Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

chHM275

[avant 1277]

Type de document: charte: testament

Objet: Testament de Guillaume de Mauvilly chevalier, de Vaudrémont, et de Luque, sa femme.

Auteur: Guillaume de Mauvilly chevalier de Vaudrémont et sa femme Luque

Sceau: Guillaume et Etienne curé de Vaudrémont

Bénéficiaire: prieuré du Val-des-Ecoliers, etc.

Rédacteur: scriptorium de l'église de Vaudrémont? scriptorium du prieuré du Val-des-Ecoliers

Support: Parchemin jadis scellé de deux sceaux sur double queue

Lieu de conservation: AD HM, 11H 17 - Abbaye du Val-des-Ecoliers

Verso: Testamentum domini Guillermi de Vaudrimont militis (XIII^e s.)

1 In nomine Patris et Filii et Spiritus Sancti, amen. 2 Je, Guillaumes de Mavoillé chevaliers, de Vaudrimont, et ma dame Luque, ma feme, 3 por lou salut et por lou profit de nos ames, laissons et otroions an prope santé et an bone volanté:
4 Premieremant, as freres \2 dou Val des Escoliers,. ii. moiteons de fromant perpetuemant por nos anniversaires, à randre le jor de la-Seint Remi, 5 les quex Richarz ou si oir sunt tenu à randre à ce davan dit jor; 6 et sunt assignei sus la vigne dou valot de Barbeinval, qui est selonc la vigne Sebilote, 7 et sus \3 la terre qui est desoz, 8 et sus les aubres et sus la terre darriers Chasnoi, c'on dit l'Essart Bernart, 9 et sus l'ancinge darriers Chasnoi, delez Liebodel.
10 Et au freres dou Tanple, an Corgebuin,. iiii. meteons de fromant chacun an por no anniversaires à la Seint Remi, 11 les quez Jehanz, \4 li fiz Bertran, et Marie, sa feme, et lor oir sunt tenu à randre chacun an à-la Seint Remi; 12 et sunt assenei sus. i. piece de terre an Orseinval, delez Wgier, 13 et sus lou pré qui part à Lorant, qu'il ont de mon seignor Guillaume, qui siet pres dou parier mon signor Joifroy, \5 par deça, 14 et sus un jornel c'on dit au Bruel, delez Vuillaume.
15 Au curié de Vaudrimont,. iiii. meteons perpetuemant à la Seint Remi, les quex Bertranz ou si oir doient randre à ce dit jor; 16 et sunt assenei sus. iii. jornex de terre qu'il a an Barbeinval, selon mon signor \6 Guillaume, 17 et sus le val de Merival et sus son valot dou champ Coillart. 18 Et. i. mui de vin por chanter messes tojorz, et si-l'asenons à panre an la vigne de Gruot. 19 Et. iii. meteons de fromant, des quex Humbeloz li Rouiers ou si oir doit randre tojorz \7 au-davan-dit terme sus son jornel à la Ruelle; 20 et Marguarite, la feme Jehan Raguin,. ii. meteons, ou si oir, sus terre qu ele a au-Marchex 21 et sus son val desoz Deffois et sus sa terre desoz le costé de Chasnoy et sus sa cheneviere qui siet darriers la maison \8 Marie l'Esgaree et sus sa vigne de Faillonval, qui fu cele Marie; 22 et Bertranz ou si oir demi meteon sus cest assenemant; 23 et des. iii. meteons et dou demi nos volons que il n'an doient c'une amande.
24 = As freres de Mormant,. iii. meteons chascun an à la Seint \9 Remi; 25 s'an doit Lietoz randre deus meteons sus sa terre qui siet au Molinel, ou si oir, et sus sa terre qu'il a an la Loviere, 26 et sus. i. jornel qu'il a an la Ruelle; 27 et Harioz li Peletiers,. i. meteon, et si oir, sus un jornel qu'il a à-la-Fontenelle, selon Parison, lou \10 fil Liegenot.
