Accueil>Les corpus textuels>Charte chNCh157

Accueil

Descriptif du projet

Les corpus textuels

Interrogations linguistiques
[vers une autre interface]

Contact

 

Choix d'édition

édition critique
édition interprétative
édition diplomatique

Montrer la structure rhétorique

non
oui

   

Téléchargement du document

fichier xml fichier pdf

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh157

1338, 5 mars.

Type de document: charte: testament

Objet: Testament de Rodolphe [IV] de Neuchâtel établissant son fils, Louis de Neuchâtel, héritier.

Auteur: Rodolphe [IV] de Neuchâtel.

Disposant: Rodolphe [IV] de Neuchâtel.

Sceau: sceaux de Rodolphe [IV] de Neuchâtel, de Louis de Neuchâtel, de l'abbé de l'Ile, de l'abbé de Fontaine-André, du prévôt et du chapitre de Neuchâtel, de Henri de Colombier et d'Othenin de Vaumarcus.

Support: Parchemin scellé de huit sceaux sur double queue; celui de R. de Neuchâtel est perdu et il ne reste qu’un fragment de celui d’Othenin de Vaumarcus.

Lieu de conservation: AEN, M5 n° 26.

Édition antérieure: Publication par G.-A. Matile, Monuments…, n° CCCCXIX, p. 455-459. Analyse par H. Jéquier, Le Val de Travers…, p. 212.

