Téléchargement du document

Documents linguistiques galloromans
Corpus : chartes de la Côte d'Or (chCOr)
Responsable du corpus : -
Édition de la charte : -

chCOr156

1265, mai

Type de document: charte: franchise

Objet: Charte de franchise de Salmaise accordée par Etienne de Mont-Saint-Jean, seigneur dulieu.

Auteur: Etienne de Mont-Saint-Jean

Sceau: Girart évêque d'Autun, l'abbé de Flavigny, Guillaume de Montaigu, Henri d'Antignyseigneur de Sainte-Croix, Jean d'Ancy-le-Franc

Bénéficiaire: ville de Salmaise

Rédacteur: auteur/sceaux?

Support: Parchemin jadis scellé de cinq sceaux sur double queue (Etienne n'a donc pas tenu sapromesse d'ajouter son sceau après être devenu chevalier), encadré, ce qui empêchede lire d'éventuelles mentions dorsales.

Lieu de conservation: Mairie de Salmaise

Édition antérieure: Garnier, t. II, p. 318; Paul Petit, p. 179.

1 En nom dou Pere et dou Fil et dou saint Esperit, Amen. 2 Je, Estienes de Mont Saint Jehan, sires de Saumaise, antendenz à l'edifiemant et au profit de ma ville de Saumaise et des borgeois demoranz en la dite ville de Saumaise de danz les croiz, 3 \2 fais savoir à touz ceaux qui verront ces presentes letres 4 que, con la main morte soit orandroit an la ville de Saumaise, 5 je, Estienes de Mont Saint Jehan, sires de Saumaise, quitois, delivrois et delaissois es diz borgeois de Saumaise et à leur hoirs la dite main morte por \3 touz leus. 6 Et ai doné et otroié es diz borgeois de Saumaise et à leur hoirs tel freinchise et tex covenances que tuit cil et uns-chascuns seront quite et franc chascun an por seze soz et huit deniers de la monoie de digenois, ou de tel monoie conme il corrai por Bergoine \4 au tens c'on paierai la freinchise, 7 à paier chascun an à-moi ou à mes hoirs l'andemain de la feste de Touz Sainz; 8 et por ces devant diz seze soz et huit deniers, li dit borgeois de Saumaise et leur hoirs seront quite et franc perpetuemant chascun an de toutes \5 tailles, de toutes corvees, de toutes mises et de toutes choses 9 s'il ne font forfait de quoi il deveint amande, la quele amande serai moie et à mes hoirs. 10 Et pouent li dit borgeois de Saumaise et lor hoir metre leur maior et leur escheviz jusque à quatre escheviz \6 sanz congié de moi et de mes hoirs, 11 et pouent metre leur messiers et leur vigniers sanz congié de mi et de mes hoirs, 12 et li maires pout metre son sergent sanz congié de moi et des borgeois. 13 Et pouent li dit borgeois de Saumaise et leur hoir chascun an changier \7 et remuer, lou jor de la Saint Jehan Baptiste, lou maior et les escheviz, s'i vuellent, sanz congié de moi et de mes hoirs. 14 Et quiques soit maires en la ville de Saumaise, il est tenuz por son son sairemant à garder mon droit et à mes hoirs et les droiz de la freinchise et de gar\8der mes amandes s'eles i escheent. 15 Et ce sunt les amandes jugies: 16 dou sanc queneu, se clains en est faiz, sexante et cinc soz; 17 de ferir ou de batre sanz sanc, se clains en est faiz, set soz; 18 de despitier lou maior ou son sergent set soz; 19 de faux clain, set soz; 20 de \9 mes_atandue de jor, se essoine n'i ai, set soz; 21 de faux né, set soz; 22 de domaige c'on fait à esciant, set soz; 23 de villenie où il afiert escondit, set soz; 24 se li borgeois ou leur hoir sunt pris à bois deffandu, set soz de danz leur usaige. 25 Et s'il escheoit en la dite frein\10chise de Saumaise amande qui ne soit continuee en ceste letre, ele serai jugie es us et es-costumes de Vieteaul. 26 E tuit li clain des borgeois et de leur hoirs doivent venir devant lou maior, 27 et li maires doit avoir de chascun clain treze deniers touz quites suens. 28 Et \11 se li maires ou li eschevi mesfacient de riens vers moi ou vers mes hoirs, il sunt tenus de l'amander à moi et à mes hoirs es us et es costumes de Vieteaul. 29 Et est à savoir que je ne mi hoir ne pouons ne ne devons esforcier les diz borgeois de Saumaise ne leur hoirs de \12 nulle chose ne prandre dou leur, 30 fors que ces devant diz seze soz et huit deniers de la monoie de sus nonmee 31 et fors que les amandes jugues, en sin conme eles sunt continuees ^[1] en ceste letre.
