Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh144

1326, décembre.

Type de document: charte: paix

Objet: Paix entre Henri de Montfaucon-Montbéliard et les habitants du Val de Morteau faisant suite à leurs querelles. Les conventions de la paix stipulent que les habitants du Val de Morteau, leurs héritiers et tous leurs biens sont désormais sous la sauvegarde de Henri. Ce dernier prend possession de tous les prés et pâturages du Val, à l’exception de ce qui appartient à l’église de Morteau, à Agnès de Durnes et Jeanne de Montfaucon. En compensation, les habitants doivent verser à Henri 120 livres de rente annuelle à payer à la saint Martin d’hiver, à la condition que Henri les réclame. Ils doivent également le suivre en guerre. Henri promet de les maintenir en sécurité et ordonne à tous ses hommes de leur apporter leur aide.

Auteur: Official de la cour de Besançon.

Sceau: sceaux de la cour de Besançon et de Henri de Montfaucon-Montbéliard.

Bénéficiaire: Henri de Montfaucon-Montbéliard et les habitants du Val de Morteau.

Autres Acteurs: Henriet de Villers, Perrin d'Orsans, Richard de Crosey et Vyl, d'Orchamps, témoins.

Rédacteur: Thomas Cochy.

Support: Parchemin scellé de deux sceaux pendant sur lacs de lin rouge et blanc, et revêtu du seing-manuel du notaire impérial Thomas Cochy.

Lieu de conservation: AEN, J1 n° 23.

Verso: Lettre coment cilz de Mortaul sunt en la guerde dou seignour de Montfalcon pour .VI.^xx lb. (XIV^e siècle).

