Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

ChHM177

1264, juillet

Type de document: charte: engagement

Objet: Engagement par Jean seigneur de Joinville, Aalis, sa femme, Geoffroy et Jean, leurs fils, de respecter la sentence arbitrale de Guerri, curé de Saint-Dizier, et de Thierry Damele chevalier, confirmant les droits d'usage accordés aux hommes de Saint-Urbain et au prieuré Saint-Ame dans les bois de Mathons et de la "Voie Nuisant", et réglementant les droits et les profits du sénéchal sur les hommes de l'abbaye, ainsi que les redevances dues à son prévôt de Joinville à l'occasion des foires de Saint-Urbain, de Profonde-Fontaine et de Maizières-lès-Joinville.

Auteur: Jean seigneur de Joinville, Aalis sa femme

Sceau: auteurs abbé d'Ecurey, doyen de Saint-Laurent de Joinville, les deux arbitres, Guerri et Thierry Damele

Bénéficiaire: abbaye de Saint-Urbain et prieuré Saint-Ame

Rédacteur: scriptorium de l'Saint-Urbain? chancellerie de Jean seigneur de Joinville

Support: Parchemin jadis scellé de six sceaux sur cordonnets alternativement rouge, vert, jaune

Lieu de conservation: AD HM, 9H 43 - Abbaye de la Crête

Édition antérieure: Wailly, Chartes..., H, p. 565; Mémoire..., H, p. 149

1 En non dou Pere et dou Fil et dou Saint Esperit, amen. 2 Je, Jehans, sires de Jainvile et seneschauz de Champaigne, et je, Aalis, dame de Jainvile, 3 faisons savoir à-touz 4 ke, cum descorde fust entre l'abbey et lou convent de Saint Ourbain d'une part, \2 et nous d'autre, 5 sus plusours entrepresures que nous requereiens enver aus et il enver nous, 6 à-la-parfin, par lou conseil de bounes genz, fu acordey entre nous en-teil maniere que nous oitroiereiens et consentireiens, et asseurames que nous gardereiens et tenreiens \3 fermemant à-touz jours mais ce que mes sires Guerris, cuireiz de Saint Disier, et mes sires Thieris Damele chevaliers, arbitre esleu et nonmey pour l'une partie et pour l'autre, diroient et ordeneroient sus touz les descors que nouz aveiens ou poueiens avoir, 7 ça en-arriers jusqu'au \4 jour que ces lettres furent faites, li un enver les autres. 8 Et li dui arbitre desus dit, en non de Deu et par le conseil de bounes gens, ont ordeney en-teil maniere:
9 Nous, Guerris, cureis de Saint Desier, et Thieris Damele chevaliers, 10 faisons savoir à-touz 11 que, cum descorde \5 fust entre l'abbei et lou convent de Saint Ourbain d'une part, et Jehan, seignour de Jainvile et seneschau de Champaigne, d'autre, 12 sus pluisours entrepresuires que l'une partie requeroit enver l'autre, 13 à-la-parfin, par lou conseil de bounes gens, fu ordenei entre les dues \6 parties en-teil meniere 14 que les deus parties s'oitroierent et se consentirent, einsi qu'i fu asseurei de l'une partie et de l'autre, qu'i tenroient et garderoient fermemant à-touz jours mais 15 ce que nous, dui arbitre esleu par lou consentement de parties diriens et \7 ordeneriens sus touz les descors que les devant dites parties avoient l'une enver l'autre, ou pouoient avoir, ça en arrier jusqu'au jour que ces presentes lettres furent faites.
16 Et nous, en non de Deu, dou conseil de bounes gens, avons ordenei et ordenons en teil \8 meniere que mes sires de Jainvile otroie, conferme et apprueve, et de ce fait ses lettres, 17 que li sires de Jainvile ne sui oir ne puent ne ne-doient reclamer ne par-droit ne par coustume nul charroi enver l'iglise, ne en-la-terre ne enz houmes Saint Ourbain; 18 ne li \9 sires de Jainvile ne sui hoir ne puent ne ne doient panre honme ne fame de la-terre Saint Ourbain, se par l'abbei non, se pris n'estoit à-present fourfait. 19 Et encor est ordeney que li sires de Jainvile ne sui hoir ne sui sergent ne puent ne ne-doient panre \10 en la terre Saint Ourbain, ne en l'iglise, ne en houmes de la-terre Saint Ourbain ne en-lour choses, tailles ne rueves ne demandes ne exactions, ne par force ne par-droit ne par coustume. 20 Et est à-savoir que l'abbes de-Saint Ourbain doit à prevost de Jainvile, \11 pour lou seignour de Jainvile, à-chascune des deus foires saint Ourbain, cinc souz; 21 et de Parfonde Fontainne, le jour de Noeil, douze deniers; 22 et de Maisieres, douze deniers ce jour meismes. 23 Aprés, li chien ne li veneour lou seignour de Jainvile ne à-ses \12 hoirs, qui ont lou giste une foye l'an en aucunes viles ou li dis abbes et li convens ont part, li honme Saint Ourbain n'en doient paier mais que ce qu'a aus en afferra selonc ce qu'il sont en-la-vile; 24 et lou doient lever raignablement li veneour et sens outrage; \13 25 et se il fasoient point d'outrage, li sires de Jainvile lou paieroit; 26 ne n'ont point de disneie en-la-vile l'endemain. 