Accueil>Les corpus textuels>Charte chNCh163

Accueil

Descriptif du projet

Les corpus textuels

Interrogations linguistiques
[vers une autre interface]

Contact

 

Choix d'édition

édition critique
édition interprétative
édition diplomatique

Montrer la structure rhétorique

non
oui

   

Téléchargement du document

fichier xml fichier pdf

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh163

1344, 15 juillet.

Type de document: charte: accord

Objet: Accord entre Louis de Neuchâtel et François de la Sarraz, son neveu, par lequel, Louis lui octroye un fief-lige par la donation de terres; il lui permet d’y construire des forteresses et des bâtiments et lui offre son aide financière pour la construction de ceux-ci. En échange, François entre en son hommage, à l’exception des hommages qu’il a déjà envers d’autres seigneurs.

Auteur: Louis de Neuchâtel et François de la Sarraz.

Disposant: Louis de Neuchâtel.

Sceau: sceaux de Louis de Neuchâtel et François de la Sarraz.

Bénéficiaire: François de la Sarraz.

Autres Acteurs: Jean Aigremont, Philippe de Vuillecin, Jean de Chauvirey, Jean Pitet, Perronet de Begnins, Guillaume, maire de Romainmôtier, Hyo de Soleure et Perrod de Bavois, témoins.

Support: Parchemin jadis scellé de deux sceaux sur double queue; il subsiste celui de Louis de Neuchâtel.

Lieu de conservation: AEN, E4 n° 21.

Édition antérieure: Publication par G.-A. Matile, Monuments…, n° CCCCLXXV, p. 554-558.

Verso: Lettres de ce que le signour de la Serree tient de fié de monsignour de Nuefchestel. – .IIII. sol. (XIVe siècle).

