porreintru, chevalier, frere et lehal vouhey de lai dite dame Katherine doney a lei par Jehan dit Savayget, bailli de \4 Pourreintruy, escuier, pour ce et pour autres choses sesant en justise uverte et par lehal jugemant, c-est a savoir de lai terre et herie\5taige entierement, senz riens excepter, de franc aluef, que siet en lai vile, finaige et terretoire de Danfruhel et de Vandelincourt, \6 en champs, prez, curtils, censes, rentes et en toutes autres choses, quels qu-elles soient, que dame Jehanne, may fille, feme monssi Bar\7thol le Grave, d-Annegrahe, chevalier, m-ay vendu pour le pries de cinquante libres de bons balois, bone monoie corsable ou merchief de Porrein \8truy, qu-elle ai hahu de moi, enssi cum il est plus efficamant contenuz en unes lettres suis ce faites, saellees des seals dou dit monssi Bartol \9 et de monssi Rechairt Vendrey, chevaliers, que je en ay de lai dite dame Jehanne, mai fille, que demorent en lour force et en lour valour. 4 Et me suis \10 devestuz et me devest, pour moy et pour mes hoirs, dou dit douhaire et de toutes les choses dessus dites en la maniere qu-elles sunt dessus \11 specefiez, et lay dessus dite dame Katherine, may feme, par lai main dou dit monssi Rechairt Vendrey, son vouhey, en ai envesti et \12 envest, mis et mat en [bone] [et] ^[1] [] lehal tenure et en corporal possession, ou aussi par lai tradictiom de ces lettres, ai say vie tant soulemant. 5 \13 Et cest douhaire et toutes les choses dessus dites, et une chascunne d-icelles en la maniere qu-elles sunt dessus devisees, ai je promis et promat, \14 par mon soiremant doney corporalmant por moy et por mes hoirs, sollempnel stipulaciom entrevenant, et aprés suis l-obligatiom de \15 touz mes biens moubles et non moubles, presenz et a-venir, tenir et garder fermemant a lai dite dame Katherine, may feme, a say vie tant \16 soulemant, par lay main dou dit monssi Rechairt Vendrey, son frere et son vouhey, garantir et apaisier come de propre et franc \17 aluef, a say vie tant soulemant, en touz lues, en jugemanz et deffuers, contre touz, senz venir encontre ^[2] par moi ne par autruy, \18 et senz consentir que nuls autres y veingne en appert ou en rescondut. 6 En renuncent en cest mien fait, par mon dit soiremant, \19 a toutes exceptions de mal, de baret, de lesiom, de deceptiom, a condictiom senz cause ou moyns suffisant, a lai copie de ces lettres et que autre \20 chose soit escripte et autre chose acourdee, a touz privileiges de croisiez, a touz privileiges et a touz droiz introduz et a introdure en fa\21vour de nobles, donez et a-doner, faiz et a-faire de papes, de emperours ou d-autrui, a toutes ingratuités, a toutes franchises et \22 libertés, et a toutes autres exceptions et allegations de fait ou de droit, et expecialmant a droit disant que generals renunci\23ations ne vaut. 7 En tesmoignayge de lay quel chose, je ay mis mon seal pendant en ces presentes lettres avecques le seal dou \24 dit Jehan Savaiget, bailly de Porreintru. Et nos, Rechairs de Morimont et Rechairs diz Vendrez, de Porreintru, chevaliers, par \25 tant cum il m-affiert come vouhey de lai dite dame Katherine, may suer, avons prié et requis a dit Jehan Savayget, \26 bailli de Porreintruy, qu-il mate son seal pendant en ces lettres avecques le seal de moy, Rechairt de Morimont, chevalier dessus \27 nomey; et je, Jehans diz Savaygez, bailliz de Porreintru, escuiers dessus diz, par devant cu li diz douhaires et les dites choses \28 sunt estey faites, par tant cum raysons, droiz et jugemanz l-ay raportei, pour ce et pour plusours autres choses, sesant en justise \29 uverte et par lehal jugemant, es prieres et requestes des dessus nomez monssi Rechairt de Morimont et monssi Rechairt Vendrey, \30 de Porreintruy, chevaliers, par tant cum il li puet et doit aferir comme vouhey de lai dite dame Katherine, ai mis mon \31 seal pendant avecques le dit seal dou dit monssi Rechairt de Morimont en ces presentes lettres, 8 que furent faites et \32 donees le vint et cinciesme jour dou moys de joym, l-an Nostre Seignour corrant par mil trois-cenz trente et sept.

Notes de transcription
^[1] Texte effacé.
^[2] Ainsi coupé: en contre.