28 = Aus freres de Biauroi lez Bar,. iiii. meteons à randre au davandit terme; 29 des quex Tiebaudés et si oir an doient randre un meteon sus un jornel darriers les jardins, delez la terre qui fu mon signor Anseri; 30 et Jobelés et si oir un \11 meteon sus. i. jornel qu'il a an Rossel, selon la terre qui fu Pince Haste; 31 et Humbelés, li fiz Boillot, un moiteon sus. i. jornel qui siet an Betonval, selon la terre Humbelot le Rouier, 32 et sus sa cheneviere qui siet delez la Jouenot, 33 et sus sa plante qui part à Blein\12chart, an Merival, 34 et sus le quart d'une forrere qu'il a an Orseinval, qui part à mon signor Guillaume; 35 Vautier, li fiz Humbert, et si oir, un moiteon sus. i. jornel qui siet an Betonval, qui contorne sus la terre Lorant Commart.
36 = Au prious de Saixefonteinne,. vi. \13 moiteons d'avoine sus tex parties com nos avons aus tierces de Saixefonteinne, à randre chacun an dedanz le Noel.
37 = Au prevoire de Marvoillé,. iii. s. de tornois chacun an à la Seint Remi sur quanque nos avons à Mavoillé.
38 = Au prevoire de Lonchamp et au [pre]\14voire de Malanville et au prevoire de Sirefonteinne, chascun. xii. d. chacun an à la Seint Remi; 39 si les panront à Arrenepont, au Baufle ou à ses oirs. 40 Au prevoire d'Aissé,. xii. d. 41 Au prevoire d'Orges,. xii. d. 42 Et li prestes d'Aissé panra ses. xii. d. an nos \15 censes de Vaudrimont. 43 Au prevoire de Seint Martin,. xii. d. 44 Et au prevoire d'Autreville,. xii. d. 45 Au prevoire de Monterie,. xii. d., les quex deniers Humbelés et Bleincharz ou lor oir doient randre à la Seint Martin an yver sus un jornel qui siet \16 an Betonval, delez la terre Martin, le fil Jaquot.
46 = Au prevoire de Gillancort,. xii. d.; ses panra à-Vaudrimont, sus les oirs Humbelot le Fornier.
47 = À Clerevaus,. x. livres de tornois et ma robe et mon lit et mon palefroi et le harnois \17 tel com je l'avrai au jor de mon decés. 48 Et au malades de l'anfermerie,. xv. moiteons de fromant. 49 Et au portier de leanz,. xv. moiteons de fromant por les povres trespassanz.
50 = Et aus filles de Bar,. iiii. moiteons de fromant. 51 Et au covant de \18 Seint Nicholas de Bar,. iiii. moiteons de fromant. 52 Et au priolé de la Ferté,. iiii. moiteons de fromant perpetuemant.
53 = À l'uevre Nostre Dame de Chastelvilein,. vi. moiteons de fromant.
54 = Au freres de la Genevroie,. vi. moiteons de fromant. \19
55 = À l'ostel de Mormant, un setier de fromant et. i. lit por les povres, an-tel meniere que li liz de plume demorra à-l'ostel et les dras dou lit avec.
56 = Et aus freres de Seint Jasque de Langres,. ii. muis de vin. \20
57 = Et au prevoire de Vaudrimont, sexante s. por mon lais.
58 = Et por l'uevre dou mostier,. x. libres de tornois, se l'an fait l'autel seint Jaque et apparoille comme por chanter messe; 59 et se l'an ne le faisoit, il n'i avroit que \21. c. s. 60 Et donons et otroions une lampe qui ardra davant l'autel seint Jaque à tojorz; 61 et se li autex n'estoit si tost faiz, elle ardroit davant Nostre Dame jusque li autex seroit faiz; 62 et quant l'an i chantera, \22 on la merra davant seint Jaque; 63 et nos assenons ceste aumosne sus nostre champ de la Fontenelle.