 1 [Chrismon] A nom dou Pere et dou Fis et dou Seint Esperit, amen. 2 Je, Roul, cons et sires de Nuefchastel, 3 par la grace de Deu sans de memoire et de pensee, regardant et considerant les cas de fortune que nyon ne sat le jor ne l-oure que il \2 doit trapasser de cest seigle; et, pour ce, je, non mie volant deffaillir et deffenir sein faire testement, je fais et ordenois mon testement et ma derriere volontez et ordenois de mes biens moubles et non moubles \3 en la maniere ciz aprés devisee. 4 Premierement, je recoman m-arme a Nostre Signour Jhesu Cript, mom creatour, quant ele partira de mom cors, et mom cors comande sevelir en l-egliese de Nostre Dame de Nuefchastel entre la \4 tombe ou giesent mes pere et ma mere et le usselet dever la cloistre. 5 Item, je establi et foi mon hoirs universaul de totz mes biens moubles et non moubles et heritage de ce que je ne ordinerai en cest mien testement \5 et derriere volontez ou en codecille, se je le façoie, Loys, mom fil, chevalier, ou ses hoirs de som cors, de leaul mariage, se ensi estoit que li dit Loys deffaillit devant moi. 6 Aprés, je vuil et coman que li dit Loys, \6 mes hoirs, soit tenuz de paier totz mes debtz, tot mes lais, et de apaisier tot mes clains et cels ausi de dame Elyenor, de bone memoire, zay en arrier ma fome et mere dou dit Loys, si ensi estoit que je ne l-aie fait \7 appaisier en mon temps. 7 Item, je done, laise et outroie a Margarete, ma fillie, fome de monsi Hugue, conte de Boeka, aprés mom descels, en nom de mariage tant pour som partage, droit et porciom que ele pout \8 havoir ou doit en tot mes biens et de dame Elyenort, zay en arrier ma fome, sa mere, soient moubles et heritages, que pour doux mile et vint livres blanche monoie que je paioi monsi Althemant, \9 conte de Kuiburg, zay en arrier som mari, les queles je hai recovrees de monsi Eberart, frere dou dit conte, mom chastel de Budri ensemble tote la chatelenie, ma vile de Montissilliom et ma vile de Budevillier \10 et les appendises et pertignances de celes, juances, fruit, issues, juridicions, mandement, mere et mixte impere des dit chatels et viles, exceptez les fiez et les homages des gentils homes des dites chatele\11nie et viles, les quels je vuil que remaignent a mom hoirs desus dit, saul ce que je vuil et ordine que se li dit messi Hugues, cons de Boeka, deffailloit de cest seygle ancés que je, que ma dite fillie haie l-omage \12 ou quel m-est tenuz messi Henri de Colombier, chevalier, tandix que ele seroit sein mari, et non plus. 8 Item, vuil et ordene que ma dite fillie ou ses maris des choses desus dites entroit en la foi et en l-omage \13 dou dit Loys, mom fis et mom hoirs; 9 et vuil et ordene que li dit Loys, mes fiz, ou sis hoirs, totes les fois que il porront ou voudront, haient et puissent havoir le dit chatel, viles et apartignances pour \14 le priez de cinc mile livres de monoie blanche, c-est assavoir le gros tornois pour vint et doux deniers de la dite monoie, en tel maniere que totes fois que il paieront a ma dite fillie cinc cent livres de la \15 dite monoie ou plus que pour chescones cent livres paies retornoient et revieignent au dit Loys ou a ses hoirs diex livrees de terre de rente de la monoie desus dite des yssues et des rentes des dit \16 chatel, viles et apartignances, et li dit chatel desmoroit a ma dite fillie et a ses hoirs tan-que a tant que il soient paié entierement des cincz mile livres desus dites. 10 Et vuil, ordine et comant que ou cas \17 que ma dite fillie ne hauroit hoirs leaul naturaul de som propre cors, que li dit chatel, viles ensembles les pertignances desus dites et tot li meilliorement repairoit et vieigne au dit Loys ou a ses hoirs franche\18ment aprés le descels de ma dite fillie, exceptez que je vuil et ordine que ele puisse ordiner sus les dites choses tam pour le remeide de s-arme que pour reguierdoner a ses servant tanque a la value de mil livres \19 de la dite monoie par une foi; ou se des dites cinc mile livres estoit fait paiement en tot ou en partie, je vuil et ordene que li dit argent paiez repairoit au dit Loys ou a ses hoirs, exceptez les mil livres \20 desus dites. 11 Item, vuil, ordine et coman que li dit mess. Hugues, cons de Boeka, ne entroit en mom dit chatel de Budri ne ne joie ne hait profit des choses ne des biens des dit chatel et viles ne des apartig\21nances par lui ne par sa maignie ne par autrui tanque a tant que il hait parfait et acomplir intierement a ma dite fillie, sa fome, les covenances que il ha des donacions que il ha promis de faire, par ensi come il est contenuz \22 en om escript, seelez dou sel dou dit conte et dou mien, que fut fait ou faire le mariage de lui de ma dite fillie; et en cest cas, je vuil et ordine que Loys, mes fiz et mes hoirs, ou sis dit hoirs, bailleient et delivroient \23 chescom anz a ma dite fillie cent livres de la dite monoie des rentes et des yssues de la chatelenie et vile dessus dites pour faire ses necessitees, en tel maniere que ele n-ent puisse rien doner au dit conte, som \24 mari; et ou cas que li dit cons haura acomplir a ma dite fillie les covenances desus dites, je vuil et ordine que il haient et usoient des dit chatel, viles et rentes par la maniere desus devisee. 