Téléchargement du document

Documents linguistiques galloromans
Corpus : DocFrib (chFrib)
Responsable du corpus : Lorraine Fuhrer
Édition de la charte : Lorraine Fuhrer

docFrib037

1404, 24 juin

Type de document: Charte: ordonnance^[a]

Objet: Constitution de Fribourg par laquelle la ville règlemente les modalités d’élection de ses officiers, ainsi que les différentes amendes et condamnations encourues par les contrevenants à ces modalités.

Auteur: L’avoyer, le conseil, les soixante, les deux cents et la commune de Fribourg

Sceau: Ville de Fribourg, non conservé

Bénéficiaire: Les bourgeois et les habitants de la ville de Fribourg et de ses territoires

Rédacteur: Chancellerie de la ville de Fribourg, Pierre Cudrefin, notaire

Support: Original sur parchemin, 56 x 43,5 cm, scellé sur double queue de parchemin

Lieu de conservation: Archives de l’État de Fribourg, Affaires de la ville A 137b

Édition antérieure: K. Utz Tremp, 2005. « 600 Jahre Vennerbrief 24. Juni 1404-24. Juni 2004 », FB 82, p. 65-70^[b]. RD 6, n° 360, p. 52. Édition dactylographiée, préparée pour publication par Catherine Agustoni, Chantal Ammann-Doubliez, Nicolas Barras dans le cadre du projet du Fonds national suisse de la recherche scientifique Documents linguistiques de la Suisse romande, vol. II : Fribourg (XIVe-XVe s.), responsables scientifiques : Ernest Schüle, Nicolas Morard, 1981-1985, et dans celui des Sources du droit du canton de Fribourg, 1989-1998.

