Téléchargement du document

Documents linguistiques galloromans
Corpus : chartes Royales (chRoy)
Responsable du corpus : Martin-D. Glessgen
Édition de la charte : Paul Videsott

R 1285 03 32 01

Paris - 1285 (n.st.), mars

Type de document: lettre patente (testament)

Objet: [1] Philippe [III, dit le Hardi], roi de France, [2] établit son (second) testament. [5] En premier lieu, toutes ses dettes devront être payées. [6] Ensuite, il stipule la distribution de différentes sommes d’argent à de nombreux légataires : abbayes, couvents, hôpitaux, églises démunies, veuves et orphelins dans le domaine royal. [60] Sa sépulture sera édifiée à Saint-Denis. [62] Il établit une rente pour sa fille Blanche, à percevoir aussi longtemps qu’elle ne pourra recouvrer son douaire en Espagne. [65] Une somme est aussi dévolue au bénéfice de la Terre sainte et [68] pour financer dix chevaliers en cas de croisade. [75] Les exécuteurs testamentaires sont nommés et [77] et leur éventuel remplacement réglé.

Auteur: Philippe [III], roi de France

Disposant: Philippe [III], roi de France

Sceau: Philippe [III], roi de France

Bénéficiaire: De nombreux abbayes, monastères, hôpitaux, églises démunies, veuves et orphelins dans le domaine royal ; Blanche sœur du roi, épouse de Ferdinand de La Cerda, infant de Castille ; la Terre sainte

Autres Acteurs: Guy de Genève, évêque de Langres ; Thibaut [I^er] de Pouancé, évêque de Dol ; Mathieu de Vendôme, abbé de Saint-Denis ; Robert [II], abbé de Royaumont ; Jean d’Acre, bouteiller de France ; Humbert de Beaujeu, connétable de France ; Jean de Puiseux, chanoine de Chartres ; Pierre [V] de Chambly et Jean seigneur de Poucin, chambellans du roi

Rédacteur: Chancellerie royale

Support: Original parchemin, 42,1 x 47,7 cm, scellé du sceau de cire branche sur double queue de Philippe [III], roi de France

Lieu de conservation: Paris AN : J 403 - Testaments I, n° 11 ^[a]

Édition antérieure: Achery III 1723, 691-692 (d’après le vidimus de Philippe [IV], roi de France, du [4] décembre 1285)

Commentaire:

