Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh129

1322, 22 juin.

Type de document: charte: acquisition

Objet: Acquisition par Jean de Vuillafans des biens que Jean dit Clerc d’Avoudrey avait achetés à Jean [II] de Montfaucon-Montbéliard et Agnès de Durnes qui appartenaient à Perrin de Chantrans dit de Loray pour 130 livres, à savoir: 60 livres comptant et 70 livres sous la forme de 7 livrées de rente annuelle à percevoir par Jean dit Clerc d’Avoudrey sur une vigne et sur les hommes de Jean de Vuillafans et leurs possessions.

Auteur: Official de la cour de Besançon.

Disposant: Jean de Vuillafans.

Sceau: sceaux de l'official de la cour de Besançon et d'Agnès de Durnes.

Bénéficiaire: Jean dit Clerc d'Avoudrey.

Autres Acteurs: Agnès de Durnes; Thibaut d'Orsans et Richard d'Orchamps, témoins.

Rédacteur: Perrin de Haute-Pierre.

Support: Parchemin scellé de deux sceaux sur double queue; il subsiste des traces de celui de l’officialité de Besançon et la partie inférieure de celui d’Agnès de Durnes.

Lieu de conservation: AEN, J1 n° 4.

1 Nos, officiaus de la court l-arcidiacre de Besençon, 2 façons savoir a touz 3 que, par devant Perrin d-Aute Pierre, clerc, notaire, jurié de nostre dite court de Besençon, nostre commandement especiaul a ce envoié \2 en leu de nos, au quel nos avons commis et commeitons noz foyes par ces presentes lettres et auquel nos avons foy pleniere quant a ces choses et a plus granz, pour ce personelment establiz et venanz en droit, Jehanz \3 de Villaffans, escuiers, filz jadis monsi Jaque de Villaffans, chevalier, qui fu, comme bien avisez, de certeine science et de sa bone volunté, sans contreignement et sans decevance, si comme il disoit, disenz et affermanz \4 par devant nostre dit commandemant 4 que, come Jehanz diz Clerc d-Avoudrey, chastelains de Villaffans le Nuef, heust acheté de noble damoisel et saige Jehan de Monbeliart, jadis seignour de Monfaucon, les choses \5 ci aprés escriptes, qui furent Perrin de Chantrans dit de Loray, escuier, pour le pris de six vinz et dix livres, c-est assavoir: 5 une maison assise a la vile de Villaffans, toichant a-la maison Perrin, fil Bourquenat, \6 d-une part, et a la maison au fil au bailli, d-autre part; 6 item, toutes les vignes qui furent au dit Perrin, assises ou territoire de Villaffans, des queles il-y ha trois pieces de vigne assises en Crou; 7 item, \7 une piece de vigne ou Vaul des Nuef; 8 item, une autre piece en Chastoillon et une autre piece en la Chenal ensemble le fonz, les appendises et les appartenances des dites maison et vignes 9 et \8 tout quanque li diz Perrins avoit, pooit et devoit avoir en quelque meniere que ce fust ou territoire, ou finaige, es appartenances et es appendises des doux chastiaux de Villaffans, en homes, en \9 maisons, en meix, en courtis, en vergiers, en fourz, en molins, en tailles, en courvees, en censes, en rentes, en menaides, en justises petites et granz, en prises, en terres et en toutes autres choses \10 quex qu-eles soient et commant qu-eles soient nommees, 10 fuers que tant soulement les choses que li diz Perrins tenoit de part sa femme, 11 ha recognu et confessé en droit, par devant nostre dit commandemant, li \11 diz Jehanz de Villaffans, escuiers, 12 que il, tout le droit que li diz Clerc d-Avoudrey avoit, pooit et devoit avoir es choses dessus dites ensinc achetees et acquises par le dit Clerc d-Avoudrey dou \12 seignour de Monfaucon devant nommé, il ha achetees, pour lui et pour ses hoirs, a touz jours mais dou dit Clerc, d-Avoudrey pour le pris de six vinz et dix livres de bons estevenans, 13 des quex li diz Jehanz de \13 Villaffans ha paié, si comme il dit, au dit Clerc d-Avoudrey sexante livres en deniers contanz, et sexante et dix livres li cognut a devoir pour la cause dessus dite par devant nostre dit commandemant. 14 \14 Pour les quex sexante et dix livres d-estevenans, li diz Jehanz de Villaffans ha vendu, pour lui et pour ses hoirs, baillié et delivrei au dit Clerc d-Avoudrey, et mis l-en ha en corporel possession, le dit \15 Clerc d-Avoudrey present et recevant, sept livrees de terre et de annuel rente, a tenir par le dit Clerc d-Avoudrey panre, avoir, lever et percevoir a la vie dou dit Clerc d-Avoudrey. 