1 In non de Deux, amen. 2 Nos, ly advoyé, consel, .LX^ta., .II^c. et tote ly cummuniteiz de Fribor per magniere dehue amasseiz ensem\2ble, 3 faczons savoir à totz present et avenir 4 que nos, considerent les bones et profeitables anciannes custumes et ordinances que a\3vons heues et tenues per nos et nostres predecessours à eschewir et expellir totte ire, invide et rancone qui se porroent sordre chescon \4 ant intre nostre communiteiz sus lo fait deis offices de nostre ville appartigniant ou regiment et governacion de nostre ville et communiteiz devoir à eslirre, 5 \5 por cen, per bone deliberacion et per bon consel sus cen heuz intre nos pluisours foys avons ces mesmes bones custumes ensemble d'autres novelles à nostre semblant bones \6 et profeitables renovalleiz et faites et de present faczons, ordenons et renovallons por nos et por nostres successours perpetuelmant deveir à tenir et à gardeir \7 sains corrumpre jusque à-tant que per nos per lo mode qui aprés s'ensegra in tot ou in partie soent rappallees, les quels s'enseguent per lo mode cy aprés designeiz. 6 Prumieremant, \8 ensy com anciannemant est acustumeiz que tuit ly offices de nostre ville, quel que li office soit, ou jor de la Nativiteiz de Saint Johant Baptiste d'un-chascon officiers soent quiteiz, \9 destituiz et resigneiz et que cil-mesme offices soent mis et renovalleiz chescon ant ensy com cy aprés contient. C'est à savoir que nostre quatre banderet, c'est à savoir ly \10 banderet dou Bor, ly banderet de l'Ogy, li banderet in la partie de la Ville_nouve et ly banderet in la partie dessus deis Hospitaul soent tenuz chescon ant la pluis prochaine dimenge \11 devant feste Saint Johant Baptiste aprés digneir in la maison de nostre justise d'amasseir awec lour les .LX^ta. qui seront heuz por cellui ant chescon in sa partiez; et awec les \12 dit .LX^ta. chescon banderet in sa partie .XX. autres homes ydonees, ly quels banderet, .LX^ta. et li autres prodomes qui enqui serunt convoqueiz devent jureiz incontinant sus les sains \13 evangielles que avent qui despartent d'ensemble de celle place que il eslirrent et mettrent communelmant por l'ant seguant avenir lo consel, lo tresoreir et les .LX. de nostre \14 ville, c'est à savoir tot les melliours et pluis profetable de nostre ville solong cen que un-chescon de lour se cognestra solong son escient et conscience et que ceste election ne \15 se feraz per don, per loyer, per amour ne per proyere forsque in pure veriteiz. Et tot quant qui seraz eslit per lo pluis de cellours ensemble amasseiz, ly minour partie devra \16 attenir sain contredire. Et cil qui seront eslit por cellui jor ne devrent per cellui mesme serement estre descovert ne manifesteiz jusque lo jor de la Nativiteiz Saint \17 Johant Baptiste in l'egliese de Saint Franceis. 7 Item, se per aventure celle dimenge nostre communiteiz estoit in chevauchie ou in exercice que la dicte election ne se pohoust \18 acompliz; en cellui cas ly dit .IIII. banderet devent faire per lo dit serement cellui amassis et election la prochaine dimenge aprés de cen qui seront retorneiz in nostre \19 ville per lo mode dessus deviseiz sains tot await. 8 Item, ordenons et volons que chascon ant lo mardy prochain aprés feste Penthecoste, ly dit nostre .IIII. banderet et li .LX^ta. \20 de cellui ant soent intenuz d'eslierre in chascone partie awec chascon banderet prumier .II. homes ydonees qui soent awec lour banderet por comandeir d'ostel in hostel le \21 sambady devant la dicte dimenge les bones gent et les pluis ydonees à lour semblance et discrecion d'estre la dicte dimenge in justise por instituir et eslir\22re les dit consel, tresorier et .LX^ta.. 9 Item, soent tenuz cellui mesme mardy d'eslierre in chascone partie awec les dit banderet .IIII. autres homes ydonees por \23 comandeir awec lour in chascone partie d'ostel in hostel la vellie de feste Saint Johant les pluis ydonees et profeitables bones gent qui soent lo lendemain feste Saint Johant \24 present in la dicte egliese por la election deis autres offices segant et qui ausi soent à-la porte jusque à-tant que les bones gent soent intrees, à celle fin que nuls non in\25troit cui il ne seroit per lour comandeiz. 