 1 Sachent tuyt cilx qui verront et orront ces presentes lectres 2 que nous, Loys, cuens et sires de Nuefchestel, et je, Françoix, sires de la Serree, 3 havons \2 fait, concordey, heuny, façons, concordons et heunions li un enver l-autre les pac et les covenances cy aprés escriptes et devisees. 4 Premieremant, \3 nous, li diz Loys, non contrain, non decehu, maix de nostre mere science et franche volunté, regardant l-onour et le prouffiz de nous et de noz hoirs, havons doney, outroyé, \4 baillié et delivrey, donons, outroyons, baillions et delivrons per mantenant ou auxi pour nous et noz hoirs et ces qui cause ont ou auront de nous, perpetuelmant, en fyé \5 liege a nostrez bien amey nevouz Françoix, seignour de la Serree, dessus diz, et a ses hoirs, c-est a-savoir toutes les chouses que nous, li diz Loys, ou nostre hoirs, pouhons et devons \6 avoir, et qui a nous, ou nous hoirs, porroent et devroent appertenir, per quelque cause ou titre que ce fut, ou temps a-venir per nom ou per cause des dites chouses em touz les \7 luef deam les limitations cy aprés declairies et devisees, c-est a-savoir: 5 doix la piere croysie desoubz Wichimont et dessus le chemin cherrauz qui vient de Cuarnens per desoubz \8 Wichimont, pres dou ruissel de la Morva, dever bisez, en tendant et alent per dessus touz les chimins et per les pieres croysies sus le poix ou sus le mont de la Ruery, et doix les \9 pieres croysies qui sont sus le poix ou sus le mont de la Ruery, tendent es pieres aut cornet douz boix, jadis monsignour Pierre de Muerie, chevalier, en travercent touz les chimins qui montent \10 es boix, et doix les pieres croysiees desoubz le cornet dou diz boix, tendent per desoubz le diz boix a la boyne des despendent de Put Bosson de noz boix, et doix la dite boyne de Put Bosson \11 tendent a la piere croysie dessus le gibet de Muerye, et doix la dite piere croysie dessus le diz gibet, tendent per les boynes et pieres croysies au chemin qui tent et vay dou lonc per desoubz \12 noz boix et per desoub le poix de Montoust ver Romainmostier en jusque a la piere en Eschilie entre noz boix et le boix de Romainmostier, et doix la piere croysie d-Eschillie, tendent per desoubz les \13 boix de Romainmostier au Groin de l-Aigle, ensi come les dites boynes le devisent, enver la Serree. 6 Et demorent tuyt li chemins tendent dou lonc de noz diz boix per de desoubz sus et deam les \14 dites limitations au diz soignour de la Serree et a ses hoirs. 7 Premierement, havons doney au diz soignour de la Serree, si come diz est, touz ce que nous havons ou qui a nous ou noz hoirs porroit \15 appertenir et avenir en toutes les villes, finages et territoires de Muerie, de Ferrere, de Ponpaplo, d-Ornisel, de Mormont et generalment toutes les chouses a nous, le diz Loys ou a \16 noz hoirs ou ces qui cause ont ou auront de nous appartenant ou devoir appartenir en toute la chastellenie de la Serree, en tant come se elle estent en lonc et en large, hensi come les dites \17 limitations le devisent, deix noz boix dessus Muerie et dessus Ferree [1] enver la Serree et outre, en la dite chestellenie de la Serree, c-est a-savoir: 8 en fié, en rerefié, et premierement le fyé des hoirs \18 Girard de Ferrees, le fyé Rolet de Muerie, le fyé des hoirs Girard a la Corniola, de Conay, le fyé Perroz, fil Girard Grasset, le fyé Wuillemez Peytel, le fyé Wuillemez de Dailliens, en quelque \19 luef qui le teigne ou dege tenir de nous, le fyé Guillemez de Romainmostier, pour les chouses qui tient de nouz deam les dites limitations, le fyé Vouchi, d-Ornye, et touz autres \20 fyé qui a nous et a noz hoirs pouhent ou doyvent appertenir en toute la dite chestellenie de la Serree, deam les dites limitations aprés, en terres cultivees et non cultivees, en \21 maix, en homes, en boix, en prelx, en champs, en pasquiers, en maisons, en chesaulx, en vignes, en vergiers, en cultis, en rentes, en censes, en tailles, en prises, en aytaires, \22 en gaites, en eschargaites, en dyemes, en terrages, en fours, en mulins, en aygues, en descours d-aigues, en ram, en bam, en chapons, en geniles, en eschoytes, en corvees, \23 en demeynes et en touz servituz de biens et de persones, en seignorie aute et basse, en mere, mixte impire, en toute jurisdition et en toutes autres chouses queles elles soyent et per quelque \24 nom l-om les puisse ou dege nommer ou clamer, noix se les dites chouses estoent de cel condition et nature que per generalité ne dehussent passer maix dehussent de necessité de \25 droit estre specifiés en ces lettres, ensemble les droy, les fonz, la proprieté, la possession, les fruit et les pertinences, appendises et recognossances des diz fyé et de toutes les chouses dessus \26 dictes et chescune per soy et des despendent. 