Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

chHM274

[avant 1275], février

Type de document: charte: promesse

Objet: Promesse faite par Gauthier seigneur de Laferté-sur-Amance chevalier, de se porter garant pour une partie de la dîme de Velles, vendue à l'abbé et au couvent de Vaux-la-Douce par feu son frère Henri avec l'ensemble de ses revenus sur les tierces et les dîmes du lieu, et pour laquelle le vendeur aurait dû remettre aux religieux les lettres d'accord de l'évêque de Langres dont la dîme relevait; au cas où ce dernier en revendiquerait tout ou partie, Gauthier assignerait à l'abbaye une rente équivalente sur ses propres tierces de Chaumont.

Auteur: Gauthier seigneur de Laferté-sur-Amance chevalier

Sceau: auteur et Pierre Gaste-avoine bailli de Chaumon

Bénéficiaire: abbaye de Vaux-la-Douce

Rédacteur: scriptorium de l'abbaye de Vaux-la-Douce

Support: Parchemin jadis scellé de deux sceaux sur double queue

Lieu de conservation: AD HM, 30H 6 - Abbaye de Vaux-la-Douce

1 Je, Gautiers, sires de la-Fertei sus Amance, chevaliers, 2 fas savoir à tous ces qui verront et orront ces presentes lettres 3 que, cum mes \2 sires Henriz, mes freres, sires de Ville sus Amance, chevaliers, qui mors est, ait vendui es religious barons l'abbei et le convant \3 de Douces Vaus 4 ses rentes de Ville sus Amance en dimes et en tierces, 5 et il i ait aucune partie dou dime de \4 Ville et dou finaige pour la quel mes diz freres lor convanta et promit à baillier les lettres mon segnor l'evesque \5 de Langres, et il ne lor ait pas baillies, 6 je, qui vuel delivrer et acquiter mon dit frere Henri et assevir pour lui \6 ce que il n'a pas assevi à sa vie es davant diz abbei et convent, 7 lor promet et sui tenus dou garantir vers \7 mon segnor l'evesque de Langres les davant dites dimes, se neant lor en demandoit. 8 Et se je ne lor pooie \8 garantir vers le dit evesque de Langres, je lor doi et sui tenus par ma foi corporelment donee de asseoir et \9 de delivrer autretant en mes tierces de Chaumont cum li diz evesques lor en demanderoit, et dont il ne \10 porriaint joïr, 9 ou autre part en ma terre, au regart de proudommes, que il s'en tenront bien à paié; 10 et ce lor garan\11tirai je et apaisserai vers totes gens, et de ce faire obligoi je moi et mes hoirs. 11 Et pour ce que ce soit ferme \12 chose et estable, je ai mis mon sael en ces presentes leitres, et avec le mien sael je ai fait mettre le sael Pier\13re Gaiste Aveinne, bailli de Chaumont. 12 Et je, Pierres Gaste Aveinne, bailli de Chaumont, à la requeste dou dit \14 Gautier, segnor de La Fertei sus Amance, chevalier, ai mis mon sael en ces presentes lettres avec son sael, en tesmoing\15naige de veritei. 13 Ce fu fait quant li milliaires corroit par mil .CC. sexante et .IIII. ans, on mois de \16 fevrier.