Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe059

1325 (n. st.), 27 février^[a].

Type de document: charte: notification (copie)

Objet: Notification par Alert de Vendlincourt, chevalier, et par Willemet, bourgeois de Florimont, arbitres pour Henri de Porrentruy, chevalier, des conclusions de l’arbitrage prononcé après enquête et accepté par les parties dans un litige entre Henri de Porrentruy, chevalier, et les chanoines de Moutier-Grandval au sujet de la perception de la dîme dite de Saint-Ferréol sur le territoire de Cœuve; et reconnaissance de l’exactitude de cette notification par Guillaume de Glère, seigneur de Montjoie, par Horri de Sonvilier et par Jean d’Asuel, chevaliers, témoins de l’accord.

Auteur: Alert de Vendlincourt, chevalier, et Willemet, bourgeois de Florimont.

Bénéficiaire: Henri de Porrentruy, chevalier.

Support: Parchemin jadis scellé sur simple queue.

Lieu de conservation: AAEB, B 239 Ajoie/80.

Édition antérieure: Publication par J. Trouillat, Monuments…, III, n° 149, p. 255-258 (à la date du 24 mars 1317).

Verso: Ubi decima in Cova debet levari. — Copia terrarum ubi recipimus decimas in Cu^ove (xiv^e siècle).

1 Doné par copie desouz lou seel de lai vicairie de Pourraintruy, lou mescredi aprés les Bordes, l-an de grace courrant par mil trois cens et vint et quatre. 2 C-est li tenours de lai lettre original: 3 \2 Nos, Alers, chevaliers, de Wandelincourt, et Willemez, bourjoys de Florimont, 4 façons savoir ai touz 5 que, comme par lai requeste et lou commandement mon signour lou conte de Pharrettes jornee fuit prise ai Cuve \3 lou domaingedi devant lai mey kareimme quant li ans de Nostre Signour courroit par mil trois cens et dix et sept, par devant les proudomes de lai dite ville de Cuve, pour raisson dou descort qu-estoit entre les cha\4noinnes de Monstier Grant Wal d-une part et mon sire Henri, chevalier, de Pourraintruy, de l-autre part, quar li dit chanoinne disient que li diz chevaliers lour façoit tort et injure en aucunes terres ou lour dyemes que on dit de Saint Fruel de\5voit penre, dou quel descort Jehans, prevost de Pourraintruy en ce temps, fit ai jurier les proudommes dou dit luec suiz lai saincte ewangele ou mostier de Cuve. 6 Et fuit mes sy Nycholas, prevost de Saint Ymier, \6 chanoinnes de lai dite esglisse, enquesterres ai part les diz chanoinnes de Monstier, et d-autre part je, li diz Alers, fuiz mis pour lou dit mon sire Henri; ai lai quele enqueste faire fuit present mes sy Girars de Boue[s]\7cort, chappelleins mon signour le evesque, que y fuit envoiez a dit luec ai part mon signour le evesque. 7 Et trovesmes, par lou raport dez diz proudommes, que li diz mes sy Henris ne lour façoit pez si grant tort comme \8 il deisient et mettient avant. Dou quel descort que nos trovesmes, aprés lou raport as diz proudommes, mise et arbitraiges fuit fais par l-aicort ^[1] dez diz chanoinnes et de mon sire Henri suiz lou dit mon sy Nycholas, \9 et suiz Jehannin de Plujouse a-part les diz chanoinnes de Monstier, et de part mon sire Henri de Pourraintruy suiz nos, Alert, chevaliers, et Willemat, de Florimont. 8 Et est ai savoir que nos, li devant dit arbitres, \10 Nycholas, prevost de Saint Ymier, Jehannins, filz mon sy Cuene de Plujouse, arbitre ai part les diz chanoinnes, Alers, chevaliers, et Willemez, arbitre ai part lou dit mon sire Henri, alesmes d-une part et, aprés lou \11 raport que li gentil homme et li proudomme nos raportirent par lour soirement, nos, li quattre arbitre dessuis dit, aicordesmes entierement, senz havoir descort entre nos quattre, en ceste forme quar, par ainsit \12 comme li diz mes sire Henris recoignuit as diz signours de Monstier lai ou lour dit dyesmes devoit penre son droit et sai raisson, c-est ai savoir as terres ci aprés devisees; 9 premierement en lai terre de Granges; \13 10 item, en lai terre que Louis li Grans tient dou signour de Miserey, c-est ai savoir dou priour; 11 item, en lai terre de Hesuel; 12 item, en lai terre de Schemme Bourne; 13 item, en lai terre de Thaconzel; 14 item, en lai terre Perrin \14 Vaydrel; 15 item, en l-aluef as amfans mon sy Raol, que part ai lai terre Willemin lou Roussat; 16 item, en l-aluef as amfans Reimbal, que part ai lai terre a dit Willemin; 17 item, en l-aluef a dit Willemin lou Roussat, que \15 part as aluef as diz amfans mon sy Raol et as amfans Reimbal; 18 item, en l-aluef Richart lou Forque, que part ai lai terre de Hesuel; 19 item, en trois jornalz de terre que Louis li Grant et sui partaige tiennent a Charmey, \16 et tout li remeignans de lai terre de Cuve doit estre et est, par ainsi comme nos havons trové et aicordé, dou dyeme a dit mon sire Henri. 20 Et est ai savoir que li diz mes sy Nycholas, mes sy Thyechins \17 et li archidyacres de Mussevelier, chanoinne de Monstier, grantirent, en luec de soirement, pour lour et pour tout lou chappittre de Monstier, ai tenir ai touz jours-maix, et tenrient senz courrumpre \18 lou dit acort, et doivent baillier lettres saellees de leur seelz, saellees de lour dit chappittre, a dit mon sire Henri; et li diz mes sy Henris lour en doit aisit doner lettres, par ainsic comme il l-ai recoignu, \19 saellees de son seel. Et ai lai dite jornee et a dit acort faire, furent present mes sire Willames de Gleyre, sires de Mont Joiie, mes sy Holris de Sonvelier, mes sy Jehans de Hesuel, chevaliers, et \20 plusour autre digne de foy; et nos, Willames de Gleyres, sires de Mont Joiie, Holris de Sonvelier et Jehans de Hesuel, chevalier, tesmoignons et recoignesçons par nos bones foys lou dit aicort estre \21 fait a lai dite jornee par devant nos, par ainsi comme li diz mes sire Alers et Willemas lou tesmoignent en ces lettres. 21 En tesmoignaige de lai quele chose, nos, Alers de Wandelincourt, \22 Willames de Gleyres, sires de Mont Joiie, Holris de Sonvelier et Jehans de Hesuel, chevalier, havons mis nos seelz en ces presentes lettres en signe de lai pure verité. Faites et donees l-an Nostre \23 Signour comme dessuis, lou juedi devant Pasquex Flories.

Notes de fiche
^[a] Cet acte est la copie d’un autre, aujourd’hui perdu, daté du 13 avril 1318 (n. st.).

Notes de transcription
^[1] Ainsi coupé: lai cort.