Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh130

1323 (n. st.), 23 février.

Type de document: charte: reconnaissance

Objet: Reconnaissance par Estevenin dit le Clerc de son statut de bourgeois de Vercel accordé par Agnès de Durnes et Jeanne de Montfaucon, sa fille. Estevenin leur doit 4 livres de cire chaque année à payer à Vercel le jour de la Saint-Martin d’hiver. Il reconnait qu’il appartient à la justice d’Agnès et qu’il lui doit conseil et aide en tant que clerc. S’il perd son statut de clerc, il lui devra aide dans la guerre. Les héritiers d’Estevenin recevront également le statut de bourgeois de Vercel.

Auteur: Official de la cour de Besançon.

Disposant: Estevenin dit le Clerc.

Sceau: sceau de l'official de la cour de Besançon.

Bénéficiaire: Agnès de Durnes et Jeanne de Montfaucon.

Autres Acteurs: Richard d'Orchamps et Richard de Vercel, témoins.

Rédacteur: Jean dit Benaste et Perrin de Haute-Pierre.

Support: Parchemin jadis scellé sur double queue.

Lieu de conservation: AEN, W3 n° 3.

Édition antérieure: Publication par M. de Tribolet, Dépendance et profit…, n° IX/19, p. 77-78 (à la date du 1^er mars 1323).

Verso: Lettre de la frainchise Estevenin le Clerc, de Germeifontaine. – Lettres a ma dame (XIV^e siècle).

1 Nos, officiaus de la court l-arcidiacre de Besençon, 2 façons savoir a touz 3 que, par devant monsi Jehan dit Benaste, prestre, et Perrin d-Aute Pierre, clerc, \2 notaires, juriez de nostre dite court de Besençon, noz commandemenz especiaux a ce envoiez de part nos, es quex quant a ce nos avons commis et commeitons noz \3 foyes par ces lettres et es quex nos avons foy pleniere quant a ces choses et a plus granz, pour ce personelment establiz et venanz en droit, Estevenins diz \4 li Clerc, de Germeifonteine, demoranz a Vercex, ha recognu et confessé en droit par devant noz diz commandemenz 4 que il est bourgois de noble damoisele \5 et saige Agnés de Durnay, dame de Villaffans le Nuef, en nom de lei et en nom de Jehannaute, sa fille et fille çai en arriers Jehan de Monbeliart, \6 jadis seignour de Monfaucon, en la meniere qui ensuit, c-est assavoir de la dite Agnés pour tant comme il li en appartient et appartendra pour raison de \7 son doaire qu-ele tient et doit tenir dou dit Jehan, jadis son mari, et de la dite Jehanneite pour raison de son heritaige et partaige. 5 Et doit \8 li diz Estevenins, en nom de bourgoisie, a la dite Agnés, en nom que dessus, quatre livres de cire chascun an a la vie dou dit Estevenin, les \9 quex quatre livres de cire de bourgoisie li diz Estevenins doit et promist, par devant noz diz commandemenz par sa foy donee corporelment es mains \10 de noz diz commandemenz et par stipulacion sollempnel entremise, rendre et paier a Vercex, au pois de Vercex, a la dite Agnés, en nom que dessus, ou a son \11 commandement le jour de la feste de saint Mertin d-yver chascun an a la vie dou dit Estevenin. 6 Et recognut encour qu-il est de la justise \12 haute et basse, grant et petite, de la dite Agné et de sa dite fille, ensi comme dessus est devisez, et lour doit conseil et ayde comme clerz tant \13 comme il aura le privileige de clerc; et s-il perdoit le privileige de clerc, il lour devroit ayde au fuer cri et host et chevauchie come \14 bourgois. 7 Et puet acquerir li diz Estevenins des heritaiges des fietiers et des bourgois de la dite Agnés en son doaire et de sa dite \15 fille en lour terre de Vercex et tenir ycex a sa vie a la frainchise dessus dite, et par ce la dite Agnés ne sa dite fille, n-autres pour lour, \16 ne li pevent ne doivent demander autre servise ne autre debite a sa vie, si comme li diz Estevenins disoit par devant noz diz commandemenz, \17 et en tel meniere que aprés le decés dou dit Estevenin, sui hoir seront bourgois de la dite Agnés, en nom que dessus, c-est assavoir de \18 lei pour raison de son dit doaire et de sa dite fille en heritaige, et a touz jours a la condicion et a la frainchise de lour autres bourgois \19 de Vercex, et tenront de la dite Agnés, en nom que dessus, li hoir dou dit Estevenin les demorances toutes dou dit Estevenin en meubles, \20 en conquez et en heritaiges, a la condicion et a la frainchise des bourgois de Vercex, ensi comme li diz Estevenins le cognut, outroia et \21 acorda par devant noz diz commandemenz. 8 Promeitanz par devant noz diz commandemenz li diz Estevenins, pour lui et pour ses hoirs, par sa foy donee \22 corporelment es mains de noz diz commandemenz et par stipulacion sollempnel entremise, que il ces convenances dessus dites, toutes et une chascune, \23 tenra, gardera, enterinera et acomplira fermement, sans venir ne faire venir encontre ne consentir que autres y veigne taisiblement ni en appert, \24 et rendra et restablira a la dite Agnex et a la dite Jehanneite touz couz, touz domaiges, missions, despens et tout interest qu-eles ou li \25 porterres de ces lettres diroient, par lour simple seirement sans autre preuve faire, lour avoir fait, soustenu et encorru pour le deffaut des \26 dites convenances ou d-aucunes d-yceiles non tenues et non acomplies fermement en la meniere que dessus est dit. 9 Et quant a ces convenances tenir \27 fermement et acomplir, li diz Estevenins en ha obligié et sozmis en la juridicion et cohercion de-nostre dite court de Besençon lui, ses hoirs, touz \28 ses biens meubles et non-meubles, presenz et a-venir, quex que il soient et ou que il soient, pour lui et ses hoirs contreindre tout de plain par \29 une chascune de noz juridicions spirituele et temporele, c-est assavoir par la prise et la vendue de ses diz biens meubles et non-meubles et par \30 sentence d-excomeniement, a tenir, garder et acomplir les covenances dessus dites en la meniere que dessus est dit, aucune excepcion de fait, de droit \31 ou de coustume non obstant. 10 Ces choses furent faites, presenz Richart d-Orchans, prevost de Vercex, et Richart, fil monsi Jehan de Vercex, \32 tesmoins a ce appelez. 11 En tesmoignaige des quex choses, nos, li diz officiaux, au rapport feiauble de noz diz commandemenz, avons fait matre \33 en ces presentes lettres le seel de nostre dite court de Besençon. 12 Ce fu fait et doné le mercredi aprés la feste de saint Pere de fevrier, l-an de \34 grace corrant par mil .CCC. et vint et doux. 13 \35 Jo. B. 14 P. de Alta Petra.