Téléchargement du document

Documents linguistiques galloromans
Corpus : DocFrib (chFrib)
Responsable du corpus : Lorraine Fuhrer
Édition de la charte : Lorraine Fuhrer

docFrib036

1404, 24 juin

Type de document: Charte: ordonnance^[a]

Objet: Constitution de Fribourg par laquelle la ville règlemente les modalités d’élection de ses officiers, ainsi que les différentes amendes et condamnations encourues par les contrevenants à ces modalités.

Auteur: L’avoyer, le conseil, les soixante, les deux cents et la commune de Fribourg

Sceau: Ville de Fribourg, non conservé.

Bénéficiaire: Les bourgeois et les habitants de la ville de Fribourg et de ses territoires

Rédacteur: Chancellerie de la ville de Fribourg, Pierre Cudrefin, notaire

Support: Original sur parchemin, 59 x 50,5 cm, scellé sur double queue de parchemin

Lieu de conservation: Archives de l’État de Fribourg, Affaires de la ville A 137a

Édition antérieure: K. Utz Tremp, 2005. « 600 Jahre Vennerbrief 24. Juni 1404-24. Juni 2004 », FB 82, p. 65-70^[b]. RD 6, n° 360, p. 52. Édition dactylographiée, préparée pour publication par Catherine Agustoni, Chantal Ammann-Doubliez, Nicolas Barras dans le cadre du projet du Fonds national suisse de la recherche scientifique Documents linguistiques de la Suisse romande, vol. II : Fribourg (XIVe-XVe s.), responsables scientifiques : Ernest Schüle, Nicolas Morard, 1981-1985, et dans celui des Sources du droit du canton de Fribourg, 1989-1998.

