Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh127

1322, 26 mai.

Type de document: charte: donation

Objet: Donation par Jean dit Clerc d’Avoudrey, à son décès, à Agnès de Durnes en rétribution des faveurs qu’elle lui a octroyées [cf. 35, 59] de tous ses biens meubles et non-meubles, excepté le douaire de Sibylle, sa femme. Toutes les décisions qu’il aurait prises pour distribuer ses biens sont désormais de nulle valeur.

Auteur: Official de la cour de Besançon.

Disposant: Jean dit Clerc d'Avoudrey.

Sceau: sceaux de la cour de Besançon.

Bénéficiaire: Agnès de Durnes.

Autres Acteurs: Perrin dit Rigaut et Luquet, son frère, Sibylle, femme de Jean dit Clerc d'Avoudrey; Pierre dit Boichu, JEan, curé de Montgesoye, et Perrin d'Haute-Pierre, témoins.

Rédacteur: Jacques de Dole et Nicolas dit de Beaune.

Support: Parchemin scellé sur double queue.

Lieu de conservation: AEN, X3 n° 3.

Verso: Lettre de la donacion dou Clerc d-Avoudrey (XIV^e siècle).

1 Nous, officiaux de la court de Besançon, 2 façons savoir a touz 3 que par devant Jaquat de Dole et Nycolaux dit de Beaune, clers, notaires, juriez de nostre court \2 de Besançon, noz comandemenz especielx, es quex, et a un chescun de ycés par luy, nos havons commis et commettons par ces presentes lettres nostre puissance et a lour havons ple\3ine foy, en droit por ce personelment estaubliz, Jeham dit Clert d-Avoudray, chestelains dou Chestel Nuef de Voillafans, ay effermoy et dit en droit, par devant noz diz coman\4demenz et les tesmoins cy-dessouz escript, a ce especielment venant, 4 que, come Agnelx de Durnet, dame dou dit Chestel Nuef de Voillaffans, sa chiere et bien amee dame, \5 de l-auctoritey et dou consentement de Jeham de Monfacon, son chier seignour et mari jaidis de la dite Agnel, li ait oittroié et voluy que il teigne franchement sanz \6 paier cense, prise, debite, ayde, servise ne autre exaction quele qu-ele soit, a sa vie, touz ses biens non-moubles herietaiges que il hay a present et acquerir porray, \7 et encor avec ce l-ay retenuy a sa vie la dite Agnel de sa maignie et de ses robes, c-est a savoir de robes d-escuiers, et fait plusours autres biens et dons, si come il \8 est contenu en unes lettres que il hay, saelee dou seel de la cort de Besançon et des seelx des diz Jeham de Monfacon et Agnel, 5 li diz Jeham de son bon grey, de certeinne science, \9 come bien avisez, en recompensation et remuneration des choses dessus dites et por ce que il li plait a-faire, de franche velontey, se tout ne li haüt ele riens doney ne bien \10 fait, vuet et outroie que, en l-oure que il yrai de vie a mort, la dite Agnel, sa dame, hait et teigne touz ses biens non moubles et herietaiges en-quelque leu que il soient \11 et porront estre trovez, comant que il soient nonmez ou appelez, soient de son propre herietaige, de succession, acheoite ou d-esquest, et touz ses biens moubles ausi ou que \12 il soient et porront estre trovez, fors que ycelx des quelx il ay ordeney ou ordeneray a sa vie, et soient suens perpetuelment por faire de ycelx toute sa bone velontey. 6 \13 Et touz ses diz biens et choses dessus dites, li diz Jeham ay doney et done a la dite Agnel, aggraaublement ce recevant par donation mere faite entre vis, sanz jemais repeler \14 ne venir encontre; 7 et dois maintenant il se estaublist havoir et tenir la possession de touz ses diz biens, herietaiges et non-moubles et encor de ses moubles, des quelx \15 il ne ordeneray ou auray ordeney a sa vie, en nom de la dite Agnel et por ley, en retenant a luy l-us et l-uffruit des choses dessus dites a sa vie tant soulement. 8 Et ay promis \16 et promet a la dite Agnel que il, en bone foy, leaulment, sanz fraude et sanz barat, garderay et saveray touz ses biens moubles en tel meniere que ele n-i seray point grevee ne \17 defraudee, saul l-ordination que il an feray et puet faire selonc ce que dessus est devisez; 9 et ce que il an ordeneray ou donray, il le feray si roisonablement que ele ne s-an davray \18 point tenir mal apaié par rayson. 