15 Les quex \16 sept livrees de terre et de annuel rente li diz Jehanz de Villaffans ha assises et assignees au dit Clerc d-Avoudrey en la meniere qui ensuit: 16 premierement, une piece de vigne assise ou territoire \17 de Villafans, ou leu que on dit Crou, toichant a la vigne Embrunchie, d-une part, et a la vigne Jehannat dou Viez Chastel, d-autre part, pour le pries de sexante soudees de terre; 17 et les quatre livrees de terre \18 de annuel rente il ha assis et assigné au dit Clerc d-Avoudrey a panre, lever, avoir et percevoir sus touz les homes dou dit Jehan de Villaffans, a Villaffans, sus lour meix et lour tenemanz et \19 sus la taille et le debite qu-il doivent au dit Jehan de Villaffans, a paier chascun an a la feste de saint Martin d-yver, 18 en tel meniere que se li diz Clerc d-Avoudrey ne pooit panre, avoir, lever et \20 percevoir les dites quatre livres chascun an a sa vie sus les diz homes et sus le debite et la taille qu-il doivent au dit Jehan de Villaffans, li diz Jehanz ha promis et promeit, par sa foy donee corporelment en la main \21 de nostre dit commandement et par stipulation sollempnel, de parfaire sus touz ses autres biens meubles et heritaiges au dit Clerc d-Avoudrey ce qui faudroit des dites quatre livres chascun an au dit terme, a la vie \22 dou dit Clerc d-Avoudrey. 19 Et ces sept livrees de terre doit tenir li diz Clerc d-Avoudrey, panre, avoir, lever et percevoir en la meniere qu-eles li sont ci dessus devisees et assignees a sa vie tant soulement; 20 \23 et tantost aprés son decés, les dites sept livrees de terre revenront quites et delivrés au dit Jehan de Villaffans et a ses hoirs, ensi comme li diz Jehanz disoit. 21 Item, ha recognu et confessé li diz Jehanz \24 de Villaffans par devant nostre dit commandement 22 qu-il ha heu et recehu dou dit Clerc d-Avoudrey la lettre saine et entiere de la vendue que li diz sires de Monfaucon fist au dit Clerc d-Avoudrey des \25 choses dessus dites qu-il acheta et acquist de lui, seellees des seelx dou dit seignour de Monfaucon et de haute dame et noble la dame de Chaucins, sa mere; 23 et parmei les dites lettres baillies dou dit \26 Clerc d-Avoudrey au dit Jehan de Villaffans, li diz Clerc d-Avoudrey n-est tenuz de porter garentie au dit Jehan de Villaffans ne a ses hoirs des choses dessus dites qu-il li ha vendues maisque \27 contre lui et contre ses hoirs, ensi comme li diz Jehanz de Villaffans le recognut et acorda par devant nostre dit commandement. 24 Et promist li diz Jehanz de Villaffans, pour lui et pour ses hoirs, par sa dite foy \28 et par stipulation sollempnel, au dit Clerc d-Avoudrey que toutes foiz que li diz Clerc d-Avoudrey le requerra et besoinz li sera, il mostrera les dites lettres saines et entieres, en jugement ou deffuers \29 pour le dit Clerc d-Avoudrey aidier de yceles et pour lui deffendre, se besoinz li estoit, contre touz ces qui riens li en demanderoient. 25 Et se ensinc estoit que li diz Clerz d-Avoudrey recehust ou \30 encorrest domaiges pour le deffaut des dites lettres non baillies ou non mostrees par le dit Jehan ou par ses hoirs en leu et en temps, ensi comme dessus est dit, li diz Jehanz de Villaffans promist, pour lui et \31 pour ses hoirs, par devant nostre dit commandemant, par sa dite foy et par l-obligacion de touz ses biens meubles et non-meubles, presenz et a-venir, le dit Clerc d-Avoudrey et ses hoirs garder et deffendre de \32 touz couz, domaiges et interest qu-il y auroient, soustenroient et encorroient par le deffaut de lui ou de ses hoirs. 26 Promeitanz par devant nostre dit commandement li diz Jehanz de Villaffans, \33 pour lui et pour ses hoirs, par sa foy donee corporelment en la main de nostre dit commandemant et par stipulation sollempnel entrevenant, que il ces covenances et ces choses dessus dites, toutes et une chascune \34 d-yceles, tenra, gardera, enterinera et acomplira fermement, sans venir ne faire venir encontre ne consentir que autres y veigne, taisiblement ne en appert; 27 et les dites sept livrees de terre, en la meniere \35 qu-eles sont assignees et assises, garentira, appaisera, delivrera et deffendra a ses propres missions et despens au dit Clerc d-Avoudrey a sa vie tant soulement, en jugement et defuers jugement, encontre \36 toutes genz et en touz leux; 28 et rendra et restablira au dit Clerc d-Avoudrey et a ses hoirs touz couz, domaiges, missions, despens et interest que li diz Clerc d-Avoudrey ou li porterres de ces \37 lettres diroient par lour simple seirement, sans autre preuve faire et sans taxacion de juige, lour avoir soustenu, fait et encorru pour le deffaut de la dite garentie non portee