Téléchargement du document

Documents linguistiques galloromans
Corpus : (chOise)
Responsable du corpus : -
Édition de la charte : -

ChOise173

1282, septembre

Type de document: lettres: échange

Objet: Echange entre Bernard [de Moreuil,] dit du Plessier, chevalier, et le chapitre Notre-Dame de Noyon, de divers droits seigneuriaux et terres, à Ugny [-le-Gay] et au Plessis [-Godin], — Bernard conservant notamment sur la maladrerie 'rétablie' par le chapitre les mêmes droits qu’il avait sur l’ancienne, — avec l’assentiment de son frère, Jean de Moreuil, chevalier.

Auteur: auteurs successifs: Bernard dit du Plessier chevalier et son frère, Jean de Moreuil

Sceau: scellé de deux sceaux pendant sur lacs de soie rose, dont seul subsiste celui de droite

Bénéficiaire: chapitre cathédral de Noyon

Rédacteur: ##

Scribe: ######

Support: Parchemin réglé et margé à gauche et à droite, à la mine de plomb

Lieu de conservation: AD Oise G1937; Chapitre cathédral de Noyon, dossier Watomprez

1 A tous chiaus qi ches presentes lettres verront et orront , ju Bernars c’on dist du Plaissié , chevaliers , salus en Nostre Seigneur . Sachent tout qe , co{m}me li doiens et li capitres de l’eglise me dame \2 Sainte Marie de Noion eussent le terage a neume garbe en . xv . moyes et demie de terre , de reqief le terage en . x . moyes et . vii . sestiers de terre a siste garbe , et de reqief en . xvi . sestiers \3 et demi a tierche garbe , les queles terres sieent es teroirs de Wignies et du Plaissié , es lieus chi desous no{m}més , ch’ est assavoir : en Wautron Pré , en Sec Estoc , as Terres Fondues , au Causfour , entour le \4 chimentiere de Wignies , entre le Markays et me vigne , en Feronval , a Praeles , en Coustanches et a le Croisete ; et eussent encore li doiens et li capitres devant dit le droit chens , deniers et capons , qe seur \5 les terres chi deseur no{m}mees , qe seur prés , qe seur terres chi desous escrites , seur les lieus chi desous no{m}més qe li tenant le doien et le capitre devant dit et li myen tiennent de nous en droit chens \6 a nous , ch’est assavoir au doien et au capitre et a moi rendans et paians chascun an as termes a che establis , ch’est assavoir : seur le pré Oursier seur tele partie qe on tenoit de nous . ii . s .//, seur le pré \7 du Mareskel . ii . d . et maalle , seur le pré de le Kaine et seur le terre qi i tient . xi . d .//, seur le terre Adan Boissart de Wautron Pré . ii . s .//, seur le pré de le Plankete . v . d .//, seur le pré Tiebaut . xii . d .//, seur le \8 terre au Causfour . vi . d .//, seur le terre Adan de Wautron Pré . ii . capons et demi , seur le terre Robert Revelart , a l’Ostelerie , demi capon , seur le terre et seur le pré de l’ausnoi Renart capon et \9 demi , seur le terre qi i tient demi capon , et seur le terre Herenc qi i tient demi capon ; et en tous les terages et en tous les chens devant dis , je Bernars devant dis eusse le siste partie et li \10 doiens et li capitres devant dit eussent tout le remanant . Je Bernars devant dis , d’une part , et li doiens et li capitres devant dit , d’autre part , pour le pourfit de mi et de mes hoirs et du doien \11 et du capitre devant dis , et pour hoster les descors qi peussent naistre entre mi et mes hoirs , d’une part , et le doien et le capitre devant dis , d’autre part , avons fait un escange tel qe : 2 Pour chu \12 qe li doiens et li capitres m’ont otroié et otroient a tous jours en escange , pour le siste partie qe ju avoie es terages et es chens devant dis , a tenir et a avoir de mi et de mes hoirs et de \13 men remanant des or en avant cuitement a tous jours tout le terage en . viii . moyes et trois sestiers des . xv . moies et demie de terre a neume garbe deseur dite , et tout le terage le terage en \14 dis moyes et . vii . sestiers a siste garbe deseur no{m}mee et tout le terage en . xvi . sestieres et demi a tierche : che sont par tout . xx . moyes et . vi . sestiers et demi de terre ; et ches . xx . moy\15es et . vi . sestieres et demi de terre sieent en ches lieus chi desous no{m}més , ch’est assavoir : as Terres Fondues , au Causfour , entour le chimentiere de Wignies , entre le Markais et me vigne , \16 en Feronval , en Praeles , en Coustanches et a le Croisete , et sieent toutes ches . xx . moyes . vi . sestiers et demi de terre puis le pré du Faveril , le pasture de l’Ostelerie , le pré Bauduin des \17 Poires et le voie de l’Essart , et puis le Bekis tout outre , aynsi co{m}me les bonsnes se portent , tout par devers Wignies et le Plaissié , sauve le disme au doien et au capitre devant dit \18 es . xx . moyes . vi . sestiers et demi de terre devant dite . Et qe ju et mi hoir et mes remanans aurons et tenrrons des or en avant a tous jours par l’escange devant dit les drois chens \19 chi desous no{m}més , ch’est assavoir : seur le pré Oursier . ii . s .