Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh162

1344, 2 janvier.

Type de document: charte: donation

Objet: Donation par Louis de Neuchâtel à Catherine, sa femme, du château de Châtelard et de tout ce qu’il a aux Bayards, à l’exception du fief du seigneur de Joux. Cette donation fait suite à la vente par Louis de Neuchâtel à Thibaut de Scey, pour 3500 florins, de l’héritage et du douaire de Catherine. Il perçoit cette somme pour lui et pour les enfants qu’il a eus avec sa première femme, Jeanne de Montfaucon, en raison des pertes qu’il a subies lors des batailles qu’il a menées contre Henri de Montfaucon-Montbéliard. Si la donation ne vaut pas 400 livrées de terre, Louis lui octroiera plus biens.

Auteur: Louis de Neuchâtel.

Disposant: Louis de Neuchâtel.

Sceau: sceaux de Louis de Neuchâtel, de Jean [II] de Chalon et de la cour de Besançon.

Bénéficiaire: Catherine de Neuchâtel-Blamont.

Autres Acteurs: Thibaut de Scey; Othon de Vaumarcus, Guillaume et Jean de Vautravers, témoins.

Rédacteur: Perrin de Doubs.

Support: Parchemin cancellé, scellé de trois sceaux sur double queue.

Lieu de conservation: AEN, H8 n° 15.

Édition antérieure: Publication par G.-A. Matile, Monuments…, n° CCCCLXIV, p. 528-530. Analyse par H. Jéquier, Le Val de Travers..., p. 213.

