Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

ChHM171

1264, mai

Type de document: charte: notification de vente

Objet: Vente au chapitre Saint-Jean-l'Evangéliste de Châteauvillain par Guillaume de Bricon, dit Matoilot, écuyer, fils d'Hélissent de Bricon, avec l'accord d'Isabelle, sa femme, moyennant 24 livres tournois, d'une rente payable chaque année avant la Saint-Martin sur sa part des profits d'un moulin sis à Orges, dit "Mulin an l'Aue", ou à défaut sur la part qu'il détient de la gete de Bricon, sous peine d'une amende de 2 sous tournois dont Guillaume sera redevable, passée l'échéance, à chaque réquisition des chanoines, la première exceptée.

Auteur: Jean seigneur de Châteauvillain et de Luzy

Sceau: auteur

Bénéficiaire: chapitre Saint-Jean-l'Evangéliste de Châteauvillain

Autres Acteurs: Guillaume de Bricon dit Matoilot, écuyer, fils d'Hélissent de Bricon

Rédacteur: scribe de Jean seigneur de Châteauvillain et de Luzy? scriptorium du chapitre Saint-Jean-l'Evangéliste de Châteauvillain

Support: Parchemin jadis scellé sur double queue

Lieu de conservation: AD HM, 2G 928 - Chapitre de Châteauvillain

1 Gié, Jehanz, sires de Chatelvillain et de Luzi, 2 faz savoir à touz ceaus qui verrunt et orrunt ces presentes letres 3 que, an ma presence por cen personemant \2 estaubliz, Guillaumes de Brecons, li-escuiers, diz Matoiloz, fiz ma dame Alisant de Brecons, a requeneu que il a vandu 4 vint et quatre moiteons de blef marcheant, \3 à-la-mesure de Chatelvillain, moitié frommant moitié avoine, à mes amez et à mes feaus es chenoines de l'ygleise de Seint Jehan Euvangeliste de Chatelvillain, 5 por \4 vint et quatre livres de tornois dun il se tient anterinemant por paiez an deniers conpanz; 6 et li-davant dit vint et quatre moiteons de blef sunt de rante \5 perpetuel chiefcun an à-panre et à-paier, dedanz la feste seint Martin an hyver, an sa partie qu'il a et atant à-avoir ou mulin d'Orges, c'un dit le-Mulin an-l'Aue. \6 7 Et se il avenoit par avanture que la partie que li diz Matoiloz a ou dit mulim ne soffeiset à-paier les davant diz vint et quatre moiteons de blef, il an anloe \7 an la-main es-diz chenoines sa partie qu'il a ou gete de Brecons ne atant à-avoir, por le deffaut, se point an i-avoit. 8 Et vuet et otroie li diz Matoiloz que \8 puiz la premiere foiz que mui dit chenoine ou lour commandemanz avront anvoié à Orges au dit mulin por recevoir le dit blef aprés la feste seint \9 Martin an hyver, 9 li-diz Matoiloz et sui oir paeroent et randroent dus souz de tornois por chiefcune faute que li-chapitres fera totes les foiz qu'il i-an\10voiera por querir et pour recevoir les diz vint et quatre moiteons; 10 et si paera au dit chapitre ces dus souz totes les foiz que il fauront, ou il ou lour \11 messaige, a lour paemant chiefcun an, si cum il est dit. 11 Et an plus grant seurtei de cen a-promis leaumant li diz Matoiloz, par sa foi corporel \12 bailie, de porter leaul garantie vers totes genz de ceste vandue es diz chenoines et au dit chapitre, 12 et que il n'an vanra à nul jour an contre, ne fera \13 venir par lu ne par autrui an tout ne an partie, 13 einz gardera an ceste chose les diz chenoines de touz domaiges et de totes missions qu'il conoive \14 ou dit mulin. 14 Et à cen tenir leaumant et farmemant il an anloe lui et ses oirs et touz ses biens que il tient de moi an fié, presenz et futurs, \15 15 et que sui oir, por chief de lui, tanront de moi ou de mes oirs an la main es diz chenoines et au chapitre. 16 Et pour le principaul et pour les-coutemanz \16 que li dit chenoine i-avroient, se nuns an i-avoient, li diz Matoiloz et sui oir sereint tenu à-randre touz lour domaiges, des quex om les croiroit \17 par lour simple parole sanz autre prueve. 17 Et doit om savoir que li diz Matoiloz ne sui oir ne doent ne ne puent riens panre ne recevoir an \18 lour partie dou dit mulim jouque mi dit chenoine et li-chapitres soient anterinemant paié tout avant de lour vint et quatre moiteons de blef. \19 18 Et an cen fait, a renoncié li diz Matoiloz à touz droiz, à totes lois et à-totes aides de-droit et à touz privileiges et à totes indulgences et à totes graces presenz \20 et à-venir, et à totes les choses qui porreint aidier au dit Matoilot ou à ses oirs an cen fait et nuire es-diz chenoines. 19 Et pour cen que li diz blez muet \21 et ast de mon fié, je, à la priere et à la requate dou dit Matoilot, ai volu et otroié la dite vandue.
20 Et an surtei et an confirmation de laquel chose, j'ai \22 mis mon sael pandant an ces presentes letres, à la priere et à la requate Matoilot et damoiselle Ysabel, sa famme, qui a volu et otroié la-dite \23 vandue, si cum aule est desus dite et devisee an touz poinz. 21 Cen fut fait an l'an de grace mil et dus cenz et soixante et quatre, ou mois de may.