Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

chHM273

1270, 13-30 avril ou 1271 (n.st.), 1-4 avril

Type de document: charte: substitution

Objet: Substitution, sous réserve de l'accord du seigneur de fief, en vertu de laquelle Philippe seigneur de Chauvirey, reprend deux rentes levées sur les dîmes de Chauvirey et de Grenant, l'une de trois muids et demi de grain, moitié froment, moitié avoine à la mesure de Chauvirey, l'autre de un muid de froment à la mesure de Grenant, données par feu son père et par lui-même à l'abbé et au couvent de Beaulieu qui reçoit en échange, avec le consentement de Marguerite, femme de Philippe, la moitié des tierces et des grosses et menues dîmes perçues sur les labours ou à percevoir sur les futurs essarts de Bussières, les religieux s'occupant librement de la levée de leur part et le donateur mettant à cette occasion à leur disposition une maison à Bussières; Philippe octroie également pour les bergers et les convers de l'abbaye menant leurs bêtes en pâture à Bussières le droit d'usage dans les bois du lieu, limité pour le bois de "Val Morigné" au ramassage du bois mort jusqu'à la levée du ban.

Auteur: Philippe seigneur de Chauvirey

Sceau: auteur et Charles abbé de Faverney

Bénéficiaire: abbaye de Beaulieu

Rédacteur: scriptorium de l'abbaye de Beaulieu

Support: Parchemin jadis scellé de deux sceaux sur double queue

Lieu de conservation: AD HM, 2H 2 - Abbaye de Beaulieu

Verso: Littera terciarum de Buxeriis (XIV^e s.)

1 À toz ces qui verront et orront ces presentes lettres, 2 je, Philippes, sires de Chauviré, salut en Notre Signor. 3 Saichent tuit cil qui sunt et qui \2 seront que, cum je et mui hoyr fussiens tenu à paiier et à baillier chacun an à toz jorz mais à l'abbé et au couvent de Biau Lui, de l'ordre de Citeaus, \3 de l'eveschié de Lengres, ou à lor coumandement, 4 troys muis et demei de blé, par metié frement et avone, à la mesure de Chauviré, 5 et un mui de froment \4 à la mesure de Grenant, en mes dimes de Chauviré et de Grenant, 6 por raison des aumornes que mes peres lor fit por lui et por Guiot, mon frere, et \5 por rayson de l'aumorne que je lor hai faite, assise à Grenant, les quex aumornes je lo et outroi et confermoi, 7 je, en eschange et en permutation des dites \6 aumornes, par le lox et par le consentement Marguerite, ma fenme, baylloi, doen et assié es davant diz abbé et au couvent 8 la moitié entierement \7 de totes les tierces et de toz les dimes gros et menuz que j'ai à Buxeres et en tot le finayge et es pootez de la dite vile, 9 et que je i-pourroie ou \8 devroie avoir dès or en avant de toz ces qui eissarteront ou gaainneront en la pooté et ou finayge et en la dite vile de Buxeres, de queque vile ou \9 de queque lui que li cultivaor soient, 10 sauf ce que, es tierces et es dimes que je ou mui hoir aquirrons dès or en avant en la dite pooté, li diz abbes \10 et li couvenz n'i penrront neant; 11 et vuel et outroy qu'il puisset traire freinchement la dite moitié et recivoir le compe des gaannaors ou amoesener \11 à un de mes honmes de Buxeres; 12 et quant li diz abbes et li convenz trairont ou feront traire la davant dite motyé, je et mui hoir lor devons prester \12 mayson suffisant en la vile de Buxeres por le traire.
13 Aprés, cum li davant diz abbes et li couvenz aient et doient avoir la vene pasture por totes menie\13res de biautes, grosses et menues, en tote la pooté de Buxeres, par le damaige rendant, senz encuson et senz paiier amende, 14 je doen et vuel et outroi, par \14 le lox et par le conssentement de la dite Marguerite, ma fenme, 15 que li bergier, li pastor et li convers à l'abbé et au couvent aient à-toz jorz mais lor usaige \15 en toz les bois de la dite pooté et en totes menieres de bois, 16 por pargues et por borde faire suffisant por lor pators et por lor biautes, et por ardoir, et por totes \16 autres aiisances des pastors et des biautes qui seront ou dit lui, 17 fors le boç de Val Morigné où il ne penrront mes-que le boç gesant tant cum je et mui hoir le \17 tienrrons en banc, 18 et quant il-sera desbanniz, il-i-pourront user cum es autres.
19 Et totes ces choses davant dites promot je, por moi et por mes hoirs, à-tenir et à-garder en-bone \18 foi, et que je nen irai encontre par moi ne par autru, ne sufferrai qu'autres i voise. 20 Et promot par ma foi fiancie es diz abbé et au couvent porter garantie de totes ces choses davant \19 dites, en jugement et fors jugement, vers totes genz, et espicialment contre le signor dou fié. 21 Et s'il avenoit que li sires dou fié troblest ou travaillest les diz \20 abbé et le couvent suis la dite moitié des tierces et des dimes, ou qu'il la sasissest, 22 je et mui hoir qui tenrront Chauviré sumes tenu dou delivrer et de \21 faire quiter à l'abbé et au couvent desuis nommez, dedanz dous mois aprés la requate l'abbé, la moitié desuis dite; 23 et se je ou li dit hoir ne poviens ce faire, je vuel \22 et outroi que li abbes et li couvenz preignent quitement et frainchement les davant dites aumornes es diz dimes de Chauviré et de Grenant, 24 et que je et mui \23 hoir lor soiins tenu de paiier les dites aumornes es diz dimes, 25 et de rendre les damaiges et les despens que li diz abbes et li couvenz feroient ou avroient \24 aprés les davant diz dous mois por enchié de ces choses, se je ou mui hoir ne lor poiens garantir; 26 des quex damaiges et despens l'abbes de Biau Lui seroit craüz par \25 son sairement, senz autre pruove. 27 Et coument que la chose aille, les davant dites patures et li usaige des bos, si cum il sunt desuis devisé, doivent demorer parmaigna\26blement à-l'abbé et au couvent desuis nonmez. 28 Et me deviés de la dite moitié des tierces et des dimes, et les diz abbé et le couvent en reviés par ces \27 lettres. 29 Et renonçois en ce fait à tote aiide de canon et de lois, à tot estaublissement, à tote cotume, à tot privilige et à tote grace et à tote autre raison qui me \28 pourroit aiidier por venir encontre ces choses et es diz abbé et au couvent nuere.
30 En tesmoignaige des quex choses, je hai mis mon seel en ces presantes lettres \29 avo le seel le religious honme l'abbé de Faverné que g'i hai prié à motre. 31 Et je, davant dite Marguerite, qui totes ces choses lo et outroi et promot par ma foi fiancie \30 qui nen-irai encontre por raison de douaire ne por autre raison, quex qu'ale soit, 32 por ce que je n'ai propre seel, hai prié le davant dit religious honme qu'il mote por \31 moi son seel en ces presantes lettres. 33 Et nos, freres Caules, davant diz abbes de Faverné, à la priere et à-la requate dou davant dit signor de Chauviré et de \32 dame Marguerite, sa fenme, avons mis notre seel en ces presantes lettres, en tesmoignaige de totes les choses desuis dites. 34 Ce fui fait en l'an de grace \33 .MCC. et. LXX., ou mois d'avri.