9 Et ay repris li diz sires de la Serree de nous en accressance dou diz fié toutes les chouses qui ay pehut et doit avoir et tenir, en \27 quelque menere que ce soit, en toutes les villes, finages et territoires de Muerie, de Ferreres et de Ponpaplo. 10 Et volons et outroyons nous, li diz Loys, pour nous et noz hoirs et ces qui cause \28 ont ou auront de nous ou du noz hoirs, que li diz sires de la Serree puissent faire construire fortereces et fermeté de chestelx, bours ou villes, un ou plusours, sus et deam les chouses \29 dessus dites, tam sus les chouses que nous li avons donees come sus celles qui ay repris de nous, les diz chestelx, bours ou villes, touz jours movant et manant de nostrez fiez. 11 \30 Et toutes les fois que li diz sires de la Serree ou suy hoirs y voudroent fermer ou fermeroent, ediffier et bastir ou construire chestelx, bours ou villes, un ou plusours, nous, li \31 diz Loys, pour nous et noz hoirs, lour promectons de aydier a fermer, bastir ou construire a grant force et a petite, a noz propres missions et despens, toutes et tantes fois que \32 nous en seriens requis et encontre touz. 12 Et le diz fié des dites chouses doit faire et segre cil qui sera sires succesivemant de la Serree, et non autre, en la main de celluy \33 qui sera sires succesivemant de Nuefchestel, et non a autre. 13 Et est acordé entre nous, le diz Loys, pour nous et noz hoirs, et le dit Françoix et ses hoirs, que li diz Françoix, suy hoirs \34 et lours genz hauront et tiendront doix ores en avant lours marches et lour custumes avoiz nous, noz hoirs et noz genz per la forme et menere que il les avoent devant \35 la confection de ces lettres, saul la cognossance et le resort de nostre dit fyé. 14 Et de toutes ces chouses dessus dictes et chescune per soy, le diz Françoix, sires de la Serree, pour nous et \36 noz hoirs, havons mis et mectons en pure, paisible et corporel possession per la tradition de ces presenz lettres per nostre corage en luy, Françoix et ses hoirs, possession wide et toute seignorie, \37 transportant de tout en tout doys ores en avant, neam de droy, de action, de usage, de seignorie, de proprieté, de possession, de mere, mixte empire ou d-autre quelconque reclamation ou \38 auxi retenant a nous, a noz hoirs ou ces qui cause ont ou auront de nous, en toutes les chouses dessus dictes ou chescune per soy, excepté nostre fyé, la recognossance, le resort de nostrez \39 diz fyé, hensi come dit est. 15 Et promectons nous, li diz Loys, pour nous et noz hoirs et ces qui cause ont ou auront de nous, per nostre soirement doney sus saintes evvangieles de Diux \40 corporelmant et sus l-obligation de touz noz biens, quel qui soyent, toutes les chouses dessus dictes et chescune per soy ensemble le diz fié au diz seignour de la Serree mantenir, guerentir \41 deffendre et appaisier encontre touz, en toutes cours d-igliese et seculaire, en touz luef, en jugement et deffuers, a noz propres travalx et despens, toutes fois que besoing seroit et \42 que nous ou nostrez hoirs en seriens requis per le diz seignour de la Serree ou ses hoirs et au diz seignour de la Serree ou a ses hoirs rendre, restituir touz domages, missions \43 et desperdes que li di[t] sires de la Serree ou suy hoirs auroent fait, sustenu ou encorruz per raison de la dite guerence a lours non portee, hensi come dessus est dit; sus les quelx \44 domages, missions et desperdes, nous, li diz Loys, pour nous et nous hoirs, es diz seignours de la Serree croire volons per lour simple soirement, sain autre provez, sain autre declaration \45 ou mostre, sain taxation de juge, sain strepite et figure de jugemant. 16 Et je, li diz Francoix, sires de la Serree, non decehu, non baraté, maix sachent et bien avisé, ay repris, \46 pour moy et mes diz hoirs, dou diz monseignour Loys, pour luy et ses hoirs, en accressance dou diz fyé que m-a doney, toutes les chouses que je tiens, puis et doy tenir en toutes \47 les villes, finages et territoires de Muerie, de Ferrees et de Ponpaplo, quelconques elles soyent et per quelque nom l-on les puisse ou dege nommer ou clamer. 