et des dites \38 covenances ou d-aucune d-ycés non tenues et non acomplies fermement en la meniere que dessus est dit. 29 Renuncenz en ce fait li diz Jehanz de Villaffans, par sa dite foy, a toutes exceptions \39 de mal, de barat, de deception outre la moitié dou droit pries, de lesion, de circonvencion, de errour et de revocacion, a toute ayde de fait et de droit escript et non escript aussi de canon comme \40 de lois, a touz us et coustume de païs et de leux a ce contraires, a l-exception des dites covenances nonmie loees et acordees, stipulees et promises en la meniere que dessus est dit, et que autre chose \41 soit faite et autre chose escripte et a la copie de cest present instrumant et a toutes autres exceptions, barres, deffenses, allegacions, raisons et choses tant de fait comme de droit es quex \42 quant a ce il convenroit plus expressement renuncier et qui contre la tenour de ces presentes lettres porroient estre dites et opposees en aucune meniere, et especiaulment au droit qui dit que generaul \43 renunciacions ne vaut. 30 Obligenz pour ce especiaulment et expressement li diz Jehanz de Villaffans au dit Clerc d-Avoudrey, et a ses hoirs, touz ses biens meubles et non-meubles, presenz et a-venir, ou que \44 il soient et quex que il soient, pour ycex panre et saisir par le dit Clerc, d-Avoudrey, ou par ses hoirs, vendre et adenerer a deniers contanz de lour propre auctorité, sans justise requerir ou par quelque \45 justise que il mieulz ameroient, sans offense de juige et sans faire recreance d-ycex, pour les convenances dessus dites, toutes et une chascune, garder et acomplir en la meniere qu-eles sont dessus \46 devisees, aucune exception de fait, de droit ou de coustume non obstant. 31 Et pria et requist li diz Jehanz de Villaffans, present nostre dit commandement, a noble damoisele et saige Agnés de Durnay, dame de \47 Villaffans le Nuef, de la quele il tient les dites choses sus qu-il ha assignees au dit Clerc d-Avoudrey, les dites sept livrees de terre de fyé, que ele a ces covenances dessus dites se consente et les louoit \48 et confermoit et promeite a non venir encontre et en signe de verité mate son seel pendent en ces presentes lettres avec le seel de nostre dite court de Besençon. 32 Et nos, la dite Agnés de Durnay, \49 dame de Villaffans le Nuef, presente a ce, certiffiee plenierement, a la priere et requeste dou dit Jehan de Villaffans, li quex ha recognu par devant nos toutes les covenances et les chose dessus dites \50 estre vraies et ensinc estre faites et acordees, a ces covenances me suis consentie et consens comme dame et les loois et confermois et promeit a non venir ne faire venir encontre. 33 Et pour ces \51 covenances dessus dites, toutes et une chascune, fermement tenir, garder et acomplir, li diz Jehanz de Villaffans en ha obligié et sozmis en la juridicion et cohercion des courz de nos, officiaul \52 dessus dit, et de nos Agnés devant dite, lui, ses hoirs et touz ses biens meubles et non-meubles, presenz et a-venir, quex-que il soient et ou que il soient, vuillanz et outroianz que nos puissiens contreindre \53 et faire contreindre lui et ses hoirs, 34 c-est assavoir nos, li diz officiaux, par une chascune de noz juridicions spirituele et temporele par sentence d-excomeniement et par la prise et la vendue de ses diz biens; 35 et nos, \54 la dite Agnés, par la prise et la vendue de ses diz biens meubles et non-meubles, a tenir, garder et acomplir les covenances et les choses dessus dites en la meniere qu-eles sont dessus devisees. 36 \55 En tesmoignaige des quex choses, nos, li diz officiaus, par le rapport feiable de nostre dit commandement, qui nos ha rapporté toutes les covenances et les choses dessus dites ensinc estre faites, acordees, \56 stipulees et promises par devant lui en leu de nos, comme dessus est dit, avons fait seeller ces presentes lettres dou seel de nostre dite court de Besençon avec le seel de la dite Agnés; 37 et nos, la dite \57 Agnés de Durnay, a la priere et requeste dou dit Jehan de Villaffans, avons mis nostre seel pendent en ces presentes lettres avec le seel de la dite court l-arcidiacre de Besençon, sauf nostre droit et \58 l-autrui. 38 Ce fu fait et doné le. XXIIe. jour de juignet, l-an de grace corrant par mil .CCC. et vint et doux, presenz Thiebaut d-Ossans, escuier, et Richart d-Orchans, prevost de Vercex, tesmoins \59 a ce appelez et requis. 39 P. de Alta Petra. Ita est.