Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe049

1323 (n. st.), 14 janvier.

Type de document: charte: vente en franc-alleu

Objet: Vente en franc-alleu par Gonate, veuve de Vienin, d’Alle, autorisée par Jehannenet, de Courgenay, ancien maire d’Ajoie, son avoué, et avec le consentement de Voillin et d’Huguenin, ses fils, à Richart de Morimont, chevalier, pour 6 l. de bâlois ayant cours au marché de Porrentruy de pièces de terre à Alle.

Auteur: Gonate, veuve de Vienin, d’Alle

Sceau: Louis, curé d’Alle, et conseil de Porrentruy.

Bénéficiaire: Richart de Morimont, chevalier.

Autres Acteurs: Jehannenet, de Courgenay, ancien maire d’Ajoie, avoué de Gonate, Voillin et d’Huguenin, fils de Gonate.

Support: Parchemin jadis scellé de deux sceaux sur double queue.

Lieu de conservation: AAEB, B 239 Ajoie/36.

Édition antérieure: Analyse par J. Trouillat, Monuments…, III, p. 712 (à la date du 15 janvier 1322).

1 Je, Gonatte, femme ça en arrers Viennim, d-Alle, 2 fais savoir a touz 3 que je, non pez losengie, decehue ne menee par force ne par bareit, \2 maix saige et bien avisee et par les los et les bones volentés de Jehannenet, de Corgenay, mayre ce en arrers de Ajoye, voué de moy doné \3 par justisse seant et par leal jugement, et de Voillin et Huguenin, mes amfans, ay vendu et vendoy, a miex que on puet faire vendition \4 et pluis fermement entendre, senz gemais rappeller, pour franc aluef, 4 ai monsy Richart de Morimont, chevalier, et ai ses hoirs pour siex livres \5 de baloys, menoie coursable ou marchie de Porraintruy, les peces de terre que sunt ci aprés escriptes, gesans en la fin et ou territoire d-Alle, \6 c-est ai savoir: en la Maychiere, une pece de prey, Renalz diz Pucins hay d-une part et Willermes diz Penalz hay d-autre part; 5 item, es \7 Noz une pece de prey, Ruedins hay d-une part et li pres que on dit li Pres l-Avesque est d-autre part; 6 item, une oyche gesant de\8souz lou molin que fuit a prevost Bernier, Willemas hay d-une part et li reviere est d-autre part. 7 Les queles siex livres dessus dites \9 j-ay haües et recehuez dou dit monsy Richart, chevalier, en bone menoie bien nombree et de son propre chattel, et mises les ay en mon profit, \10 si que je m-en tien pour bien païe entierement. 8 Des queles peces de prey et de la quele oyche dessus dite je me suis desvestie et \11 me desvest, pour moy et pour mes hoirs, et si m-en suis mise fors de tenure et fors de possession, et lou dit monsy Richart de Mori\12mont, chevalier, et ses hoirs en ay envesti et envest, et si les en ay mis et met en bone tenure et leal et en bone possession pour touz jours-maix \13 par la tradition de ces presentes lettres. 9 Et si ay promis et promat, par mon soirement doné corporalment, suis poinne de estre tenue pour parjure et \14 diffamee evidemment senz autre prueve en toutes cours, et aprés suis l-obligation de touz mes biens moubles et neant moubles, presens ou \15 a-venir, que je encontre ces convenances ne contre ceste dite vendition nen iray ^[1] ne ne feray ai aler par moy ne par autruy, coiement ne en apert, \16 maix lai tenray, aipaisseray, desfandray et guarantiray, pour moy et pour mes hoirs, a dit mon sy Richart, chevalier, et ai ses hoirs, en \17 touz luez et aidez, en toutes cours, en touz jugemens et defors, encontre toutes gens, a mes propres despens et missions, aucune excep\18tion de fait ou de droit non obstant. 10 Et nos, Jehannenez, de Corgenay, vouhez ai la dite Gonatte, par cui main la dite vendition \19 est esté faite, et Wilins et Huguenins, frere, amfant de la dite Gonatte, louons, confirmons et ratefions la dite vendition, et conventey \20 et promis l-avons par nos soiremens ai tenir ai touz jours-maix par ainsi fermement comme il est devant dit et expressé. 11 En tesmoignaige de \21 la quele chose, nos, li devant nommé Gonatte, d-Alle, Jehannenez, de Corgenay, ses vouhez, Voillins et Huguenins, amfant de la dite Gonatte, \22 havons proiie et requis as saiges hommes et vaillans mon sy Loui, curé d-Alle, et a conseil de la ville de Porraintruy que mettent lour seelz \23 en ces presentes lettres; et nos, Louis, curés d-Alle, et li conselz des bourjoys de Porraintruy, es proiieres et es requestes des persones \24 devant nommees, havons mis nos seelz en ces presentes lettres en signe de la pure verité. 12 Faites et donees lou vanredi prochain \25 aprés feste saint Hylayre, l-an de grace corrant par mil trois cens et vint et douz, ou moys de janvier.

Notes de transcription
^[1] Ainsi coupé: ne niray.