Téléchargement du document

Documents linguistiques galloromans
Corpus : chartes de Douai (chDo)
Responsable du corpus : Martin-D. Glessgen
Édition de la charte : Monique Mestayer / Thomas Brunner

chdouai0408

1269 (n. st.), 1^er-23 mars. – Douai.

Type de document: charte: reconnaissance de dette

Objet: Reconnaissance par Robert de Dechy, Mikiel de Le Prée, Jean de Le Val, de Cantin, d’une dette de 32 livres par. envers Pieron d’Auby.

Auteur: non annoncé, échevins de Douai.

Disposant: Robert de Dechy, Mikiel de Le Prée, Jean de Le Val, de Cantin (= mari de Béatrix de Courcelles en 1292? FF666/)

Sceau: non scellé; devise chirographaire: CIROGRAPH-E

Bénéficiaire: Pieron d’Auby, bourgeois de Douai.

Autres Acteurs: échevins de Douai: Gillon Lalain, Jehan Picquette.

Support: Original parchemin chirographe superposé bipartite - partie supérieure.

Lieu de conservation: AM Douai, FF 661/5936.

Verso: C'est couvenence Pieron d'Aubi.

1 Sacent tout cil ki-sunt et ki a venir sunt ke Robiers de Dichi, Mikius de le Pree, Jehans de le Val, de Cantin, doivent et ont en-covent, cascuns \2 pour le tout, a Pieron d'Aubi, bourgois de Douay, .XXXII. lb. de par. de boine dete et de loial si com pour. l. sac de laine ke li bourgois devant dis leur \3 a vendut bien et loialment et par droit pris et creut et delivreit a-aus et a leur conmandement; et bien s'en tienent a sols et a paiet, si com li deteur devant \4 dit recounoissent et ont recounut et dit a-rendre et a-paier toutes ces .XXXII. lb. de par. dedens le jour del-miquaresme en l'an .LXVIIII. isme. Et s'il \5 avenoit cose ke ceste dete n'estoit rendue et paiee au bourgois devant dit u a-sen hoir, se de lui estoit defalit, u a-sen conmant a Douay dedens le tier\6mine devantdit, li deteur devantdit li doivent et ont en-covent, cascuns pour le-tout, a-rendre tous les cous, tous les damages ke il i aroit u feroit \7 par le defaute de leur paiement en-quelconke maniere ke ce fust juskes a sen dit u juskes au dit de sen hoir, se de lui estoit defalit, sans autre provance \8 faire avoec le dete devant dite. Et avoec çou, li deteur devantdit voelent et otrient ke li bourgois devantdis u ses hoirs u ses conmans puist doner del \9 leur au signeur de le tiere u as baillius u a quele justice k'il volra pour se dete devant dite a-requere et faire avoir juskes a .VII. lb. de-par. \10 sans les covenences devantdites ramenrir. Et de çou faire et tenir ^[1] ensi com ci devant est dit, en metent et ont mis li deteur devant dit \11 en droit, en loi et en abandon enviers tous signeurs et enviers toutes justices tous leur biens et aus et tout le leur u ke il l'aient en-tele maniere \12 ke li bourgois devantdis u ses hoirs u ses conmans le puist prendre et faire prendre a aus et au leur et a cascun d'aus pour le tout par tout \13 u ke il l'aient com le sien juskes a-tele covenence ki ci devant est dite. Et en toutes ces coses, li deteur devant dit renoncent et ont renonciet \14 a tous previlieges ke croisiet ont u poront avoir et a-tous autres previlieges et a-toutes les coses ki d'endroit ces covenences leur poroient aidier \15 et valoir et le bourgois devantdit u sen hoir grever u nuire. A ceste covenence furent com eskievin Gilles li Alains et Jehans Pike\16te ^[2], en l'an del-Incarnation Nostre Signeur mil .CC. LXVIII., el mois de march.

Notes de transcription
^[1] temirms.
^[2] Le nom des échevins est d'une autre main