1 En non de Sainte Trinité,, dou Pere, dou Fill et ^[1] dou Saint Esperit,· amen.· 2 Phelippes· par la grace Dieu rois de France.·
3 Nous faisons savoir que nous, par la grace Dieu, sain et haitié de cors, avons por le salu de nostre \2 ame ordené nostre testament en la maniere qui s’ ensuit ci aprés,· 4 en rapelant touz autres testamenz que nous avons fez ou tens passé.·
5 Premierement, nous volons et commandons, que toutes noz \3 detes soient paiees, et tuit nostre tortfet amendé par les executeurs de cest nostre testament, qui aprés sunt nommez, ou par autres, si comme il verront que bien sera à fere.·
6 Aprés, nous commandons et donnons nostre \4 ame à Dieu.· Et laissons à-l’ abaïe de Cistiaus cinquante livres torn. por fere en cele abbaïe nostre anniversaire perpetuelment.· 7 À-l’ abaïe de Realmont seur Aise,, deus-cens lbr. tur. por fere perpetuelment nostre an\5niversaire, et por establir ilec un moine prestre qui por nous chantera messes aprés nostre decés.· 8 À vint autres abbaïes de cele ordre meismes, et de Clerevaus, en noz demaines, cinc-cens lbr. tur.·
9 As nonnains \6 de Pontoise, deus-cenz livres torn. por fere perpetuelment nostre anniversaire, et por establir un frere chapelain qui chantera ilec messes por nos aprés nostre decés.· 10 As nonnains de l’ abaïe dou Lis delez Meleun, cent \7 lb. tur. por fere perpetuelment nostre anniversaire.· 11 As nonnains de Saint Antoine delez Paris, cent lb. tur. por ce meisme fere.· 12 À autres abbaïes de nonnains de cele ordre meismes, en noz demaines, sis-cenz lb. tur.· \8
13 À la Meson Dieu de Paris, deus-cens lb. tur. de rente· et deus-cens lb. en deniers por fere perpetuelment nostre anniversaire en ladite meson, et por establir ilec un chapelain qui chantera messes por nous aprés nostre decés., \9 14 À la Meson Dieu de Pontoise, sexante lb. tur.· À la Meson Dieu de Vernon, sexante lb. tur.· À la Meson Dieu de Compigne, sexante lb. tur.· 15 À deus-cens autres Mesons Dieu plus besoigneuses et plus chargiees dou rë\10aume, en noz demaines,, deus mile lb. tur. à departir entr’ eles selonc le sens et l’ ordenance de noz executeurs.· 16 À huit-cens maladeries plus besoigneuses et plus chargiees dou rëaume, en noz demaines, deus \11 mile lb. tur.·
17 As Freres meneurs de Paris, cinc-cenz lb. tur. por fere perpetuelment nostre anniversaire, et por establir un frere qui chantera por nous aprés nostre decés.· 18 À autres Freres meneurs, en noz demaines, sis-cenz lb. tur., à \12 departir par le conseill dou menistre provincial de France, et dou gardian et dou lecteur de Paris.· 19 As Freres preescheeurs de Paris, cinc-cenz lb. tur. por nostre anniversaire fere, et por establir un frere autresi comme il est dit des Fre\13res meneurs.· 20 À autres mesons des Freres preescheeurs ou rëaume, en noz demaines, sis-cenz lb. tur., à departir par le conseill dou prieur provincial de France· et dou prieur et dou plus ancian lecteur de Paris.·
21 À-l’ abbaïe de \14 l’ Umilité Nostre Dame delez Saint Cloout,, cinquante lb. tur. por fere perpetuelment nostre anniversaire.· 22 Au prioré de Saint Morise de Senliz,, cinquante lb. tur. por faire autresi nostre anniversaire.· 23 As sereurs Saint Dominique delez Mont\15argi,, cent lb. tur. por fere ausi nostre anniversaire.· 24 As sereurs de cele ordre meisme delez le pont de Roam, cinquante lb. por fere ce meismes.· 25 À l’ abbeïe de Fontevraut, por ce meismes,, cent lb. tur.· 26 As priorez de cele ordre \16 meismes, en noz demaines, trois-cenz libr. tur. à departir selonc le sens et l’ ordenance de noz executeurs.· 27 À l’ abaïe de Premonstré,, trente lb. tur. por nostre anniversaire fere perpetuelment.· 28 À l’ abaïe de Joieval, trois-cens \17 lb. tur. por fere perpetuelment nostre anniversaire, et por establir un chapelain qui chantera por nos.· 29 À l’ abbaïe d’ Aubecort,, vint lb. tur.· 30 As autres abbaïes de cele ordre meismes, en noz demaines, deus-cenz lb. tur. à depar\18tir selonc l’ ordenance de noz executeurs.·
