Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh059

1312, novembre.

Type de document: charte: confirmation

Objet: Confirmation par Jean [II] de Montfaucon-Montbéliard et Agnès de Durnes, sa femme, des faveurs octroyées à Jean dit Clerc d’Avoudrey en raison du legs qu’il a accordé à Agnès de Durnes [cf. 35]. Jean donne tous les droits nécessaires pour gérer cette affaire à sa femme Agnès.

Auteur: Jean [II] de Montfaucon-Montbéliard et Agnès de Durnes.

Disposant: Jean [II] de Montfaucon-Montbéliard et Agnès de Durnes.

Sceau: sceaux de Jean [II] de Montfaucon-Montbéliard, d'Agnès de Durnes et de la cour de Besançon.

Bénéficiaire: Jean dit Clerc d'Avoudrey.

Autres Acteurs: Sibylle, femme de Jean dit Clerc d'Avoudrey.

Rédacteur: Guillaume de Mouthier-Haute-Pierre.

Support: Parchemin scellé de trois sceaux sur double queue; le deuxième, celui d’Agnès de Durnes, a disparu.

Lieu de conservation: AEN, L3 n° 8.

Verso: Une donacion faite par Jehan de Mofaucon a Jehan Clert d-Avouldrey, escuyer (XV^e siècle).