1 Nos, Loys, cuens et sires de Nuefchastel, 2 façons savoir a touz 3 que, comme nous et nostre amee compaigne, dame Katherine de Nuefchastel, nostre fome, ayens vanduy, quittey, outroié, bai\2llié ou auxi et delivrey, pour nous et pour noz hoirs, perpetuelment, a nostre amey cusin, monseignour Thiebaut de Ceix, chevalier, achetant, pour luy et pour ses hoirs, a tout-jors-mais, pour le pris \3 de trois mille et cinq cenz florins de Florance de bon or et de leal poys a nous paiez, les choses ci aprés escriptes et devisees, qu-estoient de l-erietaige et mariaige de la dite dame \4 Katherine, nostre fome, c-est assavoir: 4 le chastel et fortalice de Vers, pres de Salins, ensamble la ville de Vers, les estans, molins et boys, et les villes du Val de Nant et la ville \5 dou Traffey, et ce que nous haviens, pouhiens ou daviens havoir en la ville du Paquier, ensamble toutes les autres choses, rantes, proffit et emolument appartenant es diz chastels \6 et chastelenie de Vers, en homes, tailles, meix, maisons, cultis, chasals, terres, prees, champs, fours, molins, aigues, estans, boys, paquiers, fyez, rierefyez et en toutes autres choses, quelles que \7 ales soient, exceptez le fyé des dites choses vandues, le quel fyez nous havons retenuz a nous et noz hoirs, per ensinc comme il est plux plenierement contenuz es lettres sour la dite vendition faites, \8 les quelles ha riere soy li diz messire Thiebauz. 5 Nous confessons et coignessons en veritey la dite some de florins estre conversee enterement ou profit de nous, Loys, et de noz anfanz, neez et procreez de nostre \9 bien amee compaigne et fome, dame Jehanne de Montfalcon, ça en arriers nostre fome, cui Deux pardoint, pour la guerre et dissension que nous havons ehu et encores havons contre monseignour Henri, seignour de Mont\10falcon, et ses aydanz et complices pour mantenir et recovrer le droit, raison et herietaige de noz diz anfanz envers le dit seignour de Montfalcon. 6 Pour quoy nous, non vuillanz la dite Katherine, \11 nostre fome, estre decehue, baretee ne deffraudee, et son herietaige et mariaige non estre descrehu per nous, en recompensation et pour eschainge des dites choses vandues, avons doney, outroyé, \12 quittey, baillié ou auxi et delivrey, donons, outroyons, quittons, baillons ou auxi et delivrons, pour nous et pour noz hoirs, perpetuelment, a la dite Katherine, nostre fome, present, acceptant et agreant, pour lei \13 et pour ses hoirs, a tout-jors-mais, nostre chastel et fortalice du Chastelar de Valtraver et toutes les villes appartenant et adjacent a dit chastel et chastelenie du dit leu du Chastelar, \14 ensamble les fond, pertenances et appandises des dites villes, en boys, preez, champs, terres, fours, molins, aigues, paicheries, tailles, prises, homes, censes, demes tierces, getes, corvees, \15 piaiges, amandes, justices, signorie, fyez, rierefyez, fruz, provent, rantes, yssues, droz, profit et emolumenz du-dit chastel et chastelenie du Chastelar et des villes et leux appartenant et adjacent \16 a y-celx, ensamble mere et mixte impere et toute juridition, et generalment tout ce que nous havons, pouhons et davons havoir dois le leu que l-on dit Boyheart jusques au leu qu-est appellez la Clu\17sate, ensinc comme il s-estandent de lonc et de large, sanz riens excepter ne retenir es diz leux, saul toute voye et exceptez le fyé dou signour de Jour, le quel fyez du signour de Jour \18 nous havons retenu et retenons a nous; 7 dou quel chastel du Chastelar, dois le dit leu de Boyheart et de toutes les villes et choses appartenant et adjacent a dit chastel et chaste\19lenie du dit leu du Chasteler, dois le dit leu de Boyheart jusques a la Clusate, ensamble toute lour appartenances, exceptez le dit fyez du signour de Jour, nous, pour nous et pour noz \20 hoirs, nous sumes desvetuz, et la dite Katherine, pour lei et pour ses hoirs, perpetuelment an avons envestu et mis en possession corporel ou auxi d-ycelx 8 per tel menere et condition que, ses ces choses \21 que nous li baillons ne vailloient quatre cenz livrees de terre a estevenans, nous li avons promis et promettons, pour nous et pour noz hoirs, essigner et parfaire autre part en nostre terre au plus pres \22 du chastel et chastelenie du Chastelar. 9 Promettans, pour nous et pour noz hoirs, per nostre sairement pour ce corporelment doney sour saint evvangiles et sour l-obligation de nous, de noz hoirs et de touz \23 noz biens, ces choses tenir, garder et acomplir fermement, enterement et effectuelment, sanz venir encontre, et d-ycelles porter leal garantie et appaisement a la dite Katherine \24 et es hoirs et cause aihanz d-ycele contre touz adés et en touz leux. 10 Renunceanz, pour nous et pour noz hoirs, en cest fait, per nostre dit doney sairement, a toute exception de mal, de baret, \25 de lesion, de circonvencion et action en fait, a la condition sanz cause ou pour injuste ou moins soffisant cause, a benefice de restitition en entier, a l-exception de deception d-outre \26 la moitié de juste pris, a ce que nous ne puissiens dire ne proposer autre chose estre faite et autre escripte, a touz privileiges donez et a doner, a touz statuz, usaiges et costumes \27 de pahis, et a toutes autres exceptions, raisons, deffenses et allegations de fait, de droit et de costume que porroient estre opposees contre ces lettres ou cest fait, et per que ces lettres \28 et les choses contenues en ycelles pourroient en tout ou en partie estre quassees ou adnullees, et au droit disant general renunciation nom valoir. 11 En tesmoignaige \29 de la quel chose, nous avons mis nostre seel en ces lettres. 12 Et pour plus grant segultey estre a la dite Katherine des dites choses, nous h[a]vons supplié et requis noble \30 home et puissant, monsignour Jeham de Chalon, signour d-Arlay, nostre chier seignour, que il, comme sires du fyez, es choses dessus escriptes et devisees, et chescune d-ycelles, se \31 consente et yceles louhoit, ratiffioit, confermoit et approvoit, et son seel mette en ces lettres, et auxi avons requis et requerons honorable et discrete persone, l-official \32 de la court de Besançon, a la juridition et cohertion de laquel court nous nous sumes submis et submettons quant a tenir, garder et acomplir enterement et en effait les dites \33 choses, per Perin de Doub, notaire de la dite court de Besançon, jurez, que en ces lettres mette le seel de la dite court de Besançon. 13 Et nous, Jehans de Chalon, sires \34 d-Arlay, es dites choses, comme sires du fyez, nous sumes consentiz et consentons, et ycels choses louhons, ratiffions et approvons, et des dites choses promettons, comme sires dou \35 fyez, la dite dame Katherine et les siens faire et leissier johir et exploitier, saul tout jours le droit de nostre fyez, et, a la priere et requeste dou dit monsignour Loys, a\36vons mis nostre seel en ces lettres ensamble le seel de la court de Besançon et le seel dou dit monsignour Loys. 14 Et nous, officiaux de la court de Besançon, a la requeste dou \37 dit monsignour Loys, a nous faite et reapportee per le dit notaire, jurei de la court de Besançon, nostre commandement expecial, au quel nous avons commis et commettons quant a-ce noz \38 voiies et nostre puissance, per devant le quel notaire, nostre commandement, li diz messire Loys, pour ce en droit personelment estsaubliz, ay confessey et publiement recognehu en droit \39 les dites choses estre veraies et ensinc estre faites, avons mis en ces lettres, a la relation de nostre dit commandement, le seel de la dite court de Besançon ensamble les \40 seels des diz monsignour Jeham et monsignour Loys. 15 Fait et donné le second jour dou mois de janvier, l-am Nostre Seignour mil trois cenz quarante trois, presanz a ce monsignour \41 Otthe de Valmarquul, monsignour Guillame, monsignour Jeham de Valtraver, chevaliers, et plusieurs autres tesmoings a ce expecialment appelez et requis. 16 P. de Dubio. Sic est.