Téléchargement du document

Documents linguistiques galloromans
Corpus : chartes de la Haute-Marne (chHM)
Responsable du corpus : Martin-D. Glessgen
Édition de la charte : Jean-Gabriel Gigot (révision: Jacques Monfrin et Lucie Fossier) / D. Kihaï

ChHM084

1258, septembre

Type de document: charte: fondation d'une chapellenie

Objet: Fondation par Simon seigneur de Châteauvillain, et par Jean, son fils, pour le repos de leur âme, de celles de leurs aïeux et de celle de leur chapelain Simon [Sébastien], de Châteauvillain, d'une chapellenie [en la chapelle Saint-Jean-l'Evangéliste] à laquelle ils affectent du vivant de Simon 12 livrées de terre, monnaie de Provins - réduites à 10 après sa mort - à percevoir annuellement sur les frétages de Châteauvillain et de Marmesse, sur les cens des vignes de Châteauvillain et sur les cens de Blessonville, et dont ils dotent Simon Sébastien, qui avait contribué de son côté à ladite fondation par le don de 50 livres de provenisiens forts, d'une maison avec son cellier, de la moitié de son héritage présent et à venir, et, à sa mort, de la moitié de ses biens meubles, à charge pour ses successeurs de célébrer son anniversaire. Le nouveau chapelain et les titulaires successifs du bénéfice seront tenus de desservir en personne ou de faire desservir la chapellenie, dont Simon de Châteauvillain se réserve le patronage.

Auteur: Simon seigneur de Châteauvillain et Jean son fils

Sceau: auteur

Bénéficiaire: Simon [Sébastien], chapelain du seigneur de Châteauvillain

Rédacteur: scribe du seigneur de Châteauvillain

Support: Parchemin jadis scellé de deux sceaux sur double queue

Lieu de conservation: AD HM, 2G 928 - Chapitre de Châteauvillain

Verso: Littere domini Symonis dicti Sebastiani (XIII^e s.)

1 Gié, Symons, sires de Chatiavilain, et gié, Jehanz, filz à ce dit Symon, 2 fazons à savoir à touz ceaus qui verront ces presenz lettres 3 que nos avons donei et outreié à nostre amei mum seignour Symon, \2 de Chatiavilain, chapelain en nostre chapele de Chatiavilain, 4 douze livrees de terre tant cum je, li davant diz Symons vivrai, et aprés mum decés deix livrees à proven. à touz jorz meis, 5 la quel somme de deniers \3 nos asseuns au dit Symon, chapelain, à panre et à recevoir chascun an, le jor de la Saint Remi en hyver et l'andemain de la Saint Remi, es frestaiges de Chatiavilain et de Marmaasse, et \4 es censes des vignes de Chatiavilain, et es censes de Bleçonvile, des deniers premiers paiez. 6 Et doit en savoir que nos avons assise ceste dite terre, ansi cum nos l'avons ci-dessus devisei, en nostre cha\5pele de Chatiavilain au dit Symon, chapelain, por rante et por prevande perpetuel, 7 por reison de ce que li diz Symons, chapelains, nos ha donei por Deu et por remede de s'ame cinquante livres \6 de proven. forz en aide por funder la dite prevande, les quex cinquante lb. nos avons receues dou dit Symon, chapelain, en deniers contanz. 8 Et doit en ancor savoir que li diz Symons, chapelains, \7 a donei en nostre dite chapele la meison ou il estoit au jor que ces lettres furent faites et le celier de la-dite meison et toutes les apandises de cele meison; 9 et l'autre meisons qui siet davant \8 cele dite meison sera aprés le decés dou dit Symon quitemant es hoirs dou dit Symon, chapelain; 10 et a donei ancor la meitié de tout sum heritaige, soent terres, prei ou vignes, et de ce que \9 il en aquerra ça en avant, en nostre dite chapele, por croissance de la dite prevande, 11 et l'autre meitiez demorra à ses hoirs aprés sum decés, sauf ce que se mestiers li estoit il en pouroit faire \10 toute sa volentei, si cum de vandre ou d'angaigier à mes hommes de cors; 12 et a donei ancor li diz Symons, chapelains, en nostre chapele de Chatiavilain, por croissance de la dite prevande, la meitié \11 de touz ses muebles qu'il avroit au jor de sum decés, ses detes et ses torz_faiz paiez avant, et de l'autre meitié il feroit sum testamant et sa volentei. 13 Et por ceste reison, nos fundons \12 la dite prevande en nostre chapele de Chatiavilain perpetuemant por Deu et por remede de nos ames et de nos ancessours, et en remede de l'ame au dit Symon, chapelain, et de sum pere et \13 de sa mere, 14 au quel Symon nos avons donei et outreié, si cum il est ci dessus esclairié et dit, les douze livrees de terre dessus dites, tant cum je, li diz Symonz vivrai, 15 et deix livrees aprés \14 mum decés, à touz jorz meis, por lui et por ses successors qui aprés lui tanront la dite prevande. 16 Et doit om savoir que li diz Symonz, chapelains, est tenuz deis or en avant à desservir la dite \15 prevande en nostre chapele à Chatiavilain par lui ou par autre chapelain soffisant; 17 et doit om savoir que li cil qui tanra la meison au dit Symon, chapelain, et la dite prevande, doit faire chascun an \16 à touz jorz meis l'anniversaire au dit Symon le jor de sum decés; 18 et doit om savoir que cil qui avra la dite prevande aprés le dit Symon la doit desservir par soi ou par autrui qui soit soffisanz. 19 Et \17 nos et nostre hoir sommes et serums patrum de ceste prevande.
20 En tesmoingnaige et en confirmemant de la-quel chose, nos avons mis nos seels en ces presenz lettres. 21 Ce fui \18 fait en l'an de grace mil et deus cenz et cinquante et huit, ou mois de septambre.