64 Et je, mes sire Guillaumes, vuel et otroi que, lou jor de ma seposture ou l'andemein, c'on doint à-mangier à. xx. prevoires, \23 65 et au depart que chascuns ait. ii. s.; 66 et se il ne puent tuit chanter an ceste ville, que chacuns face mon servise an sa paroche; 67 et à. xx. clers, que diacres que sodiacres, chascun. xii. d., por lire sautiers por moi. \24
68 = Et se vuel et otroi que l'an doine à-mangier à. xx. mesiaux, 69 et aprés mangier, chascun. xii. d.; 70 et s'il n'i-a tant de mesiaux, c'on preinne des mesaiaisiez.
71 = Et que l'an face le pain de. xvi. moiteons de fromant c'on doigne à-povres \25 genz quant il sera plus granz mestiers dedanz l'annee.
72 Et por toz mesfaiz de quoi je ne sui remambranz, je doins. x. livres à-povres gentis homes por robes acheter où il sera plus granz mestiers, à-l'antré de l'iver, \26 73 et. xii. d. à une lanpe aidier à soigner à Seint Nicholas d'Aisanville.
74 Et an-aprés, nos volons et otroions que tuit cil à cui nos avons laissié ces fromanz por nos anniversaires, que il ou autre por aus soient à recevoir de \27 ces blex davan diz au jor que il est devisé; 75 et que il les preinnent et reçoivent an nos censes c'om nos i doit. 76 Et cil qui doivent cest davant-dit fromant, il le paieront à ces tant com il est devisé et non pas à nos oirs. \28 77 Et se il avenoit chose que cil qui doient ces censes de fromanz et de deniers defaussissient de paiemant au-dit jor de la Seint Remi à ceaus à cui ceste aumosne est faite, 78 qu'il puissent ausi bien guagier des amande et des \29 chatex ausi com je, mes sire Guillaumes feisse se je fusse an ma prope santé, s'an mi defaillist.
79 Et s'il avenoit que je, Guillaumes n'alasse outremer, je doins et lais. xx. lb. de tornois c'on danroit à. i. pouvre gentil \30 home qui feroit le pelerinaige por moi, 80 por acheter une armeure, fust chevaliers, fust escuiers, por avoir le pardon.
81 = Et si doing et otroi à-l'Ospital de Jherusalem. ii. meteons de fromant à-tojorz; 82 si le panra li commande\31manz d'Escurri chascun an à Vaudrimont, sur nos censes, à la-Seint Remi.
83 Et je et Luque, ma feme, devisons ces choses por nos anniversaires et por nos aumosnes, 84 et si metons et acompeingnons Marguerite, la feme Jehan, nostre \32 fil. 85 Et si faisons à savoir que Jehanz, nostre fiz, ne fu onques partiz de nos, et que, se il se fust partiz de nos, il anportast la moitié de mobles et des acaiz qui sont fait des que il pris sa feme; 86 mes il ne vuet mie la par\33tie, ainz vuet que nos an faciens totes nos volantez. 87 Et si requerons por Deu que tantost que li anniversaire seront receu chascun an, c'on face nostre servise dedanz le tierz jor aprés. 88 Et si faisons à savoir que aprés nostre decés, que \34 tote la remenance sera à Jehan, nostre fil, sanz autre contredit et sanz partie de ses serors. 89 Et je, Guillaumes vuel que, se je muir davant ma feme, totes ces choses serient departies sanz contredit; 90 et se ma feme moroit davant \35 moi, elles ne serient departies que la moitié. 91 Et de ces choses nos faisons executors dou prious dou-Val des Escoliers et dou prious de Biauroi.
92 Ou tiemoignaige de la quel chose, je, davandiz Guillaumes, \36 et Estienes, curez de Vaudrimont, avons mis nos seaux à ceste execucion.