1 Nos, officiauls de la court de Besençon, 2 façons savoir a touz ces qui verront et hourront ces presentes lettres 3 que, come descours, plaiz, controversie et questions fuit et esperet estre entre noble damisel et puissant Henry de Montbeliart, \2 signour de Montfaucon, d-une part, et les homes habitanz et demoranz en tout le Vaul de Morteaul, en la dyocise de Besençon, d-autre part, sus ce que li diz Henrys demandet es diz homes, disoit et affermet que li diz homes havoient pris et \3 fait panrre les homes dou-dit Henry et mis et fait mettre en fers et en fuz; 4 item, botey feu et fait boter, et abatui et fait abattre plusours maisons que estoient a dit Henry et a ses homes; 5 item, abatui bois, pris et art, que estoit a-dit Henry; 6 \4 item, et sus ce, que li diz Henrys disoit et affermet que li-diz home dou dit Vaul de Morteaul havoient sayé et fait sayer praez que estoient a dit Henry et a ses homes, et meney et fait mener le foyn et l-erbe d-ycels praez contre la velontey dou-dit Henry; 7 \5 item, et sus ce, que li-diz Henrys disoit et affermet que li-diz homes dou Vaul de Morteaul estoient entrez en la terre et en le heritaige dou-dit Henry outre say velontey, et meney et fait mener lour betes pour paturier en la terre et en le heritaige \6 dou dit Henry, les-quels chouses estoient ou vitupere, ou prejudice, ou domaige et ou desseryetement dou-dit Henry; 8 item, et sus ce, que li-diz Henrys disoit et affermet que li diz homes dou Vaul de Morteaul avoient fait et fait faire plusours autres \7 injures, violences et outraiges a dit Henry et a ses genz; 9 item, et sus ce, que li-diz Henrys demandet es diz homes dou-dit Vaul de Morteaul plusours petitions, quereles et accions reauls et personauls, les queles il disoit lui havoir envers et contre les-diz \8 homes habitanz et demoranz ou dit Vaul de Morteaul, les quels chouses dessus dittes li diz Henrys demandet et requeroit es diz homes dou-dit Vaul de Morteaul a-lui estre adracies et amendees; 10 item, et sus ce, que li-diz homes habitanz et demoranz ou-dit Vaul \9 de Morteaul disoient et affermoient que li diz Henrys, sires de Montfaucon, lour havoit fait par lui, par ses genz, par ses homes et par ses aidanz, plusours grief et domaiges, 11 a lay parfim, bones genz maymnes entremetanz, en la presence de Thomas \10 Cochy, clerc de Besençon, publique notaire de l-auctoritey l-emperahour et jurié de la court de Besençon, nostre comandement expeciaul a quel, quant a ce et a plux granz chouses, nos havons commis nostre puissance et commetons par ces presentes lettres, pour ce \11 en droit personament establiz et a ce venanz, le dit noble damisel Henry de Monbeliart, signour de Montfaucon, en son nom et pour lui, d-une part, Buenenat dit Traceret, Perrins li corvoisiers, Robers, fiz Willemenet, Estiennes diz Clers de Chacins, \12 de la grant vele de Morteaul, Besençons, fiz Perrim a Bovier, Perrins li Jays, fiz Landry a la Perdue, dou viseney Renaut dou Mont, Willemins diz Solenez, Estevenins diz des Champs, Willemins, fiz a Reschet, dou viseney a Souchant, Willemins, fiz a l-Engolon, \13 Jehannez, fiz Vauchier dit Pece, de Chaisieres et de Chiés le Roy, Willemins, fiz Bercet, Estevenins, fiz Robelet, des Fresnelez, Besençons, fiz Huguenate, Jehannez li Vermeselz, de la Grant Combe, Jehannins, fiz Landriot, Estevenins, ses freres, \14 dou viseney Landryot, Estevenins, fiz Cuenin a Grais, dou viseney a Grais, Haymonins, fiz Perrate, de Moratein, Perrins diz Cuche, fiz Reveillenet, de Moillesuele et de Don Hoton, Besençons, fiz Estevenin a-fil Rolant, dou Boys dou Fourt et de \15 Chiés Gabry, Besençons, fiz a-Burceret, Perrins li Lochars, de Mont le Bon, Estevenins, fiz Bercet, Estevenins, nyés a Juef, Huguenins diz Chestoillons, Willemins, fiz a l-Aison, Besencenins, fiz a la Bertate, dou Laic, Perrenaz, fiz Buenenet \16 a Roux, Perrenez, fiz Quartier a Bouchet, des Costes et de Doux d-Aigue, Huguenins diz Rossaz, Lanbers diz Novez ^[1], de Cournebief, Perrins diz Bruceillez dessus le F[lou]rt ^[2], et Jehans, fiz Vyvyhem, dessus la Soigne dou Vaul de Morteaul, procurours \17 esliz des homes habitanz et demoranz en tout le Vaul de Morteaul pour lay plux grant