Téléchargement du document

Documents linguistiques galloromans
Corpus : chartes de Douai (chDo)
Responsable du corpus : Martin-D. Glessgen
Édition de la charte : Monique Mestayer / Thomas Brunner

chdouai0394

1268, juillet. – Douai.

Type de document: charte: confirmation de vente

Objet: Confirmation par Jean Verdel, bailli de Douai, de la vente par Gautier, châtelain de Douai, des droits de forage sur les boissons fermentées à la ville de Douai.

Auteur: Jean Verdel, bailli de Douai et de Pévèle.

Disposant: Jean Verdel.

Sceau: Sceau de cire verte sur double queue du bailli comtal Jean Verdel.

Bénéficiaire: Gautier de Douai - Les échevins et la ville de Douai.

Autres Acteurs: Marguerite de Flandre (mandement) - Pairs de Gautier: Baudouin d'Auberchicourt, Wion de Montigny, Alart de Wastines, Baudouin de Lambres; ses hommes: Jean de Deuwieul, Olivier Petit-Dieu, Belin Piet d'Argent, Alart d'Auchy et Colart de Beaumont. - Jean son frère (accord).

Support: Original parchemin scellé.

Lieu de conservation: AM Douai, CC 167.

Édition antérieure: Espinas, Vie urbaine, t. III, n° 507, p. 380.

Verso: VI^a. Lettre du bailliu de Douay seur che meismes vendage des forages.

1 A tous cels ki ces letres verront et oront, jou, Jehans Verdeaus, baillius de Douay et de Peule, faic savoir ke je ai eues et \2 rechutes les letres patentes me tres-chiere, tres-noble et tres-haute ^[1]-dame Margherite, contesse de Flandres et de Haynau, seelees de sen \3 seel, en tele forme et en teles paroles: Margherite, contesse de Flandres et de Haynau, a Jehan Verdiel, son balliu de Douai, salus. Nous vous mandons et vo\4lons ke vous de par nous recevés a loi le werp del forage de Douai, c'est a-savoir des cervoises, des goudales, des miés et des brais des torieles ke me sire \5 Watiers de Douai tient de nous en Douai, del apertenance de le castelerie de Douai lequele il tient de nous; et en ce forage, metés bien et a loi nos eschievins \6 et le conmunité de nostre vile de Douai a-tenir delivrement, sans nul service de fief, et a che faire nous vous metons en nostre liu, sauve nostre service et nos droi\7tures, en toutes coses par le tesmoignage de ces letres ki furent donees l'an del Incarnation mil .CC. soissante wit, le jour Saint Piere et Saint Pol. \8 Or faic a-savoir ke jou fui presens el liu me dame le contesse devant dite, par ses letres devantdites, la u me sire Watiers de Douai devantdis vendi et \9 werpi bien et loialment as eschievins et a toute le conmunité de le vile de Douai, tous les forages ke il avoit u avoir pooit el pooir et en le vile de Douai, \10 si cum de miés, de goudales et de cervoises et tout le droit ausi ke il avoit u pooit avoir es brais des torieles de Douai, a-tenir toutes ces coses perpetuelment; \11 et conut me sire Watiers devantdis ke cest vendage, il li covenoit faire por besoigne loial u pieur vendage, se cestui n'eust fait, et che monstra il et prova devant \12 les homes me dame le contesse devantdite, ses peirs, ki ensi le tesmoignierent; et conut ausi ke il avoit eus et recheus tous les deniers de cest vendage et \13 de cest marchiet et bien s'en tiunt apaiet. Tous les forages et les brais des torieles devantdites, me sire Watiers devantdis aporta et mist en me main a \14 oes les eschievins et le conmunité de le vile de Douai, devant les homes et les peirs de mon segneur Watier devantdit, c'est a-savoir mon segneur Bauduin d'Obrecicort, \15 mon segneur Wion de Montegni, mon segneur Alart de Wastines, mon segneur Bauduin de Lambres, Jehan de Devioel, Olivier Petitdiu, Belin Piet-d'argent, Alart d'Auchi \16 et Colart de Beaumont, liquel disent par men conjurement, par droit, par loi et par jugement ke me sire Watiers devantdis estoit issus bien et par loi des forages et \17 des brais des torieles devantdites, sauf les douaires ke me dame Jehane, li mere mon segneur Watier devantdit, et me dame Jehane, se feme, i-poroient avoir \18 en alcun tans; et por ces douaires, s'il escaoient, me sire Watiers devantdis en-fist about de tant ke les dames devant nomees u li une d'eles en leveroient de ces \19 coses par raison de douaire u par porveance, dusques a cinquante livrees de rente par an a le monnoie de Flandres sor tout le remanant de le castelerie de Douai de \20 quoi il estoit ahiretés; et l'aporta tout et mist en me main a-oes les eschievins et le conmunité de le vile de Douai par devant les homes devant nomeis, liquel disent par men \21 conjurement ke cis abous dusques a ces cinquante livrees de rente estoit bien fais et par loi. Tout cest vendage et cest marchiet et cest about loa et grea me \22 sire Jehans de Douai, frere mon segneur Watier devantdit, et aporta toutes ces coses et mist en me main a-oes les eschievins et le conmunité de le vile de Douai par \23 devant les homes devant nomeis liquel disent, par men conjurement, ke me sire Jehans devant-dis avoit tout chou fait bien et a loi et fiancierent et jurerent \24 sor sains me sire Watiers et me sire Jehans, ses freres, devant nomeit ke il jamais, a nul jour, ne demanderoient ne clameroient riens en ces forages ne en ces \25 brais des torieles devantdites et ke l'about ausi il tenroient bien et loialment, tout ensi ke chi devant est deviseit, et ke il ne queroient ne feroient quere jamais ^[2] \26 a nul jour art, engien, cause ne matere, par als ne par autrui, par quoi li eschievin et li conmunités de le vile de Douai en fust nuisie et agrevee en nulle maniere. \27 Et jou, par l'ensaignement des homes devant nomeis, portai et mis tout cest vendage, cest about et toutes les coses devantdites en le main des eschievins, a-leur \28 oes et a-oes toute le conmunité de le vile de Douai, sans nul service de fief, tout ausi avant k'il est contenut es letres me dame le contesse devantdite ki chi devant \29 sunt devisees, liquel home devant nomeit disent par men conjurement ke li eschievin et toute li conmunités de le vile de Douai estoient entré en toutes ces coses \30 bien et loialment et bien ahireté et par loi. Et si eut en-covent me sire Watiers devantdis ke il prieroit et requeroi a me tres-chiere et très-noble dame le con\31tesse devantdite ke ele loast, approvast et confermast tout cest marchiet et toutes les coses devantdites et ke ele en-donast as eschievins et a-le conmunité \32 de le vile de Douai ses letres patentes seelees de sen seel. El tesmoignage de toutes ces coses, jou Jehans Verdeaus, ballius de Douai et de Peule devant \33 nomeis, ai ces presentes letres seelees de men seel. Che fu fait en l'an del Incarnation Nostre Segneur mil .CC.LX. wit, el mois de julié.

Notes de transcription
^[1] Les lettres aude hautesont écrites sur un grattage et le ta été retracé.
^[2] sfinal de jamaisau-dessus de la ligne ms.