31 À la meson de l’ ordre de la Trinité de Paris,, sexante lb. tur. por fere perpetuelment nostre anniversaire.· 32 À la meson de la Trinité de Fonteinebliaut,, quarante lb. tur. por fere ausi nostre anniversaire. \19 33 As autres mesons de cele ordre meismes, en noz demaines, sexante lb. tur. à departir selonc l’ ordenance de noz executeurs.· 34 As freres dou Val des Escoliers de Paris, sexante lb. tur. por fere perpetuelment nostre anniversaire.· 35 As mesons de cel \20 ordre meismes, en noz demaines,, sexante lb. tur. à departir par noz executeurs.· 36 À l’ abbaïe de la Victoire delez Senliz, sexante lb. tur. por fere perpetuelment nostre anniversaire.· 37 As nonnains de Nemos, quarante lb. tur. por fere autresi \21 nostre anniversaire.· 38 À l’ abbaïe Saint Victor de Paris, quarante lb. tur. pour-ce meisme.· 39 As freres des Sas de Paris, vint lb. tur.· 40 As freres dou Mont dou Carme de Paris, vint lb. tur.· 41 As Freres hermites de l’ ordre saint Guillaume de Mont\22rouge, vint lb. tur.· 42 As Freres hermites de l’ ordre saint Augustin de Paris,, quinze lb. tur.· 43 As freres de l’ ordre Sainte Croiz de Paris,, vint lb. tur.· 44 As freres de l’ ordre Nostre Dame de Paris, vint lb. tur.· 45 As filles Dieu et as repenties \23 de Paris, cinquante lb. tur.·
46 À la congregation des povres avugles de Paris, cinquante lb. tur.· 47 As escoliers de Saint Thomas dou Louvre, quinze lb. tur.· 48 As escoliers de Saint Honoré, dis lb. tur.· 49 As bons enfanz de \24 Paris, sexante lb. tur.· 50 À autres menuz escoliers de Paris, cent et cinquante lb. tur. à departir par le prieur des Preescheeurs et par le gardian des Freres meneurs de Paris.· 51 As povres beguines de Paris, vint lb. tur., À autres povres \25 beguines en nostre demaine, cent lb. tur. à departir par noz executeurs.· 52 À povres damoiselles et povres dames veves marier,, et à povres gentils hommes honteus soustenir en la terre de Gastinois et d’ Orlenois,, mil et ^[2] \26 cinc-cens lb. tur.· 53 À autres povres femmes marier ou assener, et orfelins et autres povres soustenir es autres terres dou rëaume, en noz demaines, trois mile lb. tur. à departir par l’ ordenance de noz executeurs.· 54 Por buriaus et solers a\27cheter, à departir as povres en noz demaines,, sept-cenz lb. tur.· 55 As oevres des yglises parroissiaus de Paris,, sis-cenz lb. tur. à departir par l’ ordenance de noz executeurs.· 56 À acheter aornemenz por povres yglises dou rëaume, en noz demaines, cent \28 et cinquante lb. tur. à departir par noz executeurs.·
57 Derechief, nos lessons à la mesniee de nostre ostel, trois mile lb. tur. à departir par noz executeurs, c’ est à-savoir à noz serjanz qui n’ avront eü nul guerredon de leur servise ou qui n’ a\29vront pas esté souffisanment guerredonné, si comme il savront que fera ^[3] à fere.· 58 Et requerons les chapelains de nostre chapelle de Paris qu’ il, aprés nostre decés, facent toz jors mes por nos chanter par un de leur chapelains chascun jor la \30 messe que l’ an chante por les trespassez,, et fere sollempnelment toz jors mes nostre anniversaire chascun an, le jor de nostre trespassement.· 59 Et nous, por-ce, leur donnons et lessons dis lb. tur. de rente à prendre en nostre prevosté de Paris chascun \31 an, le jor de l’ anniversaire.·
60 Derechief, nous donnons et laissons à l’ abaïe Saint Denis en France, là où nos eslisons nostre sepolture, por nostre anniversaire fere dou jor de nostre trespassement en avant,, quarante lb. tur. de perpetuel rente à pren\32dre le jor devant nostre anniversaire, chascun an, en nostre prevosté de Paris, en deniers por fere pitence au couvent le jor de nostre anniversaire.· 61 Et si laissons encore à l’ abaïe Saint Denis rente en cele meisme prevosté, por establir par noz ex\33ecuteurs un cierge qui ardra perpetuelment en l’ iglise Saint Denis.·