partie et pour lay plux seinne, quant es chouses cy aprés escriptes et devisees, sindiques et actours, ensic com il est contenuz en une procuracion sus ce faite, \18 saelee dou sael de la court de Besençon et soignie dou soing publique dou-dit Thomas Cochy, publique notaire, en nom de lour premierement et come procurours generalx et comandemenz expeciaulx, sindiques et actours des homes \19 habitanz et demoranz en tout le Vaul de Morteaul, exceptié le viseney de chiés le Bruignet, d-autre part. 12 Les dittes parties, en nom que dessus, non par force ne par baret ne par pahour a ce menez ne decehuz, meis de lour propre et franche \20 velontey et de lour certeinne science, par lour sairemenz doney sus seinz evangiles en la presence de nostre dit comandement, hont confessey en droit, par devant le dit nostre comandement, lour havoir fait, escourdey et ordeney entre lour, \21 en nom que dessus, pour bien de pais et de escourt entre lour metre perpetuament a demorance, et pour oster toute mathiere de question, de plait, de guerre et de descourt, ces covenances que s-ensuiguent: 13 c-est a-savoir que li diz pro\22curours, en nom de lour et come procurours des homes habitanz et demoranz en tout le Vaul de Morteaul, exceptié le viseney de chiés le Bruignet, pour lour et pour lour hoirs et pour lour successours habitanz et demoranz ou Vaul de \23 Morteaul, hont mis et submis, lour, en nom que dessus, lours hoirs et touz lour successours habitanz et demoranz ou-dit Vaul et touz lour biens mobles et non-mobles, presenz et a-venir, en quelque lue que il soient, en la bone, feaul et save\24guarde, desfense, seultey, tuicion et protection dou dit Henry, signour de Monfaucon, acceptant et recevant, pour lui et pour ses hoirs, dois cy perpetuement en heritaige. 14 Et pour la ditte bone et saveguarde ^[3] et seultey dou-dit \25 Henry et de ses hoirs, et pour ce que li-diz Henrys et sui hoir soient plux fervanz, diliganz et entandanz de guerder et saver les diz homes habitanz et demoranz ou-dit Vaul et lour biens, et pour raison des injures, violences et malfaiz \26 dessus diz, et pour ce que li-diz Henrys, en tant come a-lui appartient, povet et doit appartenir pour raison de son droit, pour lui et pour ses hoirs, soffre tenir, havoir et possider es diz homes habitanz et demoranz ou-dit Vaul de Mor\27teaul tous les praez et touz les estufiz en l-eritaige dou dit Henry que il havoient fait es temps nobles barons et saiges, monseignour Jehan, honcle dou-dit Henry, monseignour Vauthier, pere a dit Henry, Jehan, frere d-ycelui Henry, et a \28 temps d-ycelui Henry maymnes jusque a jour de la confection de ces presentes lettres. 15 Item, et pour ce que li diz Henrys, pour lui et pour ses hoirs, en-tant com a-lui appartient, povet et doit appartenir pour raison et cause de son droit, soffre \29 havoir es diz homes habitanz et demoranz ou-dit Vaul de Morteaul les pasturaiges en l-eritaige dou dit Henry en la morte pasture es jouz, en la meniere que li diz homes l-avoient escustumey es temps dessus diz, saul par tout \30 et en-touz lues, ces covenances dessus dittes façanz entre le dit Henry et les diz procurours et expressement exceptié le droit de l-inglese ^[4] de Morteaul, le droit noble damisele Agnel de Dulnec, dame de Villafans, fome çay en-erriers \31 dou-dit Jehan, frere dou dit Henry, et le droit de Jehanne, fille des diz Jehan et Agnel, et de ses hoirs, li-diz procurours, en nom de lour et en nom que dessus, pour lour et pour lour hoirs et pour lour successours habitanz et demoranz ou \32 dit Vaul de Morteaul, hont doney et outroié, donent et outroient et hont confessey en droit par devant nostre dit comandement lour havoir doney et outroié a dit Henry et a ses hoirs seix vinz livres d-estevenans de annuel et perpetuel \33 rente chescon am perpetuement en heritaige; les quelx seix vinz livres d-estevenans li diz procurours, en nom que dessus, hont promis et prometent par lour sairemenz pour ce doney d-on-chescom en nom que dessus sus seinz evangiles, en la presence de \34 nostre dit comandement, a dit Henry et a ses hoirs ou a lour certein comandement rendre, paier, baillier et delivrer en pais perpetuement chescon am a la feste