Téléchargement du document

Documents linguistiques galloromans
Corpus : chNCh (chNCh)
Responsable du corpus : NN
Édition de la charte : Bernadette Gavillet.

chNCh027a

1315 (n. st.), 2 janvier.

Type de document: charte: quittance

Objet: Quittance par Clémence, dame de Naisey, reconnaissant avoir reçu 200 livres de Jean [I] de Montfaucon-Montbéliard pour une lettre de 1291 dans laquelle Etienne de Gonsans reçoit 10 livrées de terres et 100 livres pour être entré en l’hommage de Mile de Durnes.

Auteur: Official de la cour de Besançon.

Disposant: Clémence, dame de Naisey.

Sceau: sceau de la cour de Besançon.

Bénéficiaire: Jean [I] de Montfaucon-Montbéliard.

Rédacteur: Simonin de Vaux.

Support: Parchemin scellé sur double queue.

Lieu de conservation: AEN, W3 n° 22. Contient la copie d’un acte du 11 octobre 1291

Verso: Lettre de fié de .X. lb. de terre par le sire de Concens. (XIV^e siècle)

1 Nos, officials de la court de Besançon, 2 façons savoir a-touz ces qui verront et orront ces presantes letres 3 que, par devant Symonin de Vaux, clerc, juré de nostre \2 court, nostre comandement espiciaul au quel nos avons doné nostre puissance quant a ce et donons par ces presantes letres et au quel nos avons pleniere foy, pour ce personalment \3 estaublit, nobles damoiseaux Jeham de Monbeliart, sires de Monfaucom, d-une part, et dame Clemance, dame de Nasey, d-autre part, 4 li dame Clima[n]ce en la presance \4 du dit nostre comandement, ay baillié et delivré au dit Jeham, seignour de Monfaucom, unes letres seellees des seaux monsi Mile et monsi Poincart, jadis de Durnet, \5 chevaliers, et de Jeham de Durnet, arcediacre de Lacois, lour frere, si come il appert a-la premere face, 5 des quex letres li tenor s-ensuet par-tex paroles: 6 « Nos, Miles \6 et Poincars, chevalier, et Jehans de Durnet, channoines de Lamgres, frere, 7 façons savoir a touz ces qui verront et orront ces presantes letres 8 que nos, consideranz et \7 regardanz nostre grant profit et les bontez et les servises que messire Estienes, sires de Gonçans, chevaliers, nos ay fait assidue(ue)ment, et ce espiciaulment que li diz Estienes, \8 a nostre grant besoing, nos ay promis aidier et reçater contre monsi Humbert, seignor de Rougemont, avons doné et donons au dit Estiene et a ses hoirz, por \9 nos et pour nos hoirz, permaignaublement, dix livrees de terre, les queles nos avons promis esseoir et essigner au dit Estiene en la terre de Durnet si tost com nos \10 aurons apaisié au dit Humbert ou a sa fome ou a ses hoirz, se de lour defailloit. 9 Et pour les dites dix livrees de terre et pour cent livres d-estevenens que nos avons \11 doné au dit Estiene, li diz Estienes est antrez en l-omaige et en la feauté de nos, devant dit Mile, sauve la feauté de ses seigno[r]s, c-et a-savoir de no\12bles princes et poissanz, Othe, conte palatim de Borgoigne et seignor de Salins, monsi Jeham de Chalom, seignor de Arllay, et sauve la feauté l-avesque de \13 Baslle, le conte de Mombeliart, Jeham de Mombeliart, seignor de Momfaucom, Huat de Belvor, Clemance d-Oiseler, dame d-Erguel, et Mathé de Mommartim. 10 Et \14 ces convenances avons nos promis au dit Estiene tenir et garder bien et loiaulment par noz soiremenz faiz et donez sus seintes evvangiles toichies. 