62 Derechief, nos laissons à Blanche, nostre suer, quatre mile lb. tur. à prendre chascun an au Temple, à Paris, tant comme ele vivra aprés nostre descés,, se \34 einsi n’ estoit que ele peüst recouvrer son doaire d’ Espaingne ;· 63 quar se ele le recouvroit,, nous volons qu’ ele cesse de prendre les quatre mile lb. tant comme ele porra joïr dou doaire.·
64 Et si, volons et commandons, que chascuns \35 des clers et des chapelains qui seront à nous ou tens de nostre trespassement, et ne seront porveü en benfice d’ Yglise,, aient chascun an de nostre hoir qui sera rois de France, vint lb. tur. de rente chascun an, tant qu’ il soient porveü par \36 nostre hoir en benfice d’ Yglise ou en autre souffisanment.·
65 Et por la grant devotion que nos avons à la Terre Sainte, s’ il avenoit, que Diex ne vueille, que nos trespassissions de cest siecle avant que nos eüssions fet nostre pelerinage d’ outremer,, 66 nos \37 lessons au secors de cele terre quarante mile lb. tur. à metre et à despendre ou porfit de cele terre par nostre hoir qui sera rois de France.· 67 Et se il en estoit negligent,, nous volons qu’ il en ce soient mis et despendu par ceus que nostre \38 executeur verront qui mieuz le porront et savront fere, selonc ce que cil nostre executeur en porront et savront mieuz ordener au salu de nostre ame.· 68 Et por l’ ame de la reine Isabel, jadis nostre femme, soient envoié ou secors de la Terre Sainte, au premier \39 general passage aprés nostre trespassement, dis chevaliers as despens nostre hoir, si comme nostre executeur ordeneront.·
69 Derechief, nos volons et commandons que toz les lés et les dons devant diz soient paié des biens que nos avrons ou rëaume de France ou tens de nostre de\40cés.· 70 Et à toutes ces choses tenir et acomplir, nos obligeons nostre hoir et nostre terre.· 71 Et volons et commandons que, se ceste nostre ordenance ne valoit comme testament,, qu’ ele vaille comme desreniere volenté, ou en autre maniere en quoi ele porra \41 mieuz valoir.·
72 Derechief, nos ordenons et commandons que, se aucunes choses estoient douteuses ou oscures en cest testament,, 73 que nostre executeur desoz nommé aient pooir,, et nos icelui pooir leur donnons,, d’ esclarcir et de fere ce qu’ il verront à fere por \42 le salu de ^[4] nostre ame.· 74 Et volons encore qu’ à noz torzfez prover, souffise tel preuve comme il leur samblera que bien soit.·
75 Et, de cest nostre testament,, nos establissons executeurs noz amez feaus Gui evesque de Lengres,· Thibaut· evesque de Dol,, les \43 abbez de Saint Denis en France et de Rëaumont,, noz amez cousins Jehan bouteillier et Imbert connestable de France,, mestre Jehan de Puiseuz, chanoine de Chartres, nostre clerc,, Pierre de Chambli et Jehan Poucin noz chambellans,· 76 as \44 quiex, quant à ceste execution fere,, nos volons et commandons, que nostre hoir qui sera nostre successeur ou rëaume, porvoie en despens ausi à eus comme à ceus qu’ il metront en leu d’ eus.· 77 Et se il tuit ne pueent ou ne vuelent estre à fere l’ execution,, ou se il avient \45 qu’’ aucuns d’ eus trespasse de cest siecle avant,, 78 la gregneur partie en nombre de ceus qui demorront,, ou trois de ceus,, ou, se tuit trespassoient,, li dui abbé et le tierz qu’ il voudroient apeler avec eus,, aient pooir de fere l’ execution de cest testament.·
79 En \46 tesmoing de laquel chose,, nos avons fet metre nostre seel à ces presentes letres.·
80 Ce fu fet à Paris, 81 en l’ an nostre Segneur mil deus-cens quatrevinz et quatre, 82 ou mois de marz.

Notes de fiche
^[a] Autre exemplaire : Paris AN : J 403 - Testaments I, n° 11^bis (minute, cf. RM 1285 03 32 01). Le premier testament de Philippe III de 1270 était écrit en latin (Paris AN : J 403 - Testaments I, n° 8).

Notes de transcription
^[1] Le « et» a été ajouté au-dessus de la ligne.
^[2] La conjonction est répétée au début de la ligne : « et».
^[3] Sic ! Comprendre « sera ».
^[4] Le « de » a été ajouté au-dessus de la ligne.