de seint Michiel, en tel meniere et sus tel condicion que a la ditte feste ou \35 enqui entour, li diz Henrys et sui hoirs daivent et sunt tenuz de demander et requerir la ditte some d-argent es governours dou-dit Vaul ou a ces qui sus ce saroient establiz, mais li diz Henrys ou sui hoirs ne saroient tenuz \36 de gaigier pour la ditte some d-ergent ne panrre gaiges ne vendre gaiges jusque a la feste de seint Andrey, chescon am continuement ensuigant; et est a savoir que li premiers termes de paier la ditte some d-ergent de annuel \37 et perpetuel rente saray et encomenceray a ceste presente feste de seint Michiel, que saray l-am de l-Incarnacion Nostre Signour mil trois cenz vint et sept, et ensic chescon am perpetuement a-la ditte feste de seint Michiel saray et davray \38 estre li termes de paier les dittes seix vinz livres chescon am en la meniere dessus ditte. 16 Item, sunt tenuz et hont promis par lour dit sairement li-diz procurours, en nom que dessus, doney de rechief sus seinz evvangiles, de surre le dit \39 Henry, signour de Montfaucon, et ses hoirs, et de aler avoc lui et avoc ses hoirs en houst et en chevachie en touz caux, saul que de guerre emprontee, en la meniere et en la forme que il suilloient et havoient escustumey de surre \40 les diz monseignour Jehan et monseignour Vauthier. 17 Item, hont quitey et remis, quittent et remetent li diz procurours, en nom que dessus, pour lour et pour lour hoirs et pour lour successours habitanz et demoranz ou-dit Val de Morteaul, a dit Henry, \41 signour de Montfaucon, et a ses hoirs, a touz ses aidanz, consoillanz et confortanz, touz droyz, toutes actions reauls et personals, raisons et reclamacions que li-diz home habitanz et demoranz ou-dit Vaul de Morteaul hont, povent et daivent havoir contre \42 le dit Henry et ses genz et ses haidanz et consoillanz, pour quelque raison que ce soit, et touz grief, domaiges, interest et perdes que li diz Henrys ou sui home ou sui aidanz havoient fait ou Vaul de Morteaul et es homes habitanz et demoranz \43 ou dit Vaul de Morteaul dois tout le temps passey jusque a jour de la confection de ces presentes lettres. 18 Et parmey ce, li diz Henrys, pour lui et pour ses hoirs, dois cy perpetuement, les diz homes habitanz et demoranz ou-dit Vaul de \44 Morteaul, saul-que ces qui demuerent ou viseney de chiés le Bruignet, hay recehu et pris en sa bone et saveguarde ^[5], saultey, desfense, tuicion et protection, lour et lour hoirs et lour successours habitanz et demoranz ou-dit Vaul de Morteaul, et \45 touz lour biens mobles et non-mobles, presenz et a-venir, quelx que il soient. 19 Et mande et comande li diz Henrys par ces presentes lettres a touz ses baillif, prevost, chesteleins, maires, serjanz et a touz ses homes, prie, requier et supplie a touz ses signours, \46 compaignons et amis que es diz homes habitanz et demoranz ou dit Vaul de Morteaul, quelxque il soient, saul-que ces dou viseney de chiés le Bruignet, soient haidanz, consoillanz et confourtanz, en-tant com il pourront, dahuement pour amour dou-dit Henry, \47 ensic com il feroient a dit Henry, et les biens d-ycels guerdoient et savoient en touz lues ensic com les propres biens dou dit Henry et de ses homes; et ce de bien et d-amour que saroit fait es diz homes, li diz Henrys tenrroit et hauroit agreable \48 ensic com s-il estoit faiz en sa propre persone. 20 Et ces covenances dessus dittes, et une chesconne d-ycele, hont promis li diz Henrys, en nom de lui et de ses hoirs, et li-diz procurours, en nom que dessus, pour lour et pour lour hoirs et pour lour suc\49cessours habitanz et demoranz ou-dit Vaul de Morteaul par lour sairemenz pour ce doney d-on chescon sus seinz evvangiles en la presence de nostre dit comandement, fermement tenir, guerder, acomplir et poursurre en-tant com il appartient, \50 povet et doit appartenir a une chesconne partie, et non mie venir encomtre par lour ne par autrui, par fait ou par parole, taisiblement ou expressement, ne consentir que autres y veigne; et ne hont fait ne feront chouse par quoy toutes \51 les chouses dessus dittes et covenances contenues en ces presentes lettres ne demouroient en lour force et en lour vigour. 