27 Aprés, est ordenei que li honme de la-terre Saint Ourbain ne doient aler, ne par-droit ne par coustume, faire lou hourdement à Jainvile \14, ne ne les en doit on constraindre, ne ne puet; 28 ne li sires de Jainvile ne sui hoir ne puent ne ne doient retenir nus des honmes de l'iglise Saint Ourbain, et si ne-puent ne ne doient panre nule chose de l'iglise ne de la-terre ne des houmes \15 Saint Ourbain, se par la volantey de l'abbei de Saint Ourbain non. 29 Aprés, li houme de la-terre Saint Ourbain qui sont en la-garde lou seignour de Jainvile ne doient point de paiage en-la-terre lou seignour devant dit.
30 Et l'abbes et li convens \16 de Saint Ourbain doient et puent panre, pour la teulerie de Sonbru refaire, marrenier et maintenir, ce que mestier sera en-grant bois de Maaston de la la-Voie Nuisant, 31 fors que ou-deffois de La-Nuevevile et ou-deffois darriers lou chastel. 32 Et li deffois de la-Nueve \17 Vile desus dis dure dès la-voie qui vat des lou Val de la-Roche jusqu'à la Nuevevile, et dès la-voie qui va de La Nueve-Vile jusqu'à la-voie Saugnaire, 33 laquez voie Saugnaire va des les Barbarans jusqu'à Chermes la-Grant; 34 et duire li dis deffois dès lou \18 Val de la Roche par la-voie qui va à Brachei jusqu'à la voie Saugnaire; 35 et dedans ces voies est li deffois de la-Nuevevile. 36 Et li deffois derriers lou chastel duire de darriers lou chastel de Jainvile ensi com il se-pourseut entre lou Vau Raou \19 et lou Vau de Wassey jusqu'à lou Vau Joffroi; 37 et entre ces trois valeies et lou chastel est li deffois darriers lou chastel. 38 Et doient et pueent panre lou venteis et les remasons en ce meesmes bois pour afouer la teulerie devant dite, \20 et lou bois bateis tout à-taille, là où cil de la vile de Saint Ourbain ont lour ysouaire. 39 Aprés, se li abbes de Saint Ourbain et li convens prangnent les desmes es essars qui seront fait en Maaston, li sires de Jainvile ne sui hoir ne lour en puent \21 aler à-l'encontre, ne ne doient. 40 Et volons ancor et ordenons que li dis abbes et li convens de Saint Ourbain aient pour lou cors de l'abbeye, pour les edefices et pour toutes les officines qui sont et seront ou clos de la-dite abbeye, 41 et pour \22 les fours et pour les pressours de la vile, pour les molins et pour les escluses de Watrignevile, pour l'aisemant des molins et des ventaus des dis molins et pour lou pont tant con li molin et li ventaul pour-praignent, 42 et pour la chapele \23 et pour ses edefices, et pour lou pont qui est sus Marne davent la chapele, pour la maison de Bleecourt, pour la maison de Nonmecort, pour la bergerie asonc la-vile de Saint Ourbain, et pour toutes lour aaisances de touz lour edefices que il ont ou porroient \24 avoir en l'abeye et en la-vile de Saint Ourbain et en davent dis leus, 43 aient lour ysouaires par toute Maaston, fors que en deffois de La Nuevevile et en-deffois darriers lou chastel, qui sont desus devisei. 44 Et volons ancor et ordenons que li houme de la \25 vile Saint Ourbain aient lour usages à-toutez lour aaisances ou bois batteis de Maaston par devers Sonbru jusqu'à la Voie Nuisant; 45 et li four de la vile Saint Ourbain qui sont fors dou clos de l'abbeye ne puent user pour affouer fors que en \26 bois batteis, la où li honme de la vile usent. 46 Et est à-savoir que li sergent lou seignour de Jainvile et li forestier puent panre et gagier les gens de l'iglise Saint Ourbain, s'i les truevent es deus deffois devant dis, et en-seroient creu as us et à-coustu\27mes dou païs; 47 et se aucuns de sergenz jureis voloit dire contre les gens de l'iglise Saint Ourbain que il eussent menei ou fait mener buche ne marrien dou bois de Maaston en autre leu que en leus qu-i y-ont lour ysouaires, ansi com il est devant dit, il n'en se\28roit mie creu se il n'avoit tesmoignage avec lui qui l'eust veu deschargier. 