12 Item, done et \25 outroie a ma dite fille tote ma vasselemente d-argent, tant copes, anas que gobelet, et la corroie que fut ma dame ma mere. 13 Ancor vuil et ordene que li morguemgapt et les retenues de celui et les retenues ausi de \26 l-assise que li fut faite par le conte de Kuibur, som mari zay en arrier, et par som frere, que y est maintenant, pour l-argent que je li havoie paié dou mariage ma dite fillie, li soit saul, et tot li profit ausi qu-en pourroit \27 issir, exceptez les does mile et vint livres desus dites; et que mes hoirs desus dit ne y puisse rien contrater ne demander. 14 Item, vuil et ordene que Sybeleta, ma sour, hait pour tot som droit que ele pout havoir avoique moi \28, moubles et heritages, cent livres de terre chescom anz de rente de monoie cursable a Nuefchastel, des queles cent livres ele puisse ordiner a sa volontez pour l-ordinaciom de s-arme, de moy et de noux devantiers \29 tanque a la value de sexante sol de rente chescom anz, et li remaignent aprés le descels de ma dite sours retornoit a mom hoirs desus dit, signour de-Nuefchastel. 15 Item, vuil et ordine que mes sours, c-est assavoir dame \30 Agnex, nonne dou Sauvement, et Nichole, nonne de Baumes, soient paies chescom anz sus mom piage de Vautravert entierement de ce que lours est outroiez, assitez et promis par les termines devisez en lours lettres. 16 Et \31 a ce faire, je vuil et ordine que li piagieres, qui est ore et que seroit par le temps a-venir, soit estroint par som soirement et en som peril de paier mes dite sours par la maniere desus devisee; et a cis soirement \32 faire affaire es dit piagiours, que par le temps seront, je estroin mom hoirs en tel maniere que il les controingne dou faire; et ou cas que li piagieres ne le faroit ou porroit, je estroin mom hoirs a ce faire et a \33 paier. 17 Item, je done et laisse a chescone de mes dites does sours, nonnes, diex livres pour achiter rentes a lay chescone de som mostier, en tel maniere que chescone joie la dite rente a sa vie, et aprés lours descels les \34 dites rentes desmoroient es mostiers desus dit perpetuaulment pour aniversaire faire pour le remeide de mes dites sours, de moi et de noux ancessiours; et se rien estoit retenuz dou temps passez, je vuil que lours \35 soit paié et rendu. 18 Item, vuil et comant que l-om paioit a l-abaie de l-Ile lours censes et les retenues des terres que je tien, que cil de l-Ile dient que mouvent de lours; et ou cas que il seroit trovez que il haroient es dites \36 terres plus grant droit que les cens, je-vuil et coman que raisom tot de plaint lours soit faite de ce et de totes autres auctions que il haroient a nous. 19 Item, je vuil et coman que se li testement ma dame ma mere \37 n-estoit acomplir devant mom descels, que mis hoirs le complessent. 20 Item, done et laisse au chapitre de l-egliese de Nuefchastel sexante sol chescom anz de rente de monoie cursable a Nuefchastel, a pain et a vim, les quels \38 je lours assigne et assite sus mes censes de Nuefchastel, que se leivent a la Saint Martim, tanque a tant que mes hoirs lours assignoient autre part, pour faire mom aniversaire chescom anz en la dite ygliese; les quel sexante sol je vuyl \39 et ordone que soient devisez entre les chanoinnes que seront present es vigiles et a la messe et es obseques de mom aniversaire en tel maniere que li dit chanoinnes que ne seront es dites vigiles perge la moitié de sa por\40ciom et que ne seront es messes et es obseques perde l-autre moitiez, et entre les autres chanoinnes que seroient present soit despartir, se ensi n-estoit que necessitez les escusat. 21 Item, done et outroie au dit chapitre sexante sol par \41 ant de rente pour les aniversaires mes oncle, zay en arrier mons. Jeham et mons. Richar, prevost de la dite ygliese, affaire perpetuaulment. 22 Item, done et outroie au dit chapitre pour aumona cent sol par une foi; 23 et vuil \42 et outroie que a chesque chanoinne et presvoire qui seront au premier jor de mes obseques soient donez trente deniers par une foi, item au septieme jor et ou trentenier et a mom premier aniversaire a chesque chanoinne et \43 a chesque presvoire soient donez doze deniers. 24 Item, done et outroie es chapeleins de la dite ygliese de Nuefchastel cinc sol de rente de la monoie desus dite a despartir entre lours le jor de mom aniversaire. 25 Item, done et outroie \44 a l-auter de-Sein Guillame tres sol chescom anz de la monoie desus dite, en tel maniere que par le dit chapitre ne soit fait point de diminution des dit tres sol. 26 Item, done et outroie a l-abaie [1] de Fontanne André cincz sol de \45 rente de la dite monoie. 27 Item, done et outroie a l-abaie de l-Ile cincz sol chescom anz de rente. 28 Item, au priorez de Corzales tres sol de rente. 29 Item, done et outroie au priorez de Bevaz tres sol chescom anz de rente de la monoie desus dite. 30 \46 Item, done et outroie a l-abaie dou lai de Jours cincz sol chescom anz de renta de la monoie de Losanne. 31 Item, done es Chartrosseins de la Lance cinc sol los. de rente. 32 Item, au priorez de Vautravert cinc sol de rente de estevenen. 