Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe036

1317, 20 mai.

Type de document: charte: reconnaissance

Objet: Reconnaissance par Richart, écuyer, fils de feu Perrin dit Vaydrel, écuyer, de Porrentruy, à sa sœur Catherine, femme de Richart de Morimont, chevalier, des terres et des rentes, à Chevenez, à Alle, à Boncourt et à Courtedoux sur lesquelles était assignée la dot de 70 marcs d’argent que son père lui avait donnée (voir n° 16).

Auteur: Richart, écuyer, fils de feu Perrin dit Vaydrel, écuyer, de Porrentruy

Sceau: Richart, écuyer, fils de feu Perrin dit Vaydrel, écuyer, de Porrentruy, Horri, avoué de Porrentruy, chevalier, et Jean, doyen d’Ajoie.

Bénéficiaire: Catherine, femme de Richart de Morimont, chevalier,

Support: Parchemin jadis scellé de trois sceaux sur double queue.

Lieu de conservation: AAEB, B 239 Ajoie/21.

Édition antérieure: Analyse par J. Trouillat, Monuments…, III, p. 701-702.

1 Je, Richars, escuiers, fiz ce en arriers Perrin dit Vaydrel, escuier, que fuit, de Porraintruy, 2 fais savoir ai touz 3 que, comme dame Katherine, \2 mai suer, femme mon sy Richart, chevalier, de Morimont, teigne pour aissise en non de son mariaige, pour sexante et dix mars d-argent, les \3 choses ci aprés devisees, ce est ai savoir; 4 en lai vile et ou territoire de Cheveney, dix solz et douz chapons de rente que Thomas doit; 5 item, Jehannins \4 diz Champons, dix solz et douz chapons; 6 item, Cuenins diz Espassez, six solz et huyt deniers et un chapon; 7 item, Jehannins, ses freres, six solz et huyt \5 deniers et un chapon; item, Jehannins, fiz a Conte Aberc, six solz et huyt deniers et un chapon; 8 item, Henrions li Moille, trois emenes de blef d-une \6 pece de terre quant elle est gaignie; 9 item, en lai vile et ou territoire d-Alle, lai terre que Jehannins diz Chalvez hay tenu, que valoit chescun \7 an vint et douez emenes de rente, moittie blef et avoinne, et douz chapons; 10 item Voillins diz Pucins, fiz a Proudomme, vint emenes, moittie blef \8 et avoinne, et douz chapons; 11 item, Parrette li texoutte, diz solz et quattre chapons; 12 item, en lai vile et ou territoire de Boncourt, sept bechez, ai \9 lai meusure de Montbeliart, de rente chescun an et six chapons, que Jehannins li pachierres et Verniers, ses freres, que furent fil Girardin, doivent \10 pour terre que il tiennent de mai dite suer; 13 item, ai Corthedoul, Verniers, li fiz Gerbey, dix huyt solz et quattre chapons; 14 item, Jehannette, fille Esteveney, \11 et Loviez, ses fiz, nuef solz et douz chapons; item, Reniers, li freres Varnie lou favre, de Porraintruy, trois solz et douz chapons; 15 item, Cuenins, trois pe\12nalz de blef de rente d-une pece de terre quant elle est gaignie, lai quele rente desus devisee Perrins, mes diz perres, assignay ai mai \13 dite suer en non de son mariaige pour les sexante et dix mars d-argent devant nommés. 16 Per que je, li devant diz Richars, escuiers, non \14 pez deceus, losengiez ne contrains d-aucun, mais saiges et bien avisés, et en reguardant plusours servises que mai dite suer et messy Ri\15chars, ses diz maris, mi ^[1] hont fait et feront ancor, hay quitté et quittoy, pour moy et pour mes hoirs, pour touz jours-mais, ai mai dite suer, \16 dame Katherine, et ai ses hoirs, lai terre et lai rente entierement desus dite, li quele li fuit donee et aissise, pour son mariaige, pour les diz sexan\17te et dix mars d-argent, soit en fye, en aluef, en herietaige, en prez, en champs, en boys, en chessaulz, en maissons, en corthiz, et en toutes \18 altres choses queles qu-ales fuscent. 17 Et pour plus grant seurté faire de ceste dite quittance ai mai dite suer et ai ses hoirs, j-ay promis et promet, \19 per mai foy pour ce corporalment donee en luec de sarement, pour moy et pour mes hoirs, que je encontre ceste lettre ne contre ceste dite quit\20tance nen iray ^[2] ne ne feray ai aler per moy ne per altruy, coiement ne en apert, mais lai tenray, pour moy et pour mes hoirs, fermement ai touz \21 jours-mais ai mai dite suer et ai ses hoirs, en touz luez, en toutez cours, en touz jugemens et defors, encontre toutes gens, sans corrumpre et sans ge\22mais aler encontre. 18 Et vuil et outroy, pour moy et pour mes hoirs, que nos ne puissiens demander ne reclamer nulle demande ne nulle ac\23tion, quele qu-ale fuit, en lai dite chose, fuit pour raison de racheit ou pour altre raison, mays vuil et outroy, pour moy et pour mes hoirs, que \24 li dite chose entierement soit pour touz jours-mais ai mai dite suer, dame Katherine, et ai ses hoirs, quitte et franche, sans nun rappel, non ob\25stant aicunes raissons de drois de canon ou de loys ou de custemes que moy ou mes hoirs pourient aidier ai casser ces dites convenances \26 en tout ou en partie, et mai dite suer ou ses hoirs grever. 19 En tesmoignaige de lai quele chose, je, li devant diz Richars, escuiers, hay \27 mis mon propre seal en ces presentes lettres, et si hay proié et requis es saiges persones et vaillans, mon signor U^olri, voué de Porraintruy, \28 et mon sire Jehan, daien de Ajoye, que-il i mettent lour sealx; et nos, U^olris, chevaliers, vouez de Porraintruy, et Jehans, daiens de A\29joye, es proiieres et es requestes dou dit Richart, escuier, havons mis nos sealx en ces presentes lettres ensamble lou seal a dit \30 Richart, escuier, en signe de lai pure verité. 20 Faites et donees lou vanredi devant lai feste de lai Penthecouste, l-an de grace cor\31rant per mil trois cens et dix et sept, ou moys de may.

Notes de transcription
^[1] Ou: m-i.
^[2] Ainsi coupé: ne niray.