17 Et des dites \48 chouses, toutes et chescune per soy, emsemble le fyé et les chouses qu-i m-a donees et a mes hoirs en fyé liege, pour luy et ses hoirs, je, li diz Françoix, pour moy et mes hoirs, \49 suis entrey en la foy et en l-omage liege de mon diz seignour de Nufchestel, pour luy et ses diz hoirs, c-est a-savoir per tochier ses mains et per baisier sa boche en re\50cognossance douz fié des chouses dessus dites, saul la feaulté de monseignour, monseignour Loys de Savoe, seignour de Vuaud, monseignour Humbert Alamant, seignour d-Aubona, \51 monseignour Jeham de Chalon, seignour d-Arlay, monseignour Jeham de Chalon, conte d-Aucerre, seignour de Rochefort, monseignour Guillames d-Antignye, seignour de Sainte-Croy, \52 monseignour le conte de Savoe, 18 per tel condition que, si appartenoit que li emfam ou li hoirs dou diz Françoix, seignours de la Serree, partissent ou dividissent aprés le decest douz diz Françoix, seignour \53 de la Serree, et cil qui seroit sires de la Serree estoit sires de Viveix, ou droy et ou partaige de monseignour Girard d-Orons, jadis chevalier, ensemble seignour de Viveix, que, en ce caux, la dite retention \54 et exception de l-omage dou diz conte de Savoe soit et demoroit en sa force et en sa vertu perpetualmant a valoir; et si appartenoit que cil qui seroit sires de la Serree, des emfam \55 ou des hoirs dou diz Françoix, seignour de la Serree, et il non estoit sires de Viveix, ou partaige que dessus, que la dite retention et exception fut et soit nulle, irrité et de nulle valour \56 per pac et covenances expresses faites entre nous, Loys et Françoix dessusdiz, pour nous et noz diz hoirs, perpetualmant a valoir sain nulx autres contredit, sauves et gardees toutes les \57 condictions dessus dites. 19 Et promectons nous, Loys et Françoix dessus diz, pour nous et noz diz hoirs, toutes les chouses dessus dites et chescune per soy le un enver l-autre tenir et attandre \58 sain venir encontre, et ce per noz soiremant doney sus saintes evvangelies de Diux corporelmant tochies et sus l-obligation de noz biens quelx qui soyent. 20 Et je, li diz Françoix, promet, come dessus, \59 pour moy et mes diz hoirs, seignours de la Serree, de servir au diz monseignour de Nuefchestel et a ses diz hoirs seignours de Nuefchestel per la forme et menere que feaul est entenu de deservir \60 ver son seignour, et faire et prester au diz monseignour de Nuefchestel et es siens, come dessus, tout ce qui est contenu en la vielle et novale forme de feaultey. 21 Et nous, li diz Loys, promectons \61 auxi, pour nous et noz diz hoirs seignours de Nuefchestel, come dessus, de ester enver le diz seignour de la Serree et ses diz hoirs seignour de la Serree, come bons sires doit ester en\62ver son vassaul, et faire et prester au diz Françoix, seignour de la Serree, et a ses diz hoirs, seignours de la Serree, touz ce qui est contenu en la vielle et novale forme de feaultey, sauves \63 et gardees a l-une partie et a l-autre toutes les condictions dessus escriptes. 22 Et toutes les chouses dessus dites et chescune per soy, nous, Loys et Françoix dessus diz, confessons estre verayes \64 et de noz voluntey estre faites, et promectons un chescum de nous, pour nous et noz diz hoirs, en tant come il li toche, toutes et chescune per soy tenir et attandre sain jamaix \65 venir encontre per nous ou per autre ou temps a-venir. 23 Et renunczons en ce fait nous, Loys et Françoix dessus diz, un chescum de nous, en tam come il li pehut tochier et appartenir, a toutes \66 exceptions de mal, de barat, de paour, de lesion, de circonvention, de deception, a action en fait, a condiction sain cause, au benefice de restitution en entier per clause general, a la donation \67 faite pour le vice d-ingratitude, a la donation soremontent cinq cenz deniers d-or sain insinuation non valoir, a la chouse autremant escripte que devisee, a touz droy canon et civil, \68 a toutes custumes de luef et de païs, au droy la general renunciation reprovant, a toutes autres allegations et deffenses de droit et de fait per les quelx li tenour de ces lettres porroit \69 en tout ou en partie estre empeigie ou annullee ou avoir moins de perpetuel fermeté, esquelx nous renunçons expressemant un chescum de nous en tant come li porroit tochier \70 et appartenir. 24 Cestes chouses sont heues faites deam le chestel de Chanvent, devant l-uys de la grant sale, en la presence de monseignour Jehan Aigremont, chevalier, Phelippe de Vilesen, Jehan \71 de Chaviré, Jehan Pitet, a ce temps chastellain de Chanvent, Perronet de Bignin, Guillame, maour de Romainmostier, Hyo de Saloro, Perro de Baioes, donzelx, et de plusours autres gentiz \72 homes et tesmoins dignes de foy a ce appellé et requis. 25 En tesmoignage de laquel chouse nous, Loys et Françoix dessus diz, havons mis nostres seaulx pendanz en ces lectres, les\73quelx sont doubles de noz consentemant, et avons ces presenz lettres nous, Loys dessus diz, pour nous et noz diz hoirs seignours de Nufchestel, et li diz Françoix, sires de la Serree, ay les \74 autres, pour luy et ses diz hoirs seignours de la Serree. 26 Doney le quinzeme jour dou mois de juilliet, en l-am de grace corant mil trois cenz quarante quatre.
Notes de transcription
[1] Le scribe a généralement écrit Ferreeou Ferrees, mais il a souvent corrigé en Ferrereou Ferreres, avec ou sans abréviation.