11 En tesmoignaige de \15 la quel chose nos avons mis noz seaux en ces presantes letres, 12 que furent faites l-an Nostre Seignor corrant par mil .CC. nonante et un, le juedi aprés la Seint Denis. » 13 \16 Pour les queles letres li dame Climance ay confessé et publiement requeneu en droit par devant le dit nostre comandement que ele ay heu et receu du dit Jehan, \17 seignor de Momfaucom, dous cenz livres de bons estevenens em bone pecune nombree, baillie et delivree a li et tornee du tout en son profit, si que ele s-en est te\18nue pour bien paie. 14 Pour la quele some d-ergent li dite dame Climance ay quitté et remis, pour li et pour touz ces a cui il porroit efferir, au dit Jeham, \19 seignor de Momfaucom, les choses contenues es devant dites letres et les arraiges des dites dix livrees de terre de tout le temps passé en arriers jusques \20 au jour la confectiom de ces presantes letres, le dit Jeham, seignor de Monfaucon, presant et ceste quittance recevant. 15 Et ay promis li dite dame Climance, \21 pour li et pour ses hoirz et pour touz ces qui cause porroent avoir de ley, par sa foy donee pour ce corporelment et par sollempnel stipulatiom et sus la \22 generaul et expresse obligatiom de touz ses biens mobles et herietaiges et que ele tient et posside, soit desouz la seignorie du dit seignor de Monfaucon \23 soit autre part, que ele portera leaul garandie adés et en touz leus et contre toutes genz au dit seignor de Monfaucon et a ses hoirz des dites dix \24 livrees de terre, des arraiges d-icelles, et releveray de touz domaiges que avenir l-an porroent jusques a-la some des dites dous cenz livres d-estevenens, \25 li, ses hoirz et touz ses bienz mobles et non-mobles ou que il soent ni porront estre trové; obligeanz en la main du dit seignor de Monfaucon et de ses hoirz \26 pour la garandie porter des choses desus dites. 16 Et toutes ces choses, par ensit come devisees sont, ay promis li dite dame Climance par sa devant \27 dite foy donee derechief ^[1] en la main du dit nostre comandement tenir, garder et acomplir, sanz venir encontre par li ni par autruy, taisiblement ni \28 en appert; 17 et ay volu et outroié, se ele venoit ou façoit encontre, que nos au tenir, garder et acomplir la controigniens et faciens controindre \29 par santance-d-excomuniement, et s-et sobmise quant a ce, li et touz ses biens et ses hoirz, en la juridictiom de nostre court, la caption de ses biens non \30 mie contraitant. 18 Et ay renuncié en ce fait par sa dite foy li dite dame Climance a toute exceptiom de mauvais baret, de paour, de force, de le\31siom, de circonventiom, de actiom en fait et de toute condictiom sanz cause, de decevance, et a ce que ele n-ait heu et receu e[n]tierement du dit Jehan, seignor \32 de Monfaucon, la dite some d-ergent, et que ele ne-soit du tout tornee en son grant profit, et a toutes autres raisons et allegations que de fait, de droit, \33 de costume porroent estre mises ni opposees contre la tenour de ces letres, et au droit que dit que quant les fomes errent ou foloent en droit ou en \34 fait que l-on les doit seccorre, et a touz droiz introduz en la favour des fomes, et au droit que dit que generax renunciations ne vaut. 19 Et parmi ces \35 choses desus dites, li diz Jehans, sires de Monfaucon, ay quitté la dite dame Climance de la plaigerie que il avoit fet pour li en la main es filles Jannim, \36 de Losanne et de touz les domaiges que l-an sont avenu; et ay promis, par sa foy donee corporelment en la main du dit nostre comandement, que il ne vanray encontre. 20 \37 Et ay volu et outroié que li diz Symonins de Vaux en face bone letre de quittance a-la dite dame Climance desouz le seel de nostre court. 21 En tesmoignaige \38 de la quel chose nos, a-la relatiom du dit Symonin, nostre comandement, avons mis le seel de nostre court en ces letres. 22 Faites et donees le juedi aprés la Circoncisiom Nostre Seignor, l-an de grace corrant par mil .CCC. et quatorze. 23 Sy. de Vaux.

Notes de transcription
^[1] Ainsicoupé:de rechief.