//, seur le pré du Mareskel . ii . d . et maalle , seur le pré de le Kaine et seur le pré qi i tient xi . d .//, seur le pré au Ponchel . v . d .//, \20 seur le camp de le Mairie . iiii . d .//, seur le terre du Causfour . vi . d .//, seur le pré et seur le terre a l’ausnoi Renart capon et demi , seur le terre Perron Tieuwart demi capon , et seur \21 le terre Herenc demi capon . Je Bernars devant dis cuite et otroie au doien et au capitre devant dis , et cuitié ai et otroié a tous jours des or en avant au doien et au \22 capitre devant dis toute le siste partie de le garbe qe ju avoie en . vii . moyes et . ii . sestiers de terre en Wautron Pré et en Sec Estoc . Et leur doune et otroie et clayme cuyte \23 a tous jours tout le terage qe ju avoie a neume garbe en . xxi . moye et . iiii . sestiers de terre qi siet a Soyerru , et leur doi faire cuitier tele partie qe Jehans Crestins , escuiers , i a , \24 a tous jours . 3 Et leur rench encore et doune et clayme cuyte a tous jours les chens chi desous no{m}més qi myen estoient , la ou li doiens et li capitres deva{n}t dit n’avoient riens , ch’est \25 assavoir : seur le terre qi fu Oudart As Esterllins . iiii . s .//, seur le terre le capelain au pré Tiebaut . xxviii . d .//, seur le terre Cate Dieu . xii . d .//, seur le terre Wiot a l’Essart . iiii . d .//, seur le terre \26 le capelain a l’Essart . v . d .//, seur le terre Maret Makerele au Bekis . ix . d .//, seur le terre Adan Revelart au Bekis vi . d .//, seur le terre Bauduin des Poires au Bekis . xvii . d . Et leur doune encore \27 et clayme cuite a tous jours : seur chele meisme terre devant dite du Bekis Maret Makerele , Adan Revelart et Bauduin des Poires , le vynt et setisme garbe , seur le camp Robiket \28 xii . d .//, seur le camp de Maigni . iiii . d . et maalle , seur le terre qe li archediacres acata a Gilebart Hedel . iiii . d . et maalle , seur le courtil devant le Malade . iiii . d .//, seur le vigne de \29 Wautro{n} Pré et le courtil de riere . xv . d .//, seur le terre les enfans le Fessarde au Faveril . iiii . capons , seur le terre Adan Boissart de Wautro{n} Pré . ii . capons et demi . Et doyns encore et cuite \30 et otroie a tous jours par my chel escange ju Bernars au doien et au capitre devant dis le pré de l’Essart pour le pré de le Mairie . Et li doiens et li capitres deva{n}t no{m}mé m’ont douné a my et a mes \31 hoirs le pré de le Mairie pour le pré de l’Essart . Et est encore assavor qe je Bernars devant dis doi faire cuitier a tous jours au doien et au capitre deva{n}t dis le siste partie et tout le droit qe \32 Jehans Crestins , escuiers , a en le terre de Soierriu et du Bekis . 4 Et est assavoir qe par my chest escange doivent avoir li doiens et li capitres le neume garbe et le seignerie en . xxi . moye et . iiii . \33 sestieres de terre seant en Soyerryu , puis l’Estoqich droit a Camp Asnyer , voye et seignerie et tout ; et puis Camp Asnyer droit au pré Gillon , c’on apele au Faveril , voie et seignerie \34 et tout , fors q’en droit me cousture devant Camp Asnyer et la en me cousture et eu kemyn et en le haie , tant co{m}me me cousture dure , ai ju le seignerie et en le couture et eu chemyn ^[1] et en \35 le haie , et tout qanqes sires puet avoir ; et puis le haie de Ca{m}p Asnyer qi tient au pré Gillon tout selonc le pré et selonc le pasture de l’Ostelerie dusqes au pré Bauduyn des Poires , et tout selonc le pré \36 chelui Bauduin , ainsi co{m}me il se porte ; et puis le pré Bauduin toute le voie de l’Essart droit a l’escluse Gillon , tout selonc le Bekis de bousne en bousne , et la dedens les bousnes , aynsi co{m}me il est dit ; puis \37 de Canp Asnyer duskes au Bekis par dedens les bousnes par devers Soierryu et par devers Wautron Pré auront ^[2] , et demeure au doien et au capitre le seignerie et tout , tant co{m}me sires puet avoir . Et d’au\38tre part , outre ches bousnes , de bousne en bousne , aynsi co{m}me eles sont devysees , tout par devers Wignies et le Plaissié , toute le seignerie et tout me demeure , tant co{m}me sires puet avoir et doit . 