10 Et ces choses hay il faites, saul le droit et le douaire de Sebyle, sa fome, en la meniere que il est contenuz es lettres que il ay, des queles \19 est faite dessus mention. 11 Item, come li diz Jeham de Monfacon, a son temps, et la dite Agnel, sa fome, haüssent pris en-gaiges de Perrin Rigaut et Luquat, son frere, de \20 Voillafans, herietaiges, terres et homes qu-il avoient a Voillafans et sont dou fyé de la dite Agnel et la dite gaigiere le fyé durant d-ycele li ayent doney, li diz Jeham \21 ay voluy et outroié, vuet et outroie que, a jour que il yray de vie a mort, la dite gaigiere, se ele n-estoit rainte, ou li aquest d-ycele, se acquise l-avoit, soit et reveigne \22 a la dite Agnel et a ses hoirs entierement, sanz part et sanz partie d-autruy, et touz li droiz que il ou sui hoir y porroient havoir ne reclamer. 12 Et confesse et cognoit \23 publiement que il, en non de la dite Agnel, la dite gaigiere tient et posside et en est usuffrutuarres tant soulement. 13 Encor vuet et outroie li diz Jeham d-Avoudrey que \24 se ensinc estoit que il ou temps pessey ayt fait covenances ou lettres a monsi Vautier de Monfacon ou a autruy de ses diz biens moubles ou herietaiges estre donez aprés \25 son deceps, que les dites covenances et donation soient de nule valour, et les rapele par ces presentes lettres; 14 et se point an avoit faites, il cognoit et confesse que \26 ce fut ou non de la dite Agnel et por li et a son profeit et non d-autruy et non mie a profit dou dit monsi Vauthier ne d-autruy fuers que de la dite Agnel. 15 Les queles \27 choses dessus dites et une chescune de yceles li diz Jeham d-Avoudrey ay confessey estre veraies en-droit par devant noz diz comandemenz et yceles toutes ensamble et chescune par \28 soy ay promis et promet, par son sairement por ce corporelment doney es meins de noz diz comandement, sollempnel stipulation entrevenant, et sus la obligation de luy, de ses hoirs et \29 de touz ses biens moubles et herietaiges, tenir, faire, garder et acomplir fermement et perpetuelment sanz corrumpre et sanz jemais venir encontre par luy ne par autruy ou temps \30 a avenir. 16 Et vuet et outroie que nos, li officiaux dessus diz a tenir et garder les choses dessus dites le controigniens et mandiens controindre par l-une et par l-autre de noz juridicions \31 spirituel et temporel, c-est a savoir par sentence d-escomeniement et par la prise de ses biens, aucune exception de droit ou de fait non obstant. 17 Et quant a-ce, il submet luy, ses biens et ses \32 hoirs a la juridicion de nostre cort de Besançon, en quelque leu que il se transportoit ou face mansion. 18 Et renonce en ce fait par son dit sairement a toute exception de mal, de \33 barel, de circonvencion, de lesion, de paour, de deception, a droit disant donation faite por ingratitude povoir estre rapelee, a droit disant la donation sormontant cinc \34 cenz deniers d-or davoir estre en actes insignuee, et yceste donation li diz Jehan vuet insinuee en ces presentes lettres et l-ensinue en-tant come il puet de droit \35 ou de costume, et a toutes autres exceptions de droiz, de loys, de canon, de fait et de costume que l-on porroit dire ou opposer contre ces lettres, et a droit disant generalx \36 renunciations ne vaut. 19 En tesmoignaige de la quel chose, nos avons mis le seel de la cort de Besançon en ces presentes lettres a la relation de noz diz comandemenz. 20 Faites et \37 donees, present maistre Pierre dit Boichu, clerc, de Besançon, monsi Jeham, curié de Mongesoie, et Perrin d-Aute Pierre, clerc jurey de la cort de Besançon, tesmoins a ce \38 apelez, le mecredi devant Penthecoste, l-am Nostre Seignour corrant mil trois cenz vint et doux, ou moys de may. 21 Ita est. N. de Belna et Jacobus de Dolae.