Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe165

1339 (n. st.), 19 février.

Type de document: charte: droit de réméré

Objet: Droit de réméré accordé par Renaudin de Rocourt, écuyer, fils de feu Pierre de Rocourt,chevalier, agissant au nom de Thibaut, fils de feu Jehannenet de Rocourt, à Jean deRocourt, son frère, et à Simonete, sa femme, fille de feu Horri de Sonvilier, chevalier,pour six ans à partir de la Saint-André d’une rente annuelle de douze « quaressons »,moitié blé moitié avoine, à la mesure de Porrentruy, vendue pour 50 l. de vieux bâloiset rachetable au même prix; la rente de l’année en cours serait due en cas de rachataprès la Saint-Jean (voir n° 164). Témoins: Richart dit Vaydrel, de Porrentruy,chevalier, Perrin de Cœuve, clerc, Loviat dit Marchand et Jeannin dit Gresal, deCourgenay. — Acte établi au nom et sous le sceau de l’official de Besançon par HugueninJean de Boncourt, notaire.

Commentaire: Parchemin jadis scellé sur simple queue. AAEB, B 239 Ajoie/21.

Verso: Dou rachait que Renadins de Rocourt hai fait en nom de Th., fil Jehannenat de Rocourt, a Jehan et Symonate, sai feme (xiv^e siècle).

1 Nos, officials de lai court de Besençon, 2 faiçons savoir a touz 3 que, par devant Huguenin Jehan de Boncourt, clerc, notaire, jurie de lai dite court de Besençon, nostre especial comandemant \2 a quel, quant es choses que sunt ci aprés escriptes et quant a plus granz, nos avons commis et commattons par ces presentes letres nostre pouhoir, pour ce en droit personalmant establis et \3 venanz especialmant, Renadins de Rocourt, escuiers, filz monssi Pierre de Rocourt, chevalier, qui fu, ai confessei et recoignu publiemant 4 que, come Jehans de Rocourt, ses freres, \4 et Symonate, say feme, qui fu fille monssi Horri de Sonvelier, chevalier, qui fu, aient vendu, pour lour et pour lour hoirs, a toz jors-mais, et chascuns de lour pour le tout, a dit Renadin \5 de Rocourt, aichetant en nom et pour Thiebaut, le fil Jehannenat de Rocourt, escuier, qui fu, come vouhels, tuterres et curatours de lui, por lui et por ses hoirs, doze \6 quarressons, moitie blef pur de annuel rente et moitie avoinne, a lai mesure de Porreintruy, a-pahier et rendre chascun an franchemant, a toz jors-mais, le blef pur le jour \7 de lai feste de saint Michiel et l-avoinne le jour de lai feste de saint Mertin d-yvert. 5 De lai quel quantitey de blef de annuel rente, a lai dite mesure, lai dite Symonate ai assis et assetey, pour \8 lei et pour ses hoirs, a toz jors-mais, par les los et actoritei dou dit Jehan, son mary, et de Jehannin de Grantfontaine, escuier, son lehal vouhei, a dit Renadin, en nom que dessus, suis tout \9 l-erietaige que Huguenins de Sonvelier, escuiers, et Symonate li plus juesne, sai suer, hont, pouhent et doivent [havoir], qu-est de franc aluef, en lai vile et ou terretoire de Porreintruy, en champs, prez et \10 en toutes autres choses, senz riens excepter, unze quarressons, moitie blef pur de annuel rente et moitie avone, a lai dite mesure, et li diz Jehans de Rocourt, hun quarresson de annuel rente \11 a lai dite mesure, moitie blef pur et moitie avone, suis lai sue partie et suis quanqu-il hai ou four de Rocourt, pour cinquante libres de bons viez baloys de que li vint et dous denier \12 de lai dite monoie valent hun bon gros tornois d-argent, qu-il hont hahu dou dit Renadin, en nom que dessus, enssi cum il est contenuz en unes letres suis ce faites que li diz Renadins, en nom \13 que dessus, en hai de lour. 6 Et en aprés de ce, li diz Jehans de Rocourt hait obligie, por lui et por ses hoirs, a toz jors-mais, en lai main dou dit Renadin, en nom dou dit \14 Thiebaut, pour lui, Thiebaut, et pour ses hoirs, les quinze mairs d-argent, contenuz danz les letres qu-il hai de Huguenin de Sonvelier dessus [dit], ou caus que li diz Jehans de Rocourt et sai dite \15 feme ou lour hoir ne porrient ou ne vorrient garantir et apaisier les diz assignals contre le dit Huguenin de Sonvelier, say suer Symonate lai plus juesne, ou contre \16 lour hoirs, et encontre ^[1] touz autres que acunne chose y demanderient; 7 et ou caus qu-il ne garantirient les diz quinze mairs d-argent en lai maniere que dessus est desclariez, li diz \17 Jehans de Rocourt ai vuillu que, le rachait passey qu-il intent que li diz Renadins, en nom que dessus, li doit doner, il oblige, por lui et por ses hoirs, a dit Renadin en nom dou dit Thiebaut, \18 a lui, Thiebaut, et ai ses hoirs, touz ses biens qu-il hai, puet et doit havoir en lai vile et ou terretoire de Rocourt, en champs, prez, bois et toutes autres choses, por le deffaut des \19 dites garanties, enssi cum il est contenuz danz unes autres letres suis ce faites, que li diz Renadins en hai, en nom que dessus, dou dit Jehan de Rocourt, considerez dou dit Renadin les biens, servi\20ses, courtoisies et amestiers que li diz Jehans de Rocourt, ses freres, hai fait ou temps passey a lui, 8 Renadin, en nom dou dit Thiebaut, ne decehuz ne controinz ne baretez, mais de sai \21 propre et franche voluntei, ai donei et done de graice especial por lui, Thiebaut, et en nom de lui, por lui et por ses hoirs, es diz Jehan de Rocourt et a Symonate, say feme, et a lour hoirs \22 ploin pouhoir, general pussance et especial comandemant de raicheter et de rehavoir les dites choses vendues entieremant et les diz assignals, jusque de l-andemain de lai feste de saint \23 Andrey pruchainnemant venant en seix anz contenuelmant ensuganz et a-complir, toutes les fois qu-il porront et vorront raicheter por les dites cinquante libres de lai dite monoie, \24 a pries que dessus est dit, baillant et donant franchemant des diz Jehan de Rocourt, de sai dite feme et de lour hoirs a dit Renadin, en nom dou dit Thiebaut, a lui et ai ses \25 hoirs, en tel maniere que, s-il raichetient devant lai feste de lai Nativitey saint Jehan Baptiste, il sarient quite de pahier lai rente ensugant; se ce non, il lai paherient a dit Renadin, \26 en nom dou dit Thiebaut, a lui et ai ses hoirs. 9 Et cest raichait et toutes et singuleres les choses dessus dites ai promis li diz Renadins de Rocourt, en nom que dessus, par son soiremant doney corporalmant, \27 por lui et por ses hoirs, en lai main de nostre dit comandemant, sollempnel stipulation entrevenant, et suis l-obligation de touz ses biens moubles et non moubles, presenz et a-venir, tenir et garder fermemant par le dit \28 terme es diz Jehan de Rocourt, Symonate, sai feme, et a lour hoirs, garantir et apaisier le dit rachait par le dit terme, en touz lues et encontre ^[2] [touz], senz venir encontre ^[3] par lui ne par autruy, \29 en lui et ses hoirs submatant, en nom que dessus, a lai juridictiom et coherciom de lai court de Besençon et de toutes autres cours ecclesiastes et seculeres a l-observatiom de toutes et singu\30leres les choses dessus escriptes, non obstant acunnes exceptions de fait ou de droit. 10 En tesmoignaige de lai quel chose, nos, a lai relaciom de nostre dit comandemant, avons mis le \31 seal de lai dite court de Besençon pendant en ces presentes letres. 11 Faites et donees, presenz monssi Rechairt dit Vendrey, de Porreintruy, chevalier, Perrin de Cueve, clerc, Loviat Marchant et \32 Jehannin dit Gresal, de Courgeignay, le vanrredi aprés le duemainge que om chantaist Invocavit, l-an mil trois-cenz trente et huit.
12 \33 H. J. de Boncourt.

Notes de transcription
^[1] Ainsi coupé: en contre.
^[2] Ainsi coupé: en contre.
^[3] Ainsi coupé: en contre.