Téléchargement du document

Documents linguistiques galloromans
Corpus : chartes de Saône-et-Loire (chSL)
Responsable du corpus : Martin-D. Glessgen
Édition de la charte : Julia Alletsgruber (révision: D. Kihaï)

chSL 072

Le mardi après la Saint Martin, 15 novembre 1317

Type de document: charte: arbitrage

Auteur: Jean de Chastoillon, bailli de Dijon

Sceau: Auteur

Support: Original parchemin

Lieu de conservation: AD SL H 224/15

1 A touz ces qui verront et orront ces presentes lettres:· 2 Nous Jehans de Chastoillon chevaliers bailliz de Dygenois, 3 façons savoir 4 que cum plaiz fust mehuz per devant \2 dan Girart adonc abbei de Saint Benigne de Dyjon, 5 entre religiose parsone· frere Othe en ce temps priour de Paleal en non de soi et de son priorei d'une \3 part,· 6 et Girart dit le Grain,· Gauthier de chies les Duranz· et Guienot Baloin de Palual, procureur et en non de procureur des hommes et habitanz de la dicte vile de Palual d'autre, \4 7 sur ce que li diz prioux· disoit, proposoit et affermoit encontre les diz procureurs· 8 que il en non de lui et de son priorei estoit en saisine et possession paisible de annuncier \5 et lever sus les diz habitanz de Palual et sus un-chascun d'aux la taille haute et basse une foiz l'an,· 9 especialment cum li dit habitant haussent confessei et cognehu par-devant un priour \6 de Palual 10 qui estoit pour le temps estre taillauble et esploitauble à lui et au dit priorei haut et bas, 11 si cum il estoit plus à plain contenu en unes lettres sur ce faites, sealees dou seal \7 de la court l'official de Chalon.· 12 Item quar per la costume general de Bourgogne li homme d'aucun soignour qui sunt demoranz et residanz en vile champestre,· 13 et qui sunt justi\8sauble à ycelui soignour· sunt taillauble haut et bas· 14 se il n'ont privilege au contraire.· 15 Item disoit et affermoit li devant diz prioux que il estoit en saisine et possession paisible \9 d'un-chascun 16 et sus une-chascun des diz habitanz. sexante et cinc. souz pour cause d'amende 17 totes foiz que il estoient pris ou trovei meffacent ez bois dou dit prioré de Palual.· \10 18 A quoi fut respondu de-par les diz procureurs en nom que dessus et en affermant de-par aux· 19 que il havoient prescript libertei par tant de temps qu'il suffisoit· de unire frainche\11ment pour paiant une certaine somme d'argent 20 au dit priour en nom de son dit prioré· chascun an senz croistre et senz abaissier,· 21 ce est à savoir chascuns feus une certaine \12 quantité ja soit ce qu'il ne la specifiessent.· 22 Item disoient et affermoient li dit procureur en nom que dessus que il havoient prescript libertei par tant de temps qu'il suffisoit de \13 havoir lour usaige es bois dou dit priorei,· 23 exceptei le chaigne et le bois fruit portant,· 24 et pour certaine redevance en quoi il en sunt tenu au dit priour pour cause de \14 son dit priorey quar il en paent les corvees doues foiz l'an.· 25 Item disoient et affermoient li dit procureur en nom que dessus que il havoient prescript libertei de paier et d'estre \15 tenu en la petite amende, 26 c'est à savoir en. sept. soulz tant soulement totes foiz que il estoient pris ou trovei mesusanz es bois dout dit priorei.· 27 Item disoient et affermoient \16 li dit procureur en nom que dessus que il havoient prescript libertei de peschier en la rive de Palual à la trule et au verveu, 28 dois endroit le chastial de Palual par-de-desus jusque \17 un-pau au de-dessus dou priorei de Palual, 29 et par tant de temps cum à tenehure affiert,· 30 la quele rive li diz prioux apparrioit à-lui.· 31 Sus les quex chouses ensinc proposees et affermees \18 d'une partie et d'autre,· 32 le plait entammés et littiscontestation faite par-devant le dit abbei,· 33 commis fut de-par le dit abbei à religiouse parsone· frere Jehan priour de Saint-Estiene de Beaune \19 à jugier,· sentencier et terminer la dicte cause.· 34 Per la vertu de la quele commission les dictes parties appelees par-devant le dit commissaire et journee assignee à oir droit en la dicte \20 cause.· 35 Pronuncié fut et à droit par le dit commissaire· le dit priour de Palual havoir bien provee s'entencion,· 36 et les diz procureur en nom que dessus non havoir riens provei de lour \21 entencion.· 37 Et ensinc condampnoit les diz procureurs en nom des diz habitanz estre taillaubles haut et bas au dit priour.· 38 Item adjugoit au dit priour havoir droit de lever sus \22 un-chascun des diz habitanz· soixante et cinc· soulz pour cause d'amende 39 totes foiz et tantes foiz cum il estoient trovei ou pris meffacent· es diz bois,· 40 et condampnoit les diz pro\23cureur ou nom des diz habitanz non havoir droit d'user es diz bois ne en la dicte rive.· 41 Et ensinc lour y-metoit perpetuel silence.· 42 De la quele sentence fut appelei à nous· de-par les \24 diz procureur.· 43 Per la vertu dou quel appeal· les dictes parties appelees par-devant nous et pluseurs journees assignees sur ce es dictes parties à oir droit.· 44 A la par_fin journee assignee \25 es dictes parties à oir droit, c'est à savoir au mardi aprés la feste saint Martin d'yver à nostre app-de Saint Juhan: 45 à la quele journee les dictes parties estanz en jugement par-devant nous \26 et requeranz sur droit à grant instance: 46 vehu tout le procés et tout le demenei de la dicte cause et diligemmeint examinei, 47 dou consoil de proudons hommes haianz Deu \27 tant soulementt devant les euz· en nom dou Pere et dou Fil et dou Saint Esperit· 48 pronunçons et à droit par nostre sentence diffinitive· le dit priour commissaire havoir bun pronuncié \28 49 sus la partie que li dit homme et habitant soient et demoroient taillaubles haut et bas au dit priour.· 50 Et ensinc consideranz la cotume general dessus dicte et alleguee de-par le dit \29 priour.· 51 Item et consideranz que li dit home et habitant n'ont exprimei la certaine some ou quantitei 52 par la quele il dehussent estre a-- oney et non taillaubles et ne l'ont provee.· 53 Et auxi \30 n'aient mostrei privilege par le quel il se doigent reputer franc.· 54 Nous adjugons au dit priour de Palual la saisine de faire la taille haute et basse et de lever ycely suz les diz habi\31tanz.· 55 Et les diz procureurs en nom des diz habitanz condampnons à cesser dou trouble et de l'empeschement que il li metoient.· 56 Item pronunçons et à droit par nostre dicte sentence· 57 les diz pro\32cureurs en nom des diz habitanz havoir bien provee lour entencion sus l'usaige des diz bois de Palual et de la rive.· 58 Et sus le fait de saisine d'estre quittes pour paiant. sept. soulz d'a\33mende senz plus· totes foiz qu'il sunt pris ou trovei mesusanz ce diz bois.· 59 Et ensinc lour adjugons la saisine d'user es diz bois parmi la dicte redevance paiant, c'est à savoir les \34 dictes corvees.· 60 Et havoir droