Téléchargement du document

Documents linguistiques galloromans
Corpus : chartes de Douai (chDo)
Responsable du corpus : Martin-D. Glessgen
Édition de la charte : Monique Mestayer / Thomas Brunner

chdouai0448

1270, mai. – Douai.

Type de document: charte: déclaration de caution pour dette

Objet: Déclaration de caution par Gérard, bailli d’Oisy, Mathieu de Crécy, châtelain d’Oisy et Landri d’Arleux, prévôt d’Oisy, pour une dette de 627 livres par. due par Enguerrand de Coucy, seigneur de Montmirail et d’Oisy à Jehan, châtelain de Cantin et Enguerran Pilate, bourgeois de Douai.

Auteur: non annoncé, échevins de Douai.

Disposant: Gérard, bailli d’Oisy, Mathieu de Crécy, châtelain d’Oisy et Landri d’Arleux, prévôt d’Oisy.

Sceau: non scellé; devise chirographaire: CIROGRAPHE

Bénéficiaire: Débiteur: Enguerrand de Coucy, seigneur de Montmirail et d’Oisy - Créanciers: Jehan, châtelain de Cantin et Enguerrand Pilate, bourgeois de Douai.

Autres Acteurs: échevins de Douai: Guillaume de Lambres, Sohier le Petit.

Support: Original parchemin chirographe superposé bipartite - partie supérieure.

Lieu de conservation: AM Douai, FF 661/5964.

1 Sacent tout cil-ki-sunt et ki a venir sunt ke Grars, baillius d'Oisi, Mahius de Crechi, castelains d'Oisi, \2 et Landris d'Alleus, prouvos d'Oisy, d[oiv]ent ^[1] et ont en-covent, cascuns pour le tout com se propre dete, pour \3 leur chier signeur, monsigneur [Enger]ran de Couchi, [sig]neur de Mont_mirail et-d'Oisi, a-Jehan, castelain de \4 Cantin, et a Engerran Pilate, bourgois de Douay, .VI. c lb. et .XXVII. lb. de-par. de boine dete et de loial et del-propre \5 catel les bourgois devantdis a-rendre et a-paier dedens le vintisme jour dou Noel ki ert en l'an .LXX. \6isme. Et s'il avenoit cose ke ceste dete n'estoit rendue et paiee as bourgois u al-un d'aus deus u-a-leur \7 hoirs, se d'aus estoit defalit, u a-leur conmant a Douay dedens le tiermine devantdit, li deteur devant \8 li doivent et ont en-covent, cascuns pour le tout, a-rendre tous les cous, tous les despens et tous les \9 damages ke il i-aroient u feroient par le defaute de-leur paiement, en-quelconke maniere ke ce fust, juskes-a \10 leur dis u juskes au-dit de l'un d'aus deus u-de leur hoirs, se d'aus estoit defalit, sans autre provance faire \11 avoec le dete devantdite; et avoec çou li deteur devantdit voelent et otrient ke li bourgois devant \12 dit u-li-uns d'aus deus u leur hoir u leur conmant puissent doner del leur au signeur de le-tiere \13 u a quele justice k'il volront pour cascunes cent lb. de par. de leur dete devantdite a-requere et faire \14 avoir juskes a .XX. lb. de-par. et del remanant de celi dete al-avenant sans les covenences devantdites \15 ramenrir. Et de tout çou faire et tenir, ensi com ci devant est dit, en metent et ont mis li deteur \16 devantdit en droit, en loi et en abandon enviers tous signeurs et enviers toutes justices, tous leur biens \17 et aus et tout le leur u ke il l'aient, en-tele maniere ke li bourgois devantdit u li-uns d'aus deus u leur \18 hoir u leur conmant le-puissent prendre et faire prendre a-aus et au leur et a cascun d'aus pour le-tout, \19 par tout u ke il l'aient, com le leur juskes a-tele covenence ki-ci devant est-dite. Et en toutes ces coses, li \20 deteur devantdit renoncent et ont renonciet a tous previlieges ke croisiet ont u poront avoir et a-tous \21 autres previlieges, a-toutes bares, [a] toutes exceptions ke on poroit contre ces covenences u aucune d'eles \22 faire u proposer tout ausi com [s]'[eles] ^[2] fuissent en cest escrit espriessees, a toutes aiwes de-loi de Sainte \23 Eglise et de loi mondaine, a tous resp[is] de quele persoune ke ce soit et a-toutes les coses ki-d'endroit \24 ces covenences leur poroient aidier [et] [v]aloir et les bourgois devantdis u l'un d'aus deus u-leur \25 hoirs grever u nuire. A ceste covenence furent com eskievin Williaumes de Lambres et \26 Sohiers li Petis ^[3], en l'an del Inca[r]nation ^[4] Nostre Signeur mil .CC. LXX., el mois de may.

Notes de transcription
^[1] Le texte est effacé en quelques endroits.
^[2] Le parchemin est troué.
^[3] Le nom des échevins est d'une autre main ms.
^[4] Le texte est effacé.