Téléchargement du document

Documents linguistiques galloromans
Corpus : chartes de Douai (chDo)
Responsable du corpus : Martin-D. Glessgen
Édition de la charte : Monique Mestayer / Thomas Brunner

chdouai0213

1263 (n.st.), 18 février. - Douai.

Type de document: charte: accord

Objet: Accord conclu par les paiseurs entre Hugues Boinebroke et Gérardin Goulet pour rétablir la paix entre eux et leurs familles.

Auteur: non annoncé, échevins de Douai.

Disposant: Hugues Boinebroke et Gerardin Goulet.

Sceau: non scellé; devise chirographaire: CIROGRAPHE

Bénéficiaire: Hugues Boinebroke et Gerardin Goulet.

Autres Acteurs: Marguerite de Flandre, Pierre du Celier et Jean de Biaches, sergents du bailli de Douai, Thibaut. - échevins de Douai: Rénier de Gouy, Sawalon de Vergelai - Eswardeurs: Enguerran Brunamont, Jean Petit Dieu, Richard Pilate, Jacques Pourcel, Jean de France, Gautier de Gouy, Richard du Markiet.

Support: Original parchemin chirographe superposé bipartite - partie inférieure.

Lieu de conservation: AM Douai, FF 141.

Édition antérieure: Espinas, Vie urbaine, t. III. n° 420, p. 321.

Verso: C'est li pais de Huet Boine broke et de Gerardin Goulet.

1 Li eswardeur des pais dient en leur dit tout au coumencement ke 2 Hues Boine_broke, por venir a boine \2 pais, a boine amour a Gerardin Goulet et a ses amis, doit fianchier et jurer sor sains en ceste piece de tere \3 a ^[1] homes de sen linage, se il prendre les veulent, ke quant li aventure fu avenue de lui et de Gerardin Goulet, \4 ke il et si ami, quant il le seurent, en furent dolant et repentant et sunt encore et seront tous jours. \5
3 Encore dient li eswardeur des pais en leur dit ke Hues Boine_broke deviegne hons si com de pais a Gerardin \6 Goulet et a ses amis ^[2] houmes de sen lignage, se il prendre les veulent. \7
4 Encore dient li eswardeur des pais en leur dit ke Hues Boine_broke doit aler a Nostre Dame de Rocemadour \8 noumeement por l'amendise faire de çou k'il mesprist enviers Gerardin Goulet et doit mouvoir por faire cel \9 voiage dedens le mi aoust le premiere ki vient, se il ne demeure par le greit et parle volenté de Jakemon \10 Goulet et de Jakemon dou Peustich. \11
5 Encore dient li eswardeur des pais en leur dit ke Hues Boine_broke fianche par foit et jurt sor sains a \12 ^[3] homes de sen lignage, se Gerardins Goulés et si amit prendre les voelent, ke, se autele aventure \13 fust avenue a aucun de ses proïsmes, ke il en prenderoit autant u mains ke ci devant est deviseit, preuc \14 ke cil s'en mellaissent ki ore s'en mellent. \15
6 Encore dient li eswardeur des pais en leur dit ke por ces sieremens, ces escondis, ces houmages et ces amendes \16 ke Hues Boine_broke a fait et k'il fera, ensi com ci apriés et ci devant est deviseit, ke Gerardins Goulés et si amit \17 ki ci sunt oient et voient ces sieremens et ces escondis faire et ces honmages et ces amendes recevoir et baisent \18 maintenant li un les autres en non de pais et de boine amour. \19
7 Encore dient-li eswardeur des pais en leur dit ke Gerardins Goulés et si amit ki ont reciut ces houmages et Hues \20 Boine_broke et si amit ki ont fait ces honmages fiancent par foit et jurent sor sains ke de toutes les \21 aventures ki-sunt avenues entre aus et de toutes les haines et de toutes les aatines et les males amours \22 ke il ont eut u fait u dit li uns envers les autres por quoi ke ce soit et en quelconke maniere ke ce soit juskes \23 au jour de hui, ke il le pardonent tout li un els autres et mecent en leur sierment ke il n'en lairont a-par\24ler, a boire ne a maignier ne a markaander li un as autres, se tans et lius en venoit. \25
8 Encore dient li eswardeur des pais en leur dit ke Hues Boine_broke et tout si parent ki ci sunt et ki ci \26 ne sunt et tout cil aus et toutes celes ki por ces coses devantdites estoient u peussent u deussent estre en \27 haine u male amour envers qui ke ce fust et en-quelconke maniere ke ce fust juskes au jour de hui sunt en ceste pais. \28
9 Encore dient li eswardeur des pais en leur dit ke Gerardins Goulés et tout si parent ki ci sunt et ki ci ne sunt \29 (sunt) ^[4] et tout cil ausi et toutes celes ki-por ces coses devantdites estoient u peussent u deussent estre en haine \30 u en male amor envers qui ke ce fust et en-quelconke maniere ke-ce-fust juskes a jour de hui sunt en ceste pais. \31 10 Encore dient li eswardeur des pais en leur dit ke kikonkes ces pais ne autres ke li eswardeur des pais ont ^[5] \32 ordenees, devisees et faites ne celes ausi ke il ordeneront, deviseront et feront enfrainderoit, fust hons u feme, \33 en ceste vile u ailleurs, envers qui ke ce fust et sor qui ke ce fust de ceste ville ne d'ailleurs, et en quel point ke il \34 fust, il seroit a tous jours banis de ceste vile sor le teste com mordereres et se on le tenoit, on en feroit justice \35 com de tel home u de tele feme. E s'il avenoit cose ke partie envers qui on aroit mes-fait avoit mestier d'aiwe \36 et de tiesmoignage dou signeur de le tere et des eswardeurs des pais, on li tiesmoigneroit partout ke cils u cele ki \37 ce fait aroit fait k'il l'aroit fait en murdre. A ceste pais faire fu el liu me dame le contesse de Flandres et de \38 Hainau ki dame est de le tere, Pieres dou Celier et Jehans de Biarch, serjant Tiebaut, bailliu de Douay. Et si i-furent com \39 eskievin Reniers de Goy et Sawales de Vergelay; et ceste pais fisent Engerrans Brunamons, Jehans \40 Petis Diex, Rikars Pilate, Jakemes Porciaus, Jehans de Franche, Watiers de Goy et Rikars dou Markiet, \41 en l'an del Incarnation Nostre Signeur mil .CC. LXII., el mois de fevrier, le jour dou Bouhourdich, ki-estoient \42 a celui jour eswardeur des pais. \43
11 Et si fait on le ban ke nus ne soit si hardis, hons ne feme, ki-die ne face vilenie por l'okison des pais as \44 eskievins ne as eswardeurs des pais ki s'entremetent des pais faire ne a parent ne a amit ke il aient et kikonkes \45 vilenie leur diroit, il kieroit el fourfait de .L. lb. et seroit banis .II. ans de le vile; et ki mal leur feroit, \46 il seroit a tous jours banis de ceste vile sour le tieste.

Notes de transcription
^[1] le nombre est laissé en blanc ms.
^[2] le nombre est laissé en blanc ms.
^[3] le nombre est laissé en blanc ms.
^[4] ms. répétition de sunt.
^[5] faitesgratté ms.