32 Adecertes, je ai doné et quité et otroié perpetuemant es diz borgeois de Saumaise \13 et à leur hoirs l'usaige à tout le bois mort por touz mes bois, 33 fors de foret Vaudry et fors dou bois de vers Viillé et fors de mon parc, 34 ce est à savoir à tout lou bois, fors que au foul et au chaine et au ponmier et au parier et au fraine estanz, 35 por faire toutes \14 leur voluntez en la dite freinchise, sanz vandre et sanz doner de fors le croiz 36 et au fraine ont li dit borgeois et lor hoir leur usaige por fair bouz et chevilles es charz et es charretes et es charrues et por faire cecles es cues et es tonneaux; 37 et \15 si ont leur usaige li dit borgeois et leur hoir au ponmier et au parier araichier por anter por tous mes bois où il ont leur autre usaige 38 et de danz les Comes n'ont point d'usaige li dit borgeois ne leur hoir à la codre. 39 Et se je ou mi hoir voliens faire \16 estan ou edifiemant ou creitre mon parc de danz les bois où il ont leur usaige, li dit borgeois ne leur hoir n'an pouent de riens aler en contre por usaige qu'il aient es bois. 40 Et leur ai doné et otroié l'usaige por touz mes bois à tout lou fruit dou bois; 41 et s'i \17 vuelent en_voier leur pors de leur propres ostés en la paisson, il les i pouent en_voier tout l'an, chascun porc por quatre deniers de la monoie de_sus nonmee, en_sin lou petit con lou grant. 42 En sorquetout, je ai doné et otroié es diz borgeois de Saumaise et à leur hoirs \18 l'usaige es reortes des charrues por touz mes bois à prandre chascu an ou mois de marz, 43 ce est à savoir à chascun aploit dous faix de reortes et à chascune charrete un fais, 44 et les doit l'en prandre por lou conmandemant de mon foretier; 45 et leur-ai doné et otroié l'usaige \19 es liens des gerbes por touz leus et en bois et en riviere. 46 Et ai doné et otroié es diz borgeois de Saumaise et à leur hoirs la peicherie dés lou molin dan Reinbert en sus, save ma peicherie et sauf lou droit autrui.
47 Et est à savoir que li dit borgeois de Saumaise et \20 leur hoir sunt et seront quite et franc en tel meniere qu'il pouent et porront demorer en queque leu que il vodront en autre seignorie que en la moie, 48 et porront avoir et tenir toutes les leur choses, mobles et non mobles, presenz et à-venir, en queque leu qu'il soient, quite\21mant et freinchemant, 49 por les devant diz seze soz et huit deniers paianz chascun an à moi ou à mes hoirs ou à nostre certein conmandemant au terme de sus nonmé; 50 et pouent et porront vandre et acheter li uns de l'autre et de quecunque gent que il vodront de danz \22 les croiz; 51 et pouent et porront faire leur voluntez de toutes leur choses, 52 sauf ce qu'il remaine ou més d'un chascun tant solemant que je ou mi hoir puissons avoir chascun an les devant diz seze soz et huit deniers de la monoie de sus nonmee, 53 sauf \23 mes cens, mes costumes, mes tierces et mes loux que je ne leur ai ne quitez ne donez, 54 les quex cens, costumes, tierces et loux il me doivent por les més, por les terres et por les autres choses qu'il tienent de moi en la ville de Saumaise et en la chastelerie. 55 Et les terres \24 de quoi il me doivent les tierces, je ne mi hoir ne les pouons ne devons torner en nostre charruaige ne en nostre demeneure.