21 Et pour toutes ces chouses fermement tenir, guerder, acomplir et poursurre, les dittes parties, en nom que dessus, hont \52 obligié li une a l-autre lour, lour hoirs, lour successours et touz lour biens, quelx-que il soient, pour panrre, vendre et aliener de la propre auctoritey a la partie que ces convenances tenrroit, senz offense de droit, de partie et de juge et senz \53 demander ne requerir recreance ou restitucion, excepcion quele que ele soit non obstant. 22 Et hont renuncié et renuncent en cest fait les dites parties, et une chesconne d-yceles, en nom que dessus, par lour sairemenz pour ce doney derechief ^[6], a \54 (a) toute excepcion de mal, de barest, de lesion, de decepcion, de circonvencion, de action en fait, de condicion senz cause, a benefice de restitucion en intier pour quelque cause que ce soit, a ce qu-il ne puissent dire ne alleguer que autre chouse soit \55 faite et escourdee et autre soit escripte, a toute decepcion ou decevance, et a toutes autres excepcions de fait, de droit, de custume et de statuz que pourroient estre mises et opposees comtre ces presentes lettres, ou comtre aconne chouse \56 des chouses dessus dittes, et expeciament a droit que dit que generalx renunciacions ne vaut. 23 Et toutes ces chouses dessus dittes, et une chesconne d-yceles, hont confessey les dittes parties, en nom que dessus, en-droit par devant nostre dit comandement, \57 estre veraies et ensic estre faites entre lour; 24 et yceles hont il promis fermement tenir, guerder et acomplir, et hont vuilliu et outroié les dittes parties, en nom que dessus, que nos les controingniens et faciens contraindre par sentence d-excomeniement \58 et par la capcion de lour biens, tout ensanble et une foiz, excepcions queles que eles soient non obstant. 25 En tesmoignaige de la quel chouse, a la requeste des dittes parties a nos faite et respourtee par nostre dit comandement, qui nos hay res\59pourtey toutes les chouses dessus dittes estre veraies et ensic estre faites, havons mis le sael de la court de Besençon pendant en ces presentes lettres, ensanble le soing et la subscripcion \60 dou-dit publique notaire. 26 Ces chouses furent faites en-l-am de l-Incarnacion Nostre Signour courrant par mil trois cenz vint et seix, ou moys de decenbre, la indiction deisme, ou pontificat de nostre seint Pere en Jhesucript et Signour, monsignour Jehan, par la divine puis\61sance pape vint et doux, en l-am unzeme; 27 present, a la recepcion dou loux dou devant dit Henry, signour de Montfaucon, monsi Henriet de Viler, prestre, curié d-Authaison, Perrim d-Ossans et Richart de Crousey, chestelein de Montfaucon, \62 escuiers, tesmoins sus ce appelez et requis; et quant a-la recepcion dou-loux des diz procurours, en nom que dessus, present monsi Henriot, dessus dit, et monsi Vyl, de Orchans ou Vaul de Vennes, prestre, tesmoins sus ce appelez et requis. 28 Thomas Cochy. 29 \63 [Seing] [manuel] Et je, Thomas Cochy, clers de Besençon, publiques notaires de l-auttoritey (de Besençon) ^[7] l-emperahour, et juriez de la court de Besençon, a toutes les chouses dessus dittes fuy presanz avoc les tesmoins dessus diz, l-am, le moys, la indiction et ou pontificat que dessus, et cest present publique instrument en hay fait de la velontey des parties et a lour requeste, et escript de may propre mein et mis en ceste presente publique forme, et me suis subscripz et l-ay soignié de mon publique soing escutumey ensanble le sael de la court de Besençon sus ce appelez et requis. Doublee est et collacion faite. 30 \64 Et je, Henrys de Montbeliart, sires de Montfaucon, damisels dessus diz, qui confessois les chouses dessus escriptes, en-tant com eles me touchent, estre veraies, et yceles hay promis de tenir et guerder fermement, ensanble le sael de la court de Besençon, le soing et la subscripcion dou devant dit publique notaire, en tesmoingaige de vertey des chouses dessus dittes, hay mis mon sael pendant en ces presentes lettres, faites et donees l-am et le moys dessus dit.

Notes de transcription
^[1] Lecturedouteuse.
^[2] Lecturedouteuse.
^[3] Ainsicoupé:save guarde.
^[4] Oul-uiglese.
^[5] Ainsicoupé:save guarde.
^[6] Ainsicoupé:de rechief.
^[7] deBesencon, exponctué.