Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

chHM242

1269, juillet

Type de document: charte: fondation

Objet: Acte identique au n^o 238, sans mention de la prestation de serment à l'abbaye de Cluny et au prieuré de Marmesse.

Auteur: Jean seigneur de Châteauvillain et de Luzy

Sceau: auteur

Bénéficiaire: Saint-Jean-l'Evangéliste de Châteauvillain

Rédacteur: scribe de Jean seigneur de Châteauvillain et de Luzy? scriptorium de Saint-Jean-l'Evangéliste de Châteauvillain

Support: Parchemin jadis scellé sur double queue

Lieu de conservation: AD HM, 2G 928 - Chapitre de Châteauvillain

Verso: Littera de .XV. lb. suz les fretaiges et de .XXIIII. lb. suz la taille de Blessonville (XIII^e-XIV^e s.)

1 Je, Jehanz, sires de Chatiavilain et de Luzei, 2 faz savoir à touz ceaus qui sunt et qui serunt 3 que, veullanz et desirranz acroistre le servise Deu, acroi et ai escreu en m'yglise \2 de Saint Jehan Euvangeliste de Chatiauvilain, 4 et fonde et ai fondees trois prevandes dou nombre outre celui qui ja i estoit, 5 la valor de chascune prevande treze livres de tornois \3 forz, 6 des quex trois prevandes je et mi hoir seingnor de Chatiavilain summes et serons patron, 7 et retenons le don et la collatiom ensi cum des autres prevandes qui \4 ja i estoient. 8 Pour les queles trois prevandes j'ai assis et aissiei à ma dite yglise quinze livres de tornois forz de perpetuel rante, à-panre et à recivoir de chanoinnes \5 de ma dite yglise ou de lor commandemant, franchemant, sur mes fretaiges et sur mes autres cens c'on paie et aporte à Chatiavilain le jor de la feste saint Remei \6 antrant ouctoubre; 9 et veul et outroi que cil qui recivra les diz fretaiges et les diz cens pait et rande les davant dites quinze livres es mes davant diz chanoinnes \7 ou à lor commandemant sanz jemais parler à-moi ne à mes hoirs, 10 et qu'il ne puisse ne doie riens baillier ne delivrer ne à-moi ne à mes hoirs jusque tant que mi \8 dit chanoinne soient paiei enterinemant des desus dites quinze livres; 11 et s'il avenoit par avanture, que je Dex ne doint, que li dit fretaige ne li dit cens \9 ne vaillissient les davant dites quinze livres, je et mi hoir seriens tenu à-paier et asoioir le defaut en bone foi en autre liu soufisant. 12 Et lour assiei \10 et si lor ai assis anquores vint et quatre livres de tornois forz de perpetuel rante sus ma taille de Bleçonville, 13 à panre et à recevoir de mez diz chanoinnes \11 ou de lor commandemant, frainchemant, dedanz la feste saint Berchaire de Chatiavilain; 14 et veul et outroi que cil qui recivra la dite taille pait et rande es diz chanoinnes \12 ou à lour commandemant les dites vint et quatre livres sanz jemais parler à moi ne à mes hoirs, 15 et que je ne mi hoir n'en puissins riens recevoir jusque tant que mi dit \13 chanoinne en soient paiei enterinemant chascun an des dites vint et quatre livres; 16 et s'il avenoit par avanture que la taille ne vaussit les dites vint et quatre \14 livres, je et mi hoir seriens tenu à paier et asoioir en autre liu sofisant le defaut. 17 Et est à-savoir que je lor puis asoioir et asener en autre liu soufisant \15 en bone foi les dites vint et quatre livres toutes les foiz que je vorrai; 18 et si tost cum je lor avrai assises les davant dites vint et quatre livres en autre liu \16 sofisant, ma davant dite taille demorra à moi et à mes hoirs quitemant. 19 Et veul et outroi que li dit troi chanoinne et lor successor aint totes les \17 graces que j'ai donees, outroies et porchacies es autres chanoinnes qui ja i estoient. 20 Et est à-savoir que li dit troi chanoinne cui j'ai donees les davant \18 dites trois prevandes et lour successor cui je et mi hoir danrons les prevandes doient jurer feautei et leautei à moi et mes hoirs seignor de \19 Chatiavilain, 21 et feauté et leautei es estaublissemanz de ma dite yglise, ensi comme mi autre chanoinne qui ja i estoient ont fait ançois qu'il soient re\20ceu en chanoinne. 22 Et toutes ces chouses je premet à-tenir fermemant et leaumant et à-bone foi, et en oblige à ma dite yglise moi et mes hoirs et \21 nos biens, sauve la garde et la justise à moi et mes hoirs en lor biens tamporelx.
23 Et por ce que ce soit ferme chouse et estauble, j'ai mis mum sael \22 en ces presentes lettres. 24 Ce fuit fait en l'an de Nostre Seingnor mil et dus cenz et sexante nués, ou mois de julet.