1 Nos, Jehans de-Monbeliar, sires de-Monfaucon, et Agnex de Durnaich, sa famme, 2 faiçons savoir a-touz 3 que, considerez les agre\2ables et profitaibles bontez, servises et cortesies que Johans dit Clert d-Avoudrey, nostre hons, fiz çai enn-arriés Lamber d-A\3voudrey, ai fait et fait de-jor en-jor a nos et a nostres et a nos devantiers, et por ce especialment que Jeham diz Clert, de\4sus nommez, ai doney a nostre famme Agnex, devant dite, touz ses biens non meubles, presanz et a-venir, aprés le deceix de Jehan \5 dit Clerc, devant diz, s-il moroit sanz leal hoirs enjandrez de son cors, et touz ses meubles, presenz et a-venir, des quex meu\6bles il n-auroit ordeney en-sa vie des quex meubles, presenz et a-venir, 4 nos, Jehans de-Monbeliar, sires de-Monfaucon, et nos, Agnex de \7 Durnaich, sa famme, desus diz, li outroions, voillons et li donons pusance que li diz Jehanz dit Clert an puisse faire, ordener, do\8ner a-sa vuluntey en-sa vie en-quelque leu ou a quelque persone que li plairoit. 5 Et promatons per nostre bone foi a dit Jeham diz Clert de non \9 aler encontre per nos ne per atrui. 6 Et en-guierdom et en-remuneraciom de ces choses, nos avons retenu et retenons, por nos et \10 por nos hoirs, le dit Jehan dit Clert a sa vie, conjontement et deviseement de nostre propre maignaige et des robes de nos escuiers, les quelx \11 robes nos li davons doner a-moins une foiz l-an. 7 Et encor outroions et volons que li diz Jehanz dit Clert d-Avoudrey, teigne a sa vie fran\12chement touz son herietaige et celui sa famme et tout quanque il ai aquis et aqueray et quanque il ai d-eschoite ou aurai au temps a-venir sanz \13 paier cense, taille, prise, quise au aide por quelque affaire que nos aiens ou porriens avoir et sanz faire nul-autre servise quelque il soit. 8 \14 Et li avons doney et donons, por nos et por les noz, plaim povoir de-conquerir de-touz nos homes gentis, frans, serjanz, taillaubles et esplai\15taubles, les quex aquest nos volons qu-il les teigne en la franchise et en-la-meniere que li avons outroié et outroions son herietaige ensam\16ble les autres chouses desus devisees. 9 Et encores volons et outroions que Sybile, sa famme, ou autre famme que li diz Jehanz dit Clert porroit a\17voir par leaul mariaige, haient, proingnent et teignent ausi frainchement, comme nos avons outroié et doney et donons a dit Jehan diz Clert, son herie\18taige et ses conquest a-lour vies, lour mariaiges et lour douaires come franches fammes, c-est a-savoir la moitié des-herietaiges a-lour vie et la \19 moitié des mubles a tot jors se elles sorvivoient le dit Jeham dit Clert. 10 Et s-il avenoit que li diz Jehanz dit Clert d-Avoudrey, haüst hoir le\20aul et natural de son propre cors, nos, Jeham de Monbeliar, sires de-Monfaucon, desus diz, et nos, Agnex de Durnaich, sa famme desus dite, volons et \21 outroions que li dons fait a nos devant dite Agnex ou a-autre en-nom de nos du dit Jehan dit Clert soit de nulle valour, et que sui diz hoirs \22 ou hoir teignent ou teigne, puissent ou puisse avoir et tenir touz les biens meubles et non meubles du dit Jehan dit Clert, aquis et non aquis, aprés sa \23 mort, es husaiges et es-cutumes et es franchises du Neuf Chastel de Vuillaphans. 11 Et toutes ces chouses desus dites et devisees, chescunne per soi et toutes em\24samble, nos, Jehan de-Monbeliar, sires de Monfaucon, et nos, Agnex de Durnaich, sa famme, desus diz, avons promis et promatons par nos soiremenz corporalment donez \25 sus sainz evangelex tenir et guerder fermement por nos et por nos hoirs, les quex nos oblijons et volons qu-il soient tenuz a ces chouses desus dites tenir et guer\26der toutes ensambles et chescunne par soi. 12 Et promatons par nos soiremenz jai bailliez que nos ne venrons encontre par nos ne par autrui ne consentirons que-autrui i-veigne en \27 jugement ne defeur, en apert ne en celé, mais guerantirons, apaiserons et mainterons a-dit Jehan dit Clert et a sa famme Sybile ou a-autre famme, s-il la proinnoit \28 par leaul mariaige, et a-ses hoirs ou a son hoir leaul et naturaul, toutes les chouses desus dites en la meniere et en la forme devant dite. 13 Et renonçons \29 a-toutes exceptions, deceptions, raisons et allegacions de-fait, de droit et de-custume que a nos ou a nos hoirs porroient valoir ou aidier et le dit Jeham \30 dit Clert, a Sybile, sa famme, ou autre famme, se il la proinnoit par mariaige leaul, et a ses hoirs ou a son hoir leaul et natural nuire (nuire); et especialment a \31 benefice de restitution por raison de-menour aaige et a droit que dit que general renunciacion ne vaut, et a-la exception de fraude, de-baret, de-cir\32convention et a-toutes autres exceptions et a touz autres droiz escript et non escripz que porroient faire ne dire contre cest fait ne encontre cestes presentes lautres. 14 Et \33 por ce que ces chouses soient plus fermes et plus estaubles, nos, Jehan de-Monbeliar, sires de-Monfaucon, desus dit, avons doney et donons et outroions a Agney, nos\34tre dite famme, puissance, auctorité et liberal povoir de-faire toutes les chouses desus devisees et nos i-sumes consenti et consentons et les louons et confermons. 15 \35 En-tesmoingaige de veritey de ces chouses desus contenues, nos, Joham de-Monbeliar, sires de-Monfaucon, et nos, Agnex de-Durnaich, sa famme, desus diz, \36 avons mis nos seels en ces letres et avons prier et requis a honorauble persone, l-official de la-cort de-Besençon que il mate le seel de la dite \37 cort en ces letres avuenc les nostres seels, en-la quel juridiciom nos nos supmatons, nos hoirs et touz nos biens meubles et non meu\38bles, presenz et a-venir. 16 Et volons et outroions especiaulment que li diz official nos puisse controinre par-sentence d-escumeniement, nos et nos hoirs, \39 et nostre terre mautre en-entredit. 17 Et renonçons a-touz privileiges empeitrez et non empeitrer et a-touz droiz escript et non escript par quoi nos nos porriens \40 deffandre que li diz officiax ne-nos peut, ne nos hoirs, escumeniez ne nostre terre mautre en entredit. 18 Et nos, officiax desus-diz, a-la priere et a-la requeste \41 du dit Jehan, sires de-Monfaucon, et de Agnex, sa famme, faites a nos par maitre Guillaume de-Mostier-Aute-Pierre, et a la relacion du dit maistre Guil\42laume, clert, jurié de nostre cort, nostre commandemant por ce especialment envoiez a-quel nos avons pleniere foy sus ces chouses et sus plus granz, par devant \43 lequel toutes ces coveinances ont estees faites, avons mis le seel de la dite cort de-Besençon ensamble les seels du dit Jeham, sires de-Monfau\44con, et de Agnex, sa famme desus dite, en ces presentes letres. 19 Faites et donees l-an de Nostre Seignour corrant par mil trois cent et \45 douze, u-moix de novembre. 20 Ita est. G. de Monasterio Alte Petre.