48 Ancor est à-savoir que l'iglise de Saint Ourbain ne les apartenances ne doient panre en la-forest de Maaston point de chaine ne de perier ne de poumier pour ardoir, se remason ne sont, et se il \29 vuelent fou pour airdoir, il convient que il lou prangnent tout à-taille et à-aire, gros et graille, einsi com il vient, se ne sont li remason des marriens que mestier lour averont; 49 et pour faire toutes lour autres usines et aaisances es leus devant-dis, il puent panre \30 toutes menieres de bois en Maaston, et remasons ausi, fors que es deus deffois desus dis. 50 Et volons encor et ordenons que li prioleis de Saint Ame ait son ysouaire en-toute Maaston, fors que es deus deffois devant dis, pour ces molins de Saint Ame, \31 pour ces folons, pour ces escluses et pour les pons qui i-sont; 51 et ou Waut de Moutier sus Saut, qui est mon seignour de Jainvile, ausi pour les molins, pour les folons, pour les escluses et pour les pons de Sainte Ame. 52 Et se li cors de l'abaye Saint Ourbain \32 usoient au plus pres d'aus en une partie dou bois, ou il laissassent à-user par tout, ne perderoient il mie pour ce lour ysouaires devant dis. 53 Et se on-pregnoit à-tort les charretes de l'abbaye Saint Ourbain ou bois de Maaston, li sires de Jainvile seroit tenus \33 à-lour desdamagier.
54 Et ordenons encor que les chartres de Saint Ourbain demorent en auteil pooir com eles estoient au jour que nous preimes la mise sor nous, fors les articles qui sont nonmei en-ceste lettre. 55 Et toute ceste ordenance davent dite \34 li sires de Jainvile conferme par sa lettre, et la promet par son sairement à-garder, et en oblige lui et ses hoirs, ses biens et les biens de ses hoirs, et la fera otroier à-saeler, à-jurer et à-garder à-sa femme et à-ses anfans. 56 Et pour ceste chose meismes \35 se doit il sousmetre especiaument en la juridiction de l'esveke de Chaalons et de l'esveke de Toul, que il, s'i defailloit en aucunes de ces choses ou en toutes, que il lou puissent escoumenieir et sa terre mettre en-entredit, et agrever aprés selonc ce que drois apor\36teroit. 57 Et volons ancor et ordenons que li devant dis sires de Jainvile s'oblige à-ce, lui et ses hoirs, par son sairemant, que quiquionques sera d'or en avant sires de Jainvile doie renouveler et confermer dedans lou premier an ceste ordenance. 58 Et ordenons \37 encor que li abbes ne ses commandemans ne puient ne ne doient mener ne faire mener lou bois de Maaston ne dou Waut fors que leus desus dis qu'i[l] i-ont lour ysouaires. 59 Et toutes ces convenances doient li abbes qui or est, et cil qui aprés lui venront, \38 jurer et faire jurer aus prious de Saint Ame et à-lour commandemans qui useront en-la-forest; 60 et li sires de Jainvile lour doit jurer et faire jurer à-son provost et à ces forestiers. 61 En tesmoignage de la quel chose, nos avons saaleies ces lettres de nos \39 saés. 62 Ce fu fait à Saint Desier, en l'an de grace mil dou cens et sexante-quatre ans, ou-mois de jullet.
63 Et nous, Jehans et Aalis devant dit, loons et ottroions, confermons et aprovons toutes ces choses desus dites et diviseies, et les avons promises \40 et prometons à-tenir et à-garder fermemant et leiament, 64 et ce avons nous jurei sour sains et fait jurer nostre prevost et à-nos fourestiers de Jainvile; 65 et li seignour qui tenront Jainvile et li prevost et li forestier, ainsi com il venront li uns aprés \41 les autres, feront cest sairemant aus abbeis dedans l'an, einsi com il venront li uns aprés l'autre à-Saint Ourbain. 66 Et je, Joffrois et je, Jehans, fil au seignour de Jainvile, avons jureies ces choses à-tenir et à-garder fermemant; 67 et pour ce que nous \42 n'aviens nus seaus, je, Joffrois, i ai fait mettre lou seel l'abbey d'Escurei, et je, Jehans, i ai fait mettre lou seel lou deyen de Saint Lorent de Jainvile. 68 Et je, Jehans, sires de Jainvile et seneschaus de Champaigne, et je, Aalis, dame de Jainvile, \43 et nous, Joffrois et Jehans desus nonmei, por ceste chose miaus garder et tenir, nous sonmes nous sousmis pour nous et por nos hoirs en la juridition de l'esvesque de Chaalons et de l'esvesque de Toul, que, ce nous defailliens ou aleyens encontre \44 de ces choses devant dites, de partie ou de tout, que il nous puissent escoumenier et nostre terre mettre en entredit, et agrever aprés selonc ce que drois aporteroit. 69 Et je, Jehans, sires de Jainvile et seneschaus de Champaigne, et je, Aalis, dame \45 de Jainvile, avons mis nos saés en ces presentes lettres avec les seaus des dous arbritres et avec les seaus de l'abbei d'Escurei et dou deyen de Saint Lorant de Jainvile, que li dis Joffrois et Jehans y-ont fait mettre par nostre volentei. 70 Ce \46 fu fait en l'an de grace mil dou cens et sexante quatre ans, ou mois de jullet devant dit.