10 Item, quel dou consel, deix .LX., deix .II^c. et deis autres borgeis et resident eis quel l'on auroit comandeiz la vellie de Saint Johant d'estre present \26 lo lendemain in la dicte egliese et il n'y vient et compart eis election, cil sunt inchisuz ou bant cy aprés escript. Prumier, chescon deffalliant dou consel est inchisuz ou bant de .LX. s. \27 los. et doit jureir per .I. moix furs de nostre ville et deis termenes, cil deis .LX. et deis .II^c. sunt chescon deffalliant inchisuz ou bant de .X. s. et ly autres borgeis et resident ou bant de .V. s.. \28 Evident neccessiteiz tot jor exceptee. 11 Ausi, li quel qui intreroit presumptuosemant in la dicte egliese à cui l'on ne l'aurozt ^[1] comandeiz lo vespre devant, cil est condampneiz ou \29 bant de .XX. s. et doit jureir per .I. moyx furs de nostre ville et deis termenes. 12 Aprés de cen, volons et ordenons que cellui jor quant les bones gent seront intrees in la dicte egliese et \30 la porte seraz fermee que ou comenczemant devant totes choses ly consel esliet por cellui ant soit publeyé et puis aprés que nostre advoyez soit esliez per lo pluis de tot ceaux qui adont \31 seront present. Et li banderet et autres qui porterunt les pater noster cellui jor soent tenuz devant totes choses de jureir de porteir et de tirier les mallies bien et leaulmant solong cen qui sera \32 esliet. Item, aprés lo dit advoyez soit esliet incontinant nostre burgermeister per lo modo dessus dit per l'avoyez. Item, aprés lo burgermeister soent esliet li dit nostre .IIII. banderet per \33 lo modo dessus dit, per tel condicion que quel qui seraz publeyé dou consel por cellui ant ne soit miez banderet. Et auxi que à-banderet ne soent eslit forsque bons homes ydone\34es de gent de comom ^[2] et non pas persone d'autre estat. Item aprés les dit .IIII. banderet soit esliet auxi communelmant per lo pluis nostre grosouthier. 13 Per tel condicion que incontinant \35 que li dit offices ensi seront eslit l'on apportait in presence l'ordinance novelle faite por lo fait de tenir justise chescon jor de totes choses et por lo fait de chevauchier eis \36 jornaes de marchi registree ou livre deis ordenances. Et que celle l'on liese incontinant et que celle estre liete prumier nostre advoyé, burgermeister, ly consel et ly grosouthier \37 jurient solempnaument à mains levees celle mesme ordenance ensi cum elle est registree chescon à son affirant per lui ou per autri awec lo seremant acustumeiz de faire, \38 d'attenir et d'acomplir sains tot await. Et que nostre advoyez soit tenuz eis dit consel et à-tot les autres officiours quel qui soent de renovalleir chescon ant lour sere\39mant et deviseir cen qui devront jureir chescon solong son office. 14 Item, avons ordonons ^[3] que quel qui seraz eslit à office de nostre ville, quel que ly office soit, soit advoyez, \40 consel, burgermeister, grosouthier, banderet, .LX., .II^c. ou autre, et cellui office il refusait et ne voudrait jureir de faire et d'acomplir bien et leaulmant aprés de cen que il seroit \41 requis et amonesteir de cellui accepteir, cil est inchisuz et condampneiz ou bant de .C. libr. los. et doit jureir furs de nostre ville et deis termenes .X. ant sains marcy. 15 Et \42 cellui bant et tot les autres bant devant et cy aprés contenuz doit segre et recovreir li burgermeister coment les autres eygnons per seremant. 16 Item, nostres officiours, quel \43 que li office soit, doit jureir awec lo seremant acustumeiz que il son office exerceraz et firaz bien et leaulmant et que à cause de son office por porteir damage à partie ne recevra dons, \44 loyer ne promesse. Et quel qui ferait le contraire et ce pout estre proveiz dehuemant, cil doit estre incontinant priveiz et giteiz furs de son office et per .V. ant aprés ne doit avoir \45 office de nostre ville. Et quel qui promettroit ou denroit servis ou loyer por aveir office de nostre ville et ce se pout troveir, cil est inchisuz ou bant de .XXX. s. et doit jureir .I. moix furs \46 de la ville et deis termenes. 