Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe251

1346, 7 août

Type de document: charte: reconnaissance

Objet: Reconnaissance par les habitants de Montignez, réunis dans le cimetière, envers l’abbéet le couvent de Bellelay des droits de l’abbaye sur eux-mêmes et sur les terres qu’ilstiennent d’elle à Montignez. Témoins: Guillaume de Courcelles, prêtre, Bouquey, deLugnez, Renaut, fils de Vallat, Jean dit Caremantrant, marchand, de Cicon, Kachelin, deFlorimont, etc. — Acte établi au nom et sous le sceau de l’official de Besançon par Jeande Damvant, notaire.

Commentaire: Parchemin scellé sur double queue. AAEB, Chartes. — Publication par J. Trouillat,Monuments…, III, p. 584-586.

1 Nous, officials de la court de Besançon, 2 faiçons savoir a touz 3 que, en la presence de Jehan de Danval, clerc, notaires, juriez de nostre court, \2 nostres comandemanz expeciaul au-quel, quant a ces choses cum a plus granz, nous havons commis et commattons noz foiez et havons \3 ajostey a lui foy pleniere en ceste partie, pour ce en droit, par devant nostre dit comandement a ce de part nous destiney et commis, personalment \4 establi et a ce venant en la vile de Montaigny, c-est a savoir ou cymetiere expecialment: Huguenins diz Buyssars, Cuenins diz Bonnat, \5 Perins diz li Clers, li Gros Morins, Bourquins diz Chevalliers, Guernereis et Henriet, filz a Musy, principaulx habitanz de Montaigny, \6 emsamble avec lour present la communaltey dou dit leu, louant et auttorizant et recognoissant les roisons, droitures et actions que li signour \7 et l-yglise de Ballelaie, abbés et covanz, ont haü dou tamps passey, ont de present et doient havoir en la vile, es habitanz, ou terretoire et \8 finaige de Montaigny; li quel comme bien avisey, de lour bone et franche veluntey, non pais a ce controinz, non bareteiz et non decephuz, ainsic \9 comme il l-ont recognehu publiement et confessey en droit par [devant] le dit nostre comandement expeciaul, tuit emsamble et huns chescuns par lui, qu-il et \10 tuit li habitant de la vile de Montaigny doivent par droit a l-abbey et a covant de Ballelaie pour cause des terres seans ou finaige et terretoire \11 de Montaigny qu-il tienent des diz signours de Ballelaie: 4 prumierement, de deix gerbes douhees franchement; 5 item, doient quatre corvees chescum \12 an de lour cherrues, et cilz qui ne ont cherrue les doient de lour braiz; 6 item, ne pouhent ne ne doivent vendre vin en la dite vile de \13 Montaigny, se ne est par la veluntey es diz signours de Ballelaie; 7 item, ont cognu que li diz abbés et covanz ont en la dite vile de Montaigny \14 fourt bannal, ne ne doivent cuiere a autre fourt mais-ques au fourt bannal; 8 item, ont cognu qu-il ne pouhent vendre ne aliener les terres \15 qu-il tiennent des diz seignours, se ne est par lour veluntey, ne ne les doivent ne pouhent tenir ne laborer, se ne est dais Montaigny, se \16 ne estoit par fait de guerre dou seignour terrien; 9 item, ont cognu qu-il doient repanre les dites terres des diz seignours de Ballelaie de \17 douze anz en douze anz; 10 item, ont cognu que li diz abbés et covanz doivent avoir aitant des terres heutes comme des cortivees ou caux \18 qu-il les voudront huer; 11 item, ont cognehu que, quant il ont repris lour terres des diz seignours ou de lour certain comandement, li diz abbés \19 et covant en doivent havoir de chescum jornal une amene de blef a la musure dou dit leu, a paier jusques a trois anz; 12 item, ont cognu, ou \20 caux qu-il ne pourroient cultiver et gaingnier les dites terres, il ne les pouhent ne ne les doivent prester a autruy, ne maistre en leuc de \21 lour, mais doivent revenir et retorner es mains des diz abbey et covant. 13 Et toutes les choses dessus dites et une chescune par ly ont cognu \22 et confessey en droit par devant nostre dit comandement li prodome dessus nommey, par la forme et meniere dessus dite. 14 Et ont promis et promattent li \23 dessus nommey, pour lour et pour lours successours, par lour soiremanz donnez corporelment en la main de nostre dit comandement, sollempnel stipulacion \24 entrevenant, et suis l-expresse obligation de touz lours biens moubles et non moubles, presenz et a-venir, tenir et guerder fermement \25 es diz abbey et covant, pour lour et pour lours suscessours, les choses dessus dites, en touz leuz et contre touz, en jugement et deffuer, \26 sanz gemais aler encontre par lour ne par autruy, couvertement ne en appert, non obstant aucune exception de droit, de fait ou de costume. \27 Et se sunt submis et submattent li dessus nommey, en nom cum dessus, pour lour et pour lours hoirs, quant es choses dessus dites tenir et guerder \28 fermement es diz abbey et covant et a lour suscessours, a la juridicion et cohercion de la court de Besançon et de toutes autres cours, \29 c-est a-savoir par sentence d-escumeniement et par la caption de touz lour biens, a l-observation de toutes les choses dessus escriptes. 15 \30 Et ont renuncie et renuncent li dessus dit, pour lour et pour lours hoirs, par lours soiremanz dessus dit, a holablacions et petitions de \31 libelle, de simple petition et de demande ou transcript de ceste lettre, toutes dilations de droit donnees es feres de moissons et de \32 vendeges, et a touz droiz de canon et de lois, et toutes havees et a toutes favoirs et a touz statuz et a toutes autres \33 exceptions de droit, de fait, de costume, de mal, de baret, de lesion, de action en fait, de deception, de condicion sanz cause et \34 pour cause, et a l-exception des choses dessus dites non mie ainsit estre faites ou acordees, et a touz autres droiz generalx et expe\35cialment a droit que dit que generalx renunciacions ne vaut, et a toutes autres exceptions de fait ou de droit que pourroient estre \36 dites ou oposees encontre ces presentes lettres. 16 En tesmoingnaige de la quel chose, nous, officials dessus diz, a la relation dou dit \37 nostre comandement, a cui nous ajostons foy pleniere, avons mis le seel de nostre court de Besançon en ces presentes lettres, que \38 furent faites et donnees, presenz monsi Voyllaume, de Corcelles, prestre, Bouquey, de Luyné, Renaut, fils Vauley, Jehan dit \39 Caremantran, de Cycons, mercheant, et Kachelin, de Florimont, et plusours autres tesmoins dignes de foy a ce cy expecialment \40 requis et appellez, 17 le septieme jour du mois de aoust, l-an Nostre Signour courrant par mil trois cens quarante et seix.
18 \41 Jo. de Dampna Walle.