56 Et quicunques, hons ou fanme, vodrai antrer e la dite freinchise de Saumaise, il demorerai en la dite ville de Saumaise por \25 moi et por mes hoirs ou por nostre conmandemant et por lou consoil et por lou loux des borgeois; 57 et derai estre receuz en la dite freinchise pr seze soz et huit deniers chascun an à paier à moi ou à mes hoirs, en sin conme il est de sus nonmé. \26 58 Adecertes, je ne mi hoir ne pouons ne devons prandre nuns des devant diz borgeois ne de leur hois ne nuns de ceaux qui demoreront en la dite freinchise de Saumaise, 59 andemantres qu'il arient tant de herietaige en la dite ville de Saumaise que je ou li mien \27 porriens iqui lever nostre amande jugie segon lou forfait qu'il arient fait, 60 fors ceaux qui ferient lou rat, et cil qui serient pris au rat serient an amande de sexante et cinc soz.
61 Adecertes, li devant dit borgeois de Saumaise et leur hoir doivent \28 segre moi et mes hoirs en ost et en chevoichie au leur un jor et une nuit; 62 et se je ou mi hoir les voliens tenir plus d'un jor et d'une nuit, il serient d'anqui en avant à noz soz et à noz deniers et dou tout à nostre despans. 63 Et se je ou quicunques \29 serai sires de Saumaise au tens de lor voliens estre chevalier ou fille marier ou aler outre-mer, ou terre acheter jusque à cent livrees de terre ou à plus à une paumee de la monoie qui corroit au-tens de lor, li dit borgeois de Saumaise et leur \30 hoir serient tenu de nos aidier rainaublemant.
64 corroboratio? Adecertes, je, Estienes de Mont Saint Jehan, sires de Saumaise, ai juré sus sainte Evangille por moi et por mes hoirs à garder et à-tenir perpetuemant, paisiblemant et quitemant, sanz \31 corrompre, la dite freinchise et les dites covenances et toutes ces choses de sus dites et la tenor de ceste letre es diz borgeois de Saumaise et à leur hoirs, 65 et que je n'irai gemais en contre ne ferai à aler des or en avant, ne por moi ne por autrui, \32 ne por parole ne por fait ne por consantemant ne por autre meniere qué qu'ele soit. 66 Et ai promis es diz borgeois de Saumaise et à leur hoirs por mon sairemant devant doné que, tantost con je serai chevaliers et je arai autre seaul, je lou metrai \33 en ces presentes letres en_semble les seaux qui or i-ssunt ^[2]. 67 Et s'il avenoit chose-que ja ne soit-que se je ou li miens aliens de nulle chose en contre la dite freinchise ou en contre les covenances de sus dites ou en contre aucunne des covenances, 68 je \34 mot moi et mes hoirs presenz et à-venir en la juridicion de l'ennorauble Pere et seignor Girar, por la grace de Deu avesque d'Osteum, et de touz les avesques d'Osteum qui aprés lui seront, 69 por tel condicion que, à la requeste des diz borgeois \35 de Saumaise ou de leur hoirs ou de leur certein conmandemant qui porteroit avec lui lou tancrit ^[3] de ceste presente letre seelé dou seaul d'un prodome, il cil Girarz, por la grace de Deu avesques d'Osteum, ou autres qui seroit avesque d'Osteum \36 au tens de lor, aient pouoir de nos escomenier et de constreindre por la justice de sainte Eglise et de metre toute noste terre en escomeniemant, fors tant solemant la ville de Saumaise, 70 jusque à ce que je ou mi hoir ariens acordé et fait \37 satisfacion es diz borgeois et à leur hoirs de ce que je ou mi hoir ou autres por nos ariens alé en contre la dite freinchise ou en contre les covenances de sus dites ou en contre aucunne des covenances. 71 En tesmoignaige et en remanbran\38ce de la quel chose et por ce que ce soit ferme chose et estauble à touz jors, je, les seaux de l'ennorauble Pere mon seignor Girar, por la grace de Deu avesque d'Osteum, et de l'abé de Flavigné et de mon seignor Guillaume de Mont \39 Agu et de mon seignor Henri d'Anteigné seignor de Sainte Croiz, et de mon seignor Jehan d'Ancy, ai fait à metre en ces presentes letres. 72 Ce fu fait en l'an de l'incarnacion nostre Seignor mil et dous cenz et \40 sexanet ^[4] et cinc, ou mois de may.

Notes de transcription
^[1] contenues?
^[2] Neveu: issunt
^[3] sic
^[4] sic