17 Item, avons ordeneiz por la neccessiteiz de nostres dit .IIII. banderet et por cen que in cas de chevauchie ou d'autre cry, fuoz ou rimour, il soent tant mieux porvehuz et deschargiez que \47 cil mesme .IIII. banderet chescon ant atot une partie deix .LX^ta. tot jor la dimenge prochaine aprés l'outtave de Saint Pierre et de Saint Pol soent tenuz d'eslierre chescon in sa-partiez .C. homes deis \48 pluis ydonees et conveniables à lour dicrecion tant defurs de la ville quant dident, ly quel .C. homes in chescone partie soent intenuz de jureir solempnaument que quant les banderes chevaucheront furs \49 de nostre ville que cil .C. homes por alleir in buttin, in forrage, escarimochie ne por autre chose qui lour sorviegnie il ne se partirent de lour banderet et bandere forsque per la volunteiz et coman\50demant de son banderet. Et li quel qui ensy firait lo contraire et de sa bandere se fuirrait ou despartiroit sain lo comandemant et volunteiz de son banderet, cil soit inchisuz et condampneiz por la teste \51 et por sa partie de ses biens tel com il les auroit awec femne et enffant. Ausi per tel condicion que intre les dit .C. homes jureiz in chescone partie in ayt .L. homes qui jurient ausi que quant \52 cry, fuoz ou rumour avindrient in nostre ville de jor ou de nuyt que il incontinant atot lour bastons vindrent un-chascon in la maison de son banderet à faire son commandemant et por alleir awec \53 lo banderet dou Bor devant Saint Nicholay, awec lo banderet de l'Ogy dessos lo pueis devant chief Kramere, awec lo banderet deis Hospitals devant l'ospitaul, awec lo banderet de la Nouvavilla devant lo \54 publet ou autre part se mistier est. 18 Item, li waite sus lo clochier ne doit ferir ou bestor pour rumour ne por cry qui aviegnient in nostre ville excepteiz per fuoz quant li fuoz siroit furs dou teit \55 et non avant. 19 Item, quelque persone de quel estat ou de quel condicion qui soit qui firait cry, rumour ou amassis contre les ordinances dessus dictes ou aucones de cellours per quelque magniere que ce soit, volons et ordenons \56 que cil soit condampneiz à totes les foys se il se pout proveiz dehuemant ou bant de .C. s. los. et per .I. ans furs de nostre ville et termenes sain tottes mercy. 20 Ausi nos ne volons que ce present statut et ordi\57nances puissent ou degent porteir prejudice ou damage à nostre chartre et franchise de nostre ville. 21 Et por cen promettons nos ly advoyez, consel et communiteiz de Fribor dessus per nostres seremant doneiz cor\58poralmant à mains levees à Deux et à tot les Sains totes les ordenances dessus dictes et une chascone de par-soy dix or in avant perpetuelmant sain corrumpre attenir, acomplir per tote nostre \59 puissance contre tot home qui voudrait obvier à celles et contre celles ne in tot ne in partiez non faire, non dire, non venir per nos ne per autrui ne consentir à persone qui vourait venir à l'encontre \60 per parole ou per fait ou per consentemant. 22 Et ne volons que les ordenances dessus dictes in tot ou in partie ne soent ne-ne puissent jamaix estre reppallees ou infrintes forsque per lo nombre de .DCCCCXXXX. ^[4] \61 homes de consel, de .LX., de .II^c. et d'autres nostres borgeis et resident bons et ydonees quar in faczant et jurant ces presentes ordenances nos sumes [heuz] ^[5] ensemble et amasseiz ly nombre dessus dit et por cen \62 per minour nombre de gens ydonees celles ne volons per seremant estre infrintes. 23 In tesmogniage, force perpetuaul, vigour et conf[irm]acion ^[6] [deis] ^[7] choses dessus dictes, nos ly advoyez, consel .LX^ta., .II^c. et \63 communiteiz de Fribor lo propre seel de nostre communiteiz avons fait appendre in cy present escript. 24 Doneiz et fait in Fribor le jor Nativiteiz Saint Johant Baptiste, l'ant de grace Nostre Segniour corent \64 mil .CCCCIIII.. 25 Et sunt quadruplees ces presentes lettres de nostre volunteiz et comandemant in tel magniere que un-chescon deis dit .IIII. banderet \65 garde une lettre. 26 Doneiz coment dessus.
27 \66 P. Cudrifin.

Notes de fiche
^[a] Cette ordonnance est l'un des quatre exemplaires de la lettre des bannerets de 1404. Son contenu est identique aux documents 35, 36 et 38.
^[b] Étant donné que cette lettre existe en 4 exemplaires, Mme Utz Tremp a choisi la pièce A 593a comme manuscrit de référence; il s'agit du document 38 de notre édition.

Notes de transcription
^[1] Sic.
^[2] Sic.
^[3] Sic.
^[4] Le nombre de personne semble avoir été ajouté ultérieurement, ce qui n'est pas le cas des autres exemplaires de la constiution.
^[5] Tache, reconstitution à partir des documents 35, 36 et 38.
^[6] Id.
^[7] Id.