33 Item, \47 vuil et ordine que en l-auter monsignour Saint Piere en la dite ygliese de Nuefchastel soit establi om chapelein que chantoit aut dit auter en l-onour de mons. Saint Piere tres fois la semanna pour le remeide des armes de moi, de \48 ma fome et de noux ancessiours, en tel maniere que il soit tenuz de servir et de officier en la dite ygliese ensi come li autres chapeleins establis en la dite ygliese; auquel chapelein je done et assigne dos muis de \49 froment chescom anz de rente sus mes molins de Nuefchastel et om muys de vim chescom anz de rente, le quel je assigne sus le terrage de Nuefchestel, et vint sol de renta, les quel je li assigne sus les cens de Nuefchastel, \50 que se loivent a la Saint Martim, de la monoie corsable a Nuefchastel desus dite, ensemble les choses que ma dite fome ha donez en sa vie au dit auter; et vuys que li collaciom et donaciom de la dite chapelenie soit et desmoroit perpetu\51aulment a moi et a mes hoirs. 34 Item, done et outroie es malades de l-ospitaul de Nuefchastel dos sol de rente. 35 Item, done et outroie a l-ouvra de l-egliese de Hengolom sexante sol une foi. 36 Item, done et outroie es freres preigiours \52 de la Magdeleinne de Losanne pour om conrept sexante sol par une foi. 37 Item, es freres menours de Losanne, quarante sol une foi. 38 Item, es freres menours de Fribor, quarante sol une foi. 39 Item, es Augustins dou dit luec, quarante sol une \53 foi. 40 Item, done et outroie a chescom curiez estant de la blanche ygliese tanque a Saint Albim vers Vaulmercuy et ou Vaul de Ruel et en Vautraver et a Saint Nicholai de Miejour trente deniers une foi, a paier le jor de mom obit, \54 soient a mes obseques ou non, en tel maniere que chescom soit tenuz en s-egliese de celebrer l-office de mes obseques. 41 Item, vuil et ordine que li diemes des novalis de Vautraver, es quels je havoie mis la main, soient renduz \55 et delivrez au dit priour de Vautravert, exceptez les diemes des quels descort et controversiom est entre le signour de Jour et le priour desus dit. 42 Item, assigne et assite tot les deniers de rente chescom anz desus nommez, \56 donez es yglieses, li quel ne sunt desus assignez sus les censes des deniers, li quels nous sunt dehuz a Nuefchestel a la Saint Martim d-yver. 43 Item, de cest mien present testement et derriere volontez je requier, eslise \57 et foi mes executours redotez pere en Nostre Signour, mom chier signour mons. l-avesque de Losanne et religiouse et honeste persone l-abel de l-Ile, de l-ordre de saint Benoit, et venerable et discrete persone \58 le prevost de l-egliese de Nuefchestel, qui sunt ores et qui seront par le temps a-venir, es mains des quels mes executours ou de cels ou de celui qui le fas et la charge de cest mien present testement et derriere \59 volontez mener a execuciom recevroit en lours, je laisse, baille et delivre tot mes biens moubles et non moubles, present et avenir, ou que il soient, puissent estre trover et quelque il soient, pour ocuper, deman\60der, panre, lesver, recevoir, vendre, destraire et aliener, sein offense de droit ne de juge, mas de lours propre auctoritez, por mener a execuciom bien et leaulment totes les choses desus dites. 44 Et vuil et comant que \61 se li trois executours desus dit ensemble ne pohoient ne voloient vaquer et faire ceste moie execuciom, que li dui ou li om de lours menoit bien et leaulment a execuciom totes les choses desus dites; et que serat \62 menez a execuciom des dites choses contenues en cest mien present testement par les doux ou par l-om des trois mes executours, je vuil que il vaille et soit estables ansi com si il estoit menez a execuciom par tot les trois mes \63 executours ensemble devant nommez. 45 Et cest mien present testement et derriere volontez, je vuil que il vaille par le droit de testemant noncupatiz ou par droit de testement fait sollempnaulment et secundum canonicas sanctiones. 46 \64 Et si par aucone cause obliee, trapassee ou preterite, present ou a-venir, ne valoit, je vuil que il vaille par droit de codicelles ou par autre quecunque maniere et cause de testement et derrehanne volontez, pohut et dehut valoir \65 de fait, de droit, de canon, de cuistime ou de estatuz de païs, emplorant en cest cas totes les benignitez que a testement ou a derriere volonter tenir, garder et acomplir, et a mes testatours pohut valoir et \66 aidier; et en ce je rebote et mest fours totes les rigours de droit. 47 Et por ce que ce soit ferme chose et estable, je ai mis mom sel pendant en cest mien present testement et derriere volontez, et hai pro\67iez et requis Loys desus dit, mom fil, les devant dit abbel de l-Ile, l-abbel de Fontanne Andree, le devant dit prevost et le chapitre de la dite ygliese de Nuefchastel, mons. Henri de Colombier, chevalier, \68 et Othonim de Vaulmercuy, escoier, que il mestent lours sels en cest mien present testement et derriere volontez avoique le mien seel en tesmoigniage et en esforcement de totes les choses desus dites. 48 Et \69 je, li dit Loys, promeste en ma bone foi de tenir, de acomplir les choses desus dites, et hai mis mom sel avoi le sel mom dit signour; 49 et nous, li devant dit abbel de l-Ile, li abbel de Fontanne-André, li \70 prevost et li chapitres desus dit, Henri de Colombier, chevalier, et Othonim de Vaulmercuy, a la requeste nostre dit signour, nostres seels havons mis en cest present testement. 50 Fait et donez le joudi \71 aprés la demenge des Bordes, que fut li cinte jor dou mois de mart, l-am Nostre Signour corant mil trois cent trente et sapt.
Notes de transcription
[1] Ecritla baie.