Téléchargement du document

Documents linguistiques galloromans
Corpus : chartes de Douai (chDo)
Responsable du corpus : Martin-D. Glessgen
Édition de la charte : Monique Mestayer / Thomas Brunner

chdouai0466

1270, septembre. – Douai.

Type de document: charte: vente de rente

Objet: Vente par Evrart d’Auby, chevalier, d’une rente viagère de 40 livres par an, payable moitié à Noël et moitié à la Pentecôte, servie par son fils Jean à Jean Lalain, beau-père de ce dernier. En cas de défaillance paiement à une échéance, on prévoit une amende de 100 s. par. auxquels s'ajoutent les éventuels frais de Jehan Lalain. En cas de défaillance à deux échéances: le débirentier devra 300 lib. par. payables dans les quarante jours qui suivront la semonce de Jehan Lalain. Si les 300 lib. ne sont pas payées à temps, s'y ajouteront les éventuels frais encourus par le crédirentier. Jehan (d'Auby) autorise Jehan Lalain à engager jusqu'à 60 lib. par. devant une cour pour réclamer son bien; il remboursera cette somme.

Auteur: non annoncé, échevins de Douai.

Disposant: Evrart d'Auby, chevalier.

Sceau: non scellé; devise chirographaire: CHI-RO-GRA-PHIM

Bénéficiaire: Acheteur et crédirentier: Jean Lalain, bourgeois de Douai - Débirentier: Jehan (d'Auby) fils d'Evrart et gendre de Jehan Lalain.

Autres Acteurs: échevins de Douai: Guillaume de Lambres, Guillaume Pourcelet.

Support: Original parchemin chirographe superposé bipartite - partie supérieure.

Lieu de conservation: AM Douai, FF 661/5973.

Édition antérieure: Espinas, Vie urbaine, t. III, n° 541, p. 407.

Verso: C’est des .XL. lb. de terre ke Jehans d’Aubi doit a Jehan l’Alain qui fille il a.

1 Sacent tout cil ki sont et ki a-venir sont ke mesire Evras d'Aubi, chevaliers, a vendut bien et loiaument et par juste pris dont il se tient bien apaiet et a plain, en seke monoie boine, loial et bien contee, a Jehan l'Alain, \2 borgois de Douay, quarante livrees de rente par an ke Jehans, ses fius, li devoit a deus paiemens, c'est a-savoir le nuit del Nouel vint livres de paresis et le nuit de le Pentecouste vint \3 livres de par. chascun an toute le vie monsigneur Evrart devantdit; et a en-covent mesire Evrars devant nomeis ke il jamais a nul jour en ces quarante livrees de rente riens ne demandera ne \4 reclamera ne art ne engien, cause, matere, ne moien par lui ne par autrui ne quera ne fera quere par quoi les quarante livrees de rente devantdites soient de riens empeechies ke Jehans \5 li Alains devant nomeis ne les ait et tiegne bien et en-pais, si ke devant est dit, toute se vie. Ore est a-savoir ke Jehans, li fius monsigneur Evrart devant nomeit, a otriet et otrie ke ces quarante livrees \6 de rente a-vie k'il devoit a monsigneur Evrart, sen pere, soient escangies a le vie Jehan l'Alain devantdit qui fille il a; et a en-covent ciels Jehans, fius monsigneur Evrart devant-nomeit, a rendre et a paier \7 a Jehan l'Alain devantdit u a sen comant les quarante livres de par. de rente a Douay a deus termines par an, tout ensi ke devant est dit, tant longement ke Jehans li Alains devant-nomeis ara le vie \8 ou cors, en quel estat u en-quel habit k'il onques soit, en religion ou hors de religion. Et s'il avenoit cose ke li devant-dis Jehans li Alains n'estoit paiés de toute le rente devant nomee toute se vie, ensi ke de\9vant est dit, Jehans, li fius monsigneur Evrart devant-nomeit, a en-covent ke il renderoit et paieroit au devantdit Jehan l'Alain u a sen comant por chascun vint livres de par. ki defauroient a paier de \10 le rente devant-nomee cent sols de par. en non de painne et avoec il li renderoit tous les cous, tous les despens et tous les damages k'il i aroit u feroit, en-quelconques maniere ke ce fust, por le defaute \11 de sen paiement dusques a sen dit sans autre provance faire, avoec le rente et le painne devantdite; et s'il avenoit cose k'il defalit dou paier de deus paiemens de le rente devant-nomee, ke ja n'aviegne, \12 il renderoit au devantdit Jehan l'Alain u a sen comant por le rente devant nomee trois cens livres de par. dedens les quarante jours ke ciels Jehans li Alains l'en semonroit u feroit semonre et li \13 jours de le semonse est sor le dit Jehan l'Alain; et s'il avenoit cose ke ciels Jehans, li fius monsigneur Evrart d'Aubi, u ses hoirs, se de lui estoit defalit, ne paioit ces trois cens livres au devant \14 dit Jehan l'Alain u a sen comant dedens les quarante jours, ensi ke devant est deviseit, il et li siens et ses hoirs seroit tenus de rendre et de paier a Jehan l'Alain devant nomeit u a sen comant tous \15 les cous, tous les despens et tous les damages k'il i aroit u feroit pour le defaute dou paiement de ces trois cens livres, en-quelconques maniere ke ce fust, dusques a sen dit sans autre provance faire. \16 Et avoec ciels Jehans, fius monsigneur Evrart devantdit, veut et otrie ke Jehans li Alains u ses comans puist doner del sien al signeur de le terre u a baillius u a quel justice k'il vaura, de Sainte Eglise \17 et de loy mondainne, por le sien requere et faire avoir dusques a soissante livres de par., les ques il seroit tenus de rendre et de paier avoec toutes les covenences devantdites; et s'a en-covent ciels Jehans, \18 fius monsigneur Evrart devant-nomeit, ke por deffense ne por ariest de signeur de terre ne por autre persone ne por cose ki aviegne, il ne laira a-paier le rente et toutes les covenences devantdites. \19 Toutes ces covenences, ensi com eles sont chi devant devisees, a en-covent Jehans, fius monsigneur Evrart devant-nomeit, a lui et au sien par tout u k'il l'ait et ke Jehans li Alains u ses comans le puist \20 prendre et faire prendre com le sien dusques a tele covenence ke chi devant est dite. En toutes ces coses, ciels Jehans, fius monsigneur Evrart devant-nomeit, a renonchiet et renonche a toute exception, \21 a toutes bares, a tous privileges ke croisiet ont u aront et a tous autres privileges donés u a doner, a toute aiue de Sainte Eglise et de loy mondainne et a toutes les coses ki aidier u valoir li poroient et au-devant \22 dit Jehan l'Alain poroient grever u nuire; et avoec tout chou, ciels Jehans, fius monsigneur Evrart devant-nomeit, a en-covent par foi et par sairement ke il mis i a corporelment a faire, a tenir et a emplir \23 bien et loiaument toutes ces covenences et chascune d'eles, tout ensi ke devant est deviseit. Et s'est a-savoir ke, apriés le dechiés Jehan l'Alain devant-dit, Jehans, fius monsigneur Evrart devant-nomeit, et ses \24 hoirs et li siens sera quites et delivrés de toute le rente et toutes les covenences devant dites, sauf chou ke toute li rente devant-nomee ait esté bien paie et toutes les covenences devantdites bien tenues, \25 ensi ke devant est dit, toute le vie de celui Jehan l'Alain. A tout chou furent com eschevin Willaumes de Lambres et Willaumes Porcelés ^[1], en l'an del Incarnation Nostre Signeur mil deus \26 cens soissante et dis, el mois de septembre.

Notes de transcription
^[1] Le nom des échevins a été ajouté par la même main ms.