5 Et \39 puis le bousne q{u}i muet du Bekis dusqes au debout de le cornee du bos Hubert par devers Wautron Pré , aynsi co{m}me les bousnes se {com}portent , entre les bousnes et le bos toute le seignerie me demeure , \40 tant co{m}me sires puet avoir et doit , en tout le kemyn . Et puis le debout du bos Hubert , ainsi co{m}me les bousnes se portent , tout selonc men bos par devers Wautro{n} Pré dusqes au bos mo{n} seigneur de \41 Hem , toute seignerie et toute droiture demeure au doien et au capitre devant dis , tant co{m}me sires puet avoir et doit , en kemyn et en tout . Et doyve{n}t avoir li doiens et li capitres par my chest esca{n}ge \42 toutes les terres et tous les prés , tous les capons , tous les chens et toutes les rentes par devers le Neuve Vyle tres l’Estoqich , de bousne en bousne tout entour , aynsi co{m}me il est chi deseur devysé , dusqes \43 au bos de Bayne , sauf le Val Guyon et le terre qi est derriere les courtieus par devers le bos de Biaulieu , aynsi co{m}me les bousnes se portent tout entour ; et li terre Bauduin des Poires qi tient \44 au courtil Jehan Croustin dusqes a la viés maladerie , et li pieche de terre de chele viés maladerie demeurent au doien et au capitre , et seignerie et tout . Et autant de terre co{m}me il avoit \45 en le viés maladerie li doiens et li capitres ont restauli , ch’est assavoir a le terre qi fu les enfans Martin Bauchant tenant a le terre Bauduin des Poires , pour faire une maladerie pour metre \46 les malades de Wignies et du Plaissié . Et en chele maladerie nouvele faite , je Bernars et mi hoir aurons a tous jours tele droiture et tele seignerie co{m}me ju avoie en chele viés maladerie . Et eu \47 grant chemyn qi va du Val Guyon dusqes a mes vivyers ne pueent riens clamer li doiens et li capitres , ne a Roi ne ailleurs , par qoi ju ou mi hoir en puissiaons estre grevé . 6 Aprés , du \48 debout du courtil Jehan Croustin duskes au debout du courtil Wautier le Jay , et du debout du courtil Wautier le Jay dusqes a le bousne qi est delés le courtil de Sainte Isabel , tout ainsi co{m}me \49 les bousne se portent par devers Camp Asnier , toute li droiture et toute li seignerie est et sera au doien et au capitre . Et d’autre part , ainsi co{m}me ches bousnes devant dites se portent \50 par devers le Val Guyon , toute li droiture et le seignerie sera et demourra a mi et a mes hoirs a tous jours . 7 Et pour chu qe ju veul et gré et otroie qe ches choses devant dites soient \51 fermes et estables a tous jours , ju Bernars devant dis ai seelees ches presentes lettres de men propre seel . 8 Et ju Jehans de Moreul , chevaliers , freres au devant dit mo{n} seigneur \52 Bernart , fas assavoir a tous qe je veul et gré et otroie les couvenanches et l’escange qi fait est entre mon seigneur Bernart , men frere , d’une part , et le doien et le capi\53tre de Noion , d’autre part , et m’i assens en le fourme et en le maniere qe il est escrit et no{m}mé en ches presentes lettres . Et proumés par le foy de men cors qe seur les \54 choses toutes et singulers devant dites , qe li doiens et li capitres de Noion devant dit doivent tenir et avoir et tenrront et auront des or en avant par le raison de \55 l’escange devant dit , je ne clamerai droit aucun ne par mi , ne par autrui , ne en jugement , ne hors . Et a ches choses toutes devant dites tenir fermement et warder , ju obli\56ge moi et mes hoirs . Et pour chu qe je veul qe che soit ferme chose et estable , ju ai mis et pendu men propre seel a ches presentes lettres , aveuqes le seel mo{n} seigneur \57 Bernart , men frere . Che fu fait en l’an de l’incarnation Nostre Seigneur mil .CC. et quatre vyns et deus , eu moys de septembre .

Notes de transcription
^[1] Sic!
^[2] Sic!