Téléchargement du document

Documents linguistiques galloromans
Corpus : chartes de Douai (chDo)
Responsable du corpus : Martin-D. Glessgen
Édition de la charte : Monique Mestayer / Thomas Brunner

chdouai0395

1268, août. – Douai.

Type de document: charte: vente

Objet: Vente par Boussarde, dame de Belleforière, de 16 livres et demie de rente héritière et de ses droits féodaux en la Couture et ailleurs à Douai à Guillaume Pourcelet.

Auteur: Boussarde, dame de Belleforière, fille de feu Boussart de Bourgehelles, chevalier.

Disposant: Boussarde

Sceau: Sceau de cire verte sur double queue de la dame de Belleforière.

Bénéficiaire: Guillaume Pourcelet, bourgeois de Douai (échevin en 1269).

Scribe: Boussarde dame de Belleforière.

Support: Original parchemin scellé.

Lieu de conservation: AM Douai, 2NC1241, anc. cote: AH Douai, Fonds du béguinage dit des Wetz, n° 892

Édition antérieure: Tailliar, Recueil d'actes des XIIe et XIIIe siècles..., n° 196, p. 296-297. – Espinas, Vie urbaine, t. III, n° 509, p. 384.

Verso: sans

1 Jou, Boussarde, dame de Biele Foriere, jadis fille mon segneur Boussart de Bourgele, chevalier, ki fu, fac savoir a-tous cels ki \2 ces lettres verront et oront ke je ai vendut et werpit bien et loialment a Willaume Porcelet, borgois de Douai, seze livrees et demie \3 de rente de le mounoie de Flandres a-hiretage, pau plus pau mains, seans en le Couture a Douai et alleurs devens le vile et le \4 pooir de Douai, c'est a-savoir en rentes de deniers, de capons, d'auwes, de bleit, d'avaine, de crouees, de un four, de heudes, d'en\5trees, d'issues, de reliés et le justice avoec ke je avoie es lius devant dis; et tous les deniers de cest vendage, je les ai eus et re\6ceus en bone mounoie loial et bien contee et bien m'en tieng apaiet. Et s'il avenoit cose ke Willaumes Porcelés devant nomeis \7 u si hoir ne tenoient et emportoient en bone pais et en quiteit a-tous jours toute le rente et le justice devant dite et il en-avoient \8 paine, coust u damage par-mi u par mes hoirs u par ame de-le miue partie, je li renderoie et seroie tenue de rendre au devant \9 dit Willaume Porcelet u a-ses hoirs, se de-lui estoit defallit, ciunc cens livres de-paresis dedens les quarante jours ke li \10 devant dis Willaumes u ses hoirs, se de-lui estoit defallit, m'en semonroit u feroit semonre; et si jours de-le semonse est sour le dit \11 de celui Willaume Porcelet u sour le dit de sen hoir, se de-lui estoit defallit, et se je ne paoie les ciunc cens livres devant dites ^[1] \12 au termine ensi com ci devant est deviseit, je renderoie avoec les ciunc cens livres tous les cous, tous les despens et tous les \13 damages ke cils Willaumes u ses hoirs, se de-lui estoit defallit, i-averoit u feroit en-quelecunque maniere ke ce fust por le de\14faute de men paiement dusques au dit de celui Willaume u de sen hoir, se de-lui estoit defallit, sans autre provance avoec le \15 dete devant dite. Et avoec tout chou, il poroit douner del mien au segneur de le terre u a baillius u a-quele justice k'il \16 vauroit por cascun cent livres de paresis ki defauroient a-paier de le dete devant dite dusques a vint livres de par., \17 lesquels vint livres je li renderoie avoec toutes les covenences devant dites. Et por toutes ces covenences tenir bien \18 et loialment, ensi com ci devant est deviseit, j'ai obligiet et oblige mi et mes hoirs et mec en-droit, en-loi et en abandon mi et tout \19 le mien u ke je l'aie et averai envers tous segneurs, envers baillius et envers toutes justices ke il le puissent prendre \20 et faire prendre et arrester partout u ke jou et mes hoirs l'arons u averons a-oes celui Willaume Porcelet u-sa-oes ses hoirs, \21 se de-lui estoit defallit. En-toutes ces coses, je renoncie et ai renonciet a-toute exception, a-toutes bares, a toute boisdie, \22 a-tous respis, a-toutes gracies, a-toutes indulgenses, a-tous privileges ke croisiet ont u poront avoir et a-tous autres pri\23vileges, a-toute aiue de-loi crestiene de sainte Eglise et de-loi mundaine et a-toutes les coses ki aidier et valoir me poroient et \24 mes hoirs ausi encontre ces covenences et ki au devant dit Willaume Porcelet et a-ses hoirs poroient grever et nuire. \25 Toutes ces covenences, ensi com eles sunt ci devant devisees, ai jou en covent et promis bien et loialment a-tenir et \26 a-emplir. Et por chou ke ce soit ferme cose et estaule et bien tenue, jou, Boussarde, dame de Biele Foriere, jadis fille \27 mon segneur Boussart de Bourgele, chevalier, ki fu, ai ces presentes lettres seelees de men seel. Ce fu fait en l'an \28 del Incarnation Nostre Segneur mil deus cens et soissante wit, el mois d'aoust.

Notes de transcription
^[1] sfinal au-dessus de la ligne.