1 In non de Deux, amen. 2 Nos, ly advoyez, consel, .LX^ta., .II^c. et tote ly cumuniteiz de Fribor per magniere dehue amasseiz ensemble, 3 faczons savoir \2 à totz present et avenir 4 que nos considerant les bones et profeitables anciannes custumes et ordenances que avons ehues et tenues per nos et nostres prede\3cessours à eschewir et expellir tote ire, invide et rancone qui se porroent sordre chescon ant intre nostre communiteiz sus lo fait deis offices de nostre ville \4 appartigniant ou regiment et governacion de nostre ville et communiteiz devoir à eslirre, 5 por cen, per bone deliberacion et per bon consel sus cen ehuz intre nos pluisours \5 foy, avons ces mesmes bones custumes ensemble d’autres novelles à nostre sembliant bones et profeitables renovelleiz et faites et de present faczons et \6 renovallons et ordenons por nos et por nostres successours perpetuelmant deveir à tenir et gardeir sains corrumpre jusque à-tant que per nos per lo mode qui aprés \7 s’ensegra in tot ou in partie soent reppallees, lesqueles s’enseguent per lo mode cy aprés designeiz. 6 Prumieremant, ensy com anciannemant est acustumeiz \8 que tuit ly offices de nostre ville, quel que ly office soit, ou jor de la Nativiteiz de Saint Johant Baptiste d’on-chescon officiers soent quiteiz, destituiz et resig\9neiz et que cil mesme offices soent mis et renovalleiz chascon ant ensy com sy aprés contient. C’est à savoir que nostre quatre banderet, c’est à savoir \10 ly banderet dou Bor, ly banderet de l’Ogy, ly banderet in la partiez de la Villenouve et ly banderet in la partiez dessus deis Hospitauls soent tenuz chescon ant la pluis prochane \11 dimenge devant feste Saint Johant Baptiste aprés digneir in la maison de nostre justise d'amasseir awec lour les .LX^ta. qui seront heuz por celluiz ant chescon in sa par\12tie; et awec les dit .LX^ta. chescon banderet in sa partie .XX. autres homes ydonees, ly quels banderet, .LX^ta. et ly autres prodomes qui enqui serunt convoqueiz devent jureir \13 incontinant sus les sains evangielles que avent qui despartent d'ensemble de celle place que il eslirrent et mettrent communelmant por l'ant seguant avenir lo consel, lo \14 tresorier et les .LX^ta. de nostre ville, c'est à-savoir tot les melliours et pluis profeitables de nostre ville solong cen que un-chascon de lour se cognestra solong son escient et conscience et \15 que ceste election ne se fera por don, por loyer, por amour ne per proyere forsque in pure veriteiz. Et tot quant qui seraz eslit per lo pluis de cellours ensemble amasseiz ly minour partiez \16 devra attenir sain contredire. Et cil qui seront eslit por cellui jor ne devrent per cellui mesme serement estre descovert ne manifesteiz jusque lo jor de la Nativiteiz Sains Johant \17 Baptiste in l'egliese de Saint Franceis. 7 Item, se per aventure celle dimenge nostre communiteiz estoit in chevauchie ou in exercice que la dicte election ne se pohust acompliz; en cellui cas, ly \18 dit .IIII. banderet devent faire por lo dit seremant cellui amassis et eleccion la prochanne dimenge aprés de cen qui seront retorneiz in nostre ville per lo mode dessus deviseiz sains tot await. 8 Item, ordenons et volons que chescon ant lo mardy prochain aprés feste Penthecoste ly dit nostre .IIII. banderet et ly .LX^ta. de cellui ant soent intenuz d'eslierre in chescone partiez awec chescon banderet pru\19mier .II. homes ydonees qui soent awec lour banderet por comandeir d'ostel in hostel le sambady devant la dicte dimenge les bones gent et les pluis ydonees à lour semblance et discrecion \20 d'estre la dicte dimenge in justise por instituir et eslirre les dit consel, tresorier et .LX^ta.. 9 Item, soent tenuz cellui messme mardy d'eslierre in chescone partie awec les dit banderet .IIII. \21 autres homes ydonees por comandeir awec lour in chescone partie d'ostel in hostel la vellie de feste Saint Johant les pluis ydonees et profeitables bones gent qui soent lo lendemain feste \22 Saint Johant present in la dicte egliese por la election deis autres offices seguant et qui ausy soent à la porte jusque atant que les bones gent soent intrees à celle fin que nuls non introit \23 cui il ne seroit per lour comandeiz. 10 Item, quel dou consel, deis .LX^ta., deis .II^c. et deis autres borgeis et resident eis quel l'on auroit comandeiz la velliez de Saint Johant d'estre present lo len\24demain in la dicte egliese et il n'y vient et compart eis election, cil sunt inchisuz ou bant cy aprés escript: prumier chescon deffalliant dou consel est inchisuz ou bant de .LX. s. los. et doit \25 jureir per .I. moix furs de nostre ville et deis termenes; cil deis .LX. et deis .II^c. sunt chescon deffalliant inchisuz ou bant de .X. s.; et ly autres borgeis et resident ou bant de .V. s.. \26 Evident neccessiteiz tot jor exceptee. 11 Ausy liquel qui intreroit presumptuousemant in la dicte egliese à cui l'on ne l'auroit comandeiz lo vespre devant, cil est condampneiz ou bant de \27 .XX. s. et doit jureir per .I. moix furs de nostre ville et deis termenes. 12 Aprés de cen volons et ordenons que cellui jor quant les bones gent seront intrees in la dicte egliese et la porta \28 sera fermee que ou comenczemant devant totes choses ly consel esliet por cellui ant soit publeyé et puis aprés que nostre advoyez soit esliez per lo pluis de tot ceaux qui adont serunt \29 present. Et ly banderet et autres qui porterunt les pater noster cellui jor soent tenuz devant totes choses de jureir de porteir et de tirier les mallies bien et leaulmant solong \30 cen qui sera esliet. Item, aprés lo dit advoyez soit esliet incontenant nostre burgermeister per lo mode dessus dit per l'avoyez. Item, aprés lo burgermeister soent esliet ly dit nostre .IIII. banderet \31 per lo mode dessus dit, per tel condicion que quel qui seraz publeyez dou consel per cellui ant ne soit miez banderet. Et ausy que à banderet ne soent eslit forsque bons homes \32 ydonees de gent de comun et non pas persone d'autre estat. Item, aprés les dit .IIII. banderet soit esliet auxi communelmant per lo pluis nostre grosouthier. 13 Per tel condicion que in\33contenant que ly dit offices ensy seront eslit l'on apportait in presence l'ordenance novelle faite por lo fait de tenir justise chescon jor de totes choses et por lo fait de chevauchier eis jor\34nees de marchi registree ou livre deis ordenances. Et que celle l'on liese incontinant et que celle estre liete prumier nostre advoyez burgermeister ly consel et ly grosouthier jurient \35 solempnaument à mains levees celle mesme ordenance ensy cum elle est registree chescon à son affirant per lui ou per autri awec lo seremant acustumeiz de faire, d'attenir \36 et d'acomplir sains tot await. Et que nostre advoyez soit tenuz eis dit consel et à tot les autres officiours quel qui soent de renovalleir chescon ant lour seremant et deviseir cen \37 qui devront jureir chescon solong son office. 14 Item, avons ordoneiz que quel qui seraz eslit à office de nostre ville, quel que ly office soit, soit advoyez, consel, burgermeister, grosouthier, \38 banderet, .LX^ta., .II^c. ou autre et cellui office il reffusait et ne voudrait jureir de faire et d'acomplir bien et leaulmant aprés de cen que il seroit requis et amonesteiz de celluiz accep\39teiz, cil est inchisuz et condampneiz ou bant de .C. libr. los. et doit jureir furs de nostre ville et deis termenes .X. ant sains marcy. 15 Et cellui bant et tot les autres bant devant \40 et cy aprés contenuz doit segre et recovreir ly burgermeister coment les autres eygnons per seremant. 16 Item, nostres officiours, quel que ly office soit, doit jureir awec \41 lo seremant acustumeiz que il son office exercera et firaz bien et leaulmant et que à cause de son office por porteir damage à partiez ne recevraz dons, loyer ne promesse. \42 Et quel qui ferait lo contraire et ce pout estre proveiz dehuemant, cil doit estre incontenant priveiz et giteiz furs de son office et per .V. ant aprés ne doit aveir \43 office de nostre ville. Et quel qui promettroit ou denroit servis ou loyer pour aveir office de nostre ville et ce se pout troveir, cil est inchisuz ou bant de .XXX. s. et doit \44 jureir .I. moix furs de nostre ville et deis termenes. 17 Item, avons ordoneiz por la neccessiteiz de nostres dit .IIII. banderet et por cen que in cas de chevauchie ou d'autre cry, fuoz \45 ou rimour il soent tant mieux porvehuz et deschargiez que cil mesme .IIII. banderet chescon ant atot une partiez deis .LX^ta. tot jor la dimenge prochanne aprés l'out\46tave de Saint Pierre et de Saint Pol soent tenuz d'eslierre chescon in sa partiez .C. homes deis pluis ydonees et convignables à-lour discrecion tam deffurs de \47 ville quant dident. Lyquel .C. homes in chescone partie soent intenuz de jureir solempnaulment que quant les banderes chevaucherent furs de nostre ville que cil \48 .C. homes por alleir in buttin, in forrage, escarmochie ne pour autre chose qui lour sorvigniez il ne se partirent de lour banderet et bandere forsque per la volunteiz \49 et comandemant de son banderet. Et lyquel qui ensy firait lo contraire et de sa bandere se fuirrait ou despartiroit sain lo comandemant et volunteiz de son banderet, cil soit \50 inchisuz et condampneiz per la teste et per sa partie de sé biens tel com il les auroit awec femne et enfant. Ausi per tel condicion que intre les dit .C. homes \51 jureiz in chascone partie in ayt .L. homes qui jurient ausy que quant cry, fuoz ou rimour avendrient in nostre ville de jor ou de nuyt que il incontenant \52 a_tot lour bastons vindrent un-chescon in la maison de son banderet à faire son comandemant et pour alleir awec lo banderet dou Bor devant Saint Nicholay; awec lo \53 banderet de l'Ogy dessos lo pueis devant chief Kramere; awec lo banderet deis Hospitaul devant l'ospitaul; awec lo banderet de la Nouvaville devant lo publiet ou \54 autre part se mistier est. 18 Item, ly waite desus lo clochier ne doit ferir ou bestor por rimour ne por cry qui aviegnient in nostre ville excepteiz por fuoz quant ly fuoz \55 siroit furs dou teit et non avant. 19 Item, quelque persone de quel estat ou de quel condicion que soit qui firait cry, rumour ou amassis contre les ordenances dessus dictes ou \56 aucones de cellours per quelque magniere que ce soit volons et ordenons que cil soit condampneiz à totes les foys se il se pout proveir dehuemant ou bant de .C. s. los. \57 et per .I. ant furs de nostre ville et termenes sain totes marcy. 20 Ausi nos ne volons que cel present statut et ordonances puissent ou degent porteir prejudice ou dama\58ge à nostre chartre et franchise de nostre ville. 21 Et por cen promettons nos ly advoyé, consel et communiteiz de Fribor dessus per nostres seremant doneiz corporalmant à \59 mains levees à Deux et à tot les Sains totes les ordenances dessus dictes et une chascone de par-soy dix or in avant perpetuelmant sain corrumpre à-tenir, acomplir per tote nostre \60 puissance contre tot home qui voudrait obvier à celles et contre celles ne in tot ne in partie non faire, non dire, non venir per nos ne per autrui nec consentir à persone qui vourait venir \61 à-l'encontre per parole ou per fait ou per consentemant. 22 Et ne volons que les ordenances dessus dictes in tot ou in partie ne soent ne ne puissent jamaix estre reppallees ou \62 infrintes forsque per lo nombre de .IX^c. et .XL. homes de consel, de .LX^ta., de .II^c. et d'autres nostres borgeis et resident bons et ydonees quar in faczant et jurant ces presentes or\63denances, nos sumes heuz ensemble et amasseiz ly nombre dessus dit. Et por cen por minour nombre de gens ydonees celles ne volons per seremant estre infrintes. 23 \64 In tesmogniage, force perpetual, vigour et confirmacion deis choses dessus dictes, nos ly advoyé, consel, .LX., .II^c. et communiteiz de Fribor, lo propre seel de nostre communiteiz avons \65 fait appendre in cy present escript. 24 Doneiz et fait in Fribor lo jor Nativiteiz Saint Johant Baptiste, l'ant de grace Nostre Segniour corent mil .CCCCIIII. . 25 \66 Et sunt quadruplees ces presentes lettres de nostre volunteiz et comandemant in tel magniere que un-chescon deis dit nostres .IIII. banderet garde une lettre. 26 Doneiz \67 coment dessus.
27 \68 Petrus Cudrifin

Notes de fiche
^[a] Cette ordonnance est l'un des trois exemplaires de la lettre des bannerets de 1404. Son contenu est identique aux documents 35, 37 et 38.
^[b] Étant donné que cette lettre existe en 4 exemplaires, Mme Utz Tremp a choisi la pièce A 593a comme manuscrit de référence; il s'agit du document 38 de notre édition.