Téléchargement du document

Documents linguistiques galloromans
Corpus : docJuBe (chJuBe)
Responsable du corpus : -
Édition de la charte : -

docJuBe013

1307, 25 novembre.

Type de document: charte: vente

Objet: Vente par Cuenneset, fils de dame Machin de Bonfol, et par Matile, sa femme, fille du s^r Aimé de Brémoncourt, avec le consentement d’Henriet, de Jehannenet, de Matile et de Jeannete, leurs enfants, au prévôt et au chapitre de Moutier-Grandval pour 18 l. d’estevenants de tous leurs droits sur les grandes et petites dîmes de Bonfol, soit le sixième des grandes dîmes et le huitième des petites, qu’ils tenaient en fief desdits prévôt et chapitre à raison de deux muids de blé, moitié blé et moitié avoine, de redevance annuelle; et pardon accordé aux vendeurs, à leur requête, par le prévôt et par le chapitre pour le trop-perçu sur les dîmes.

Auteur: Cuenneset, fils de dame Machin de Bonfol, et par Matile, sa femme, fille du s^r Aimé de Brémoncourt

Sceau: Conseil de Porrentruy.

Bénéficiaire: Prévôt et chapitre de Moutier-Grandval

Support: Parchemin jadis scellé sur double queue. Sur l’attache on lit deux lignes de la minute du même acte, correspondant aux lignes 8 et 9 de l’original, écrites de la même encre mais d’un module d’écriture plus petit: « desmes desus di[z de la] dite ville. Lesquex [choses nos havons] tenu [jusques] au [dit jour dou] / [pre]vost et dou chapi[tre de]sus diz pour dix et huyt livres de estevenens ». Et, dans l’interligne « en feu pour .II. muis de blef, moitie blef et avoine ».

Lieu de conservation: AAEB, A 55/36.

Verso: Littera sexte partis decimarum maiorum et octave minorum in villa Bonvol ( xiv^e siècle). — Bonfol ( xiv^e siècle).

1 Nos, Cuennesés, fiz dame Machien de Bonfou, et Matille, femme dou dit Cuenneset et fille mon seignor Heymé de Prevoncourt, \2 de l-eveschie de Besençon, 2 façons savoir a touz 3 que nos, non mie losengie, deceu ne constraint d-aucun, mais sage et bien avisé, et \3 par les loz, par les consen(sen)temens et par les volentez de Henriet, de Jehanninet, de Matille et de Jehannete, noz enfans, vendons, quit\4tons, outrions et delivrons, au miex que on puet faire vendition et plus fermement entendre entre vis, pour dix et huyt \5 livres de estevenans, 4 au prevost et au chapitre de l-eglyse de Monstiers Granz Vaus, de la dyocese de Balle, et a-lor successours \6 tel droit, tele reclamation et tele raison que nos havons, poons et devons havoir et peu havoir jusques au jour de la confection \7 de ces presentes lettres es granz desmes et es menus de la soveraine ville de Bonfou, ce est a savoir la sixte partie dou grant \8 desme et l-uytive partie des menus desmes desus diz de la dite ville. 5 Les quex choses nos havons tenu jusques au dit jour \9 dou prevost et dou chapitre devant diz en fief, chascun an pour douz muys de-blef, moitie blef et moitie avene. 6 Les \10 queles dix et huyt livres de estevenans desus dites nos havons heues et receues dou prevost et dou chapitre desus diz en bone \11 monnoie et bien numbree et de lor propre chatel, et l-avons mis et despendu en nostre profit, si que nos nos en tenons por bien paié \12 entirement. 7 Des quex choses nos nos sommes desvesti, et nos hoirs, pour touz jours-mais, et le prevost et le chapitre desus \13 diz et lor successours en havons envesti et envestons, et les en havons mis en-bone et leal tenure et possession pour touz jours\14mais par ces presentes lettres. 8 Et havons promis et prometons, por nos et por noz hoirs, par noz fois por ce corporelment donees \15 en leu de seirement et sus l-obligation de touz noz biens moebles et non moebles, presens et a-venir, ou que il soient, que nos n-i\16rons contre la dite vendition par nos ne par autrui, coiement ne en apert, mais le attendrons, appaiserons, \17 garantirons et deffenderons au prevost et au chapitre devant diz, pour nos et pour noz hoirs, a-lour et a-lor \18 successors, a touz jours-mais, en toutes cours et en touz leus et en touz jugemenz et defors, contre toutes genz, \19 a noz propres despens et missions. 9 Et sus ce nos lor havons requis et requerons pour Deu nommeement que, se nos \20 havons receu et heu plus es diz desmes que nos ne devons, que il le nos pardonoient. 10 Et nos, li prevoz et li chapitres \21 desus dit, quittons, por nos et pour noz successours, les diz Cuenneset et Matille, sa femme, et lour hoirs, de tot ce que \22 il hont heu et receu jusques au jour de la confection de ces lettres es diz desmes outre raison. 11 Les queles cove\23nences et vendition nos, li devant dit Henriés, Jehanninés, Matille et Jehannete, enfant des diz Cuenneset et Matille, con\24fessons et recognoissons estre faites par noz loz, par noz consentemens et par noz volentez. 12 Et renunçons en cest fait, \25 de noz certaines sciences, nos, Cuennesés, Matille, Henriés, Jehanninés, Matille et Jehannete, a tout barat, a tout de\26cevement, a touz drois, a touz usages, a toutes coustumes, a touz privileges de mariage et de doaile et a \27 touz autres privileges quex que il soient, a l-exception de deception outre la moitie dou droiturier pris, a-l-excep\28tion que nos, Cuennesés et Matille desus dit, n-aiens heue et receue la dite somme d-argent en bone monnoie et bien num\29bree et mise et tornee en nostre profit, a droit qui dit que generax renunciations ne vaut se li especiax ne vait devant, \30 et a toutes autres raisons et esceptions qui nos porroient aidier a-venir contre ces covenences et a noz \31 hoirs, et es devant diz le prevost et le chapitre et a-lor successours nuire. 13 En tesmoignage de la quele chose, \32 nos havons proié a sages homes et honestes, le consel de Porreintru, que il soit tesmoins de ceste chose et que il mete le \33 seel de la ville de Porreintru en ces presentes lettres; 14 et nos, li consels de Porreintru devant diz, sommes tesmoig que \34 les dites covenences et la dite venditions furent faites et confermees par devant nos; 15 pour quoi nos havons mis nostre dit \35 seel en ces presentes lettres en signe de verité. 16 Faites l-an de grace corrant par mil trois cens et sept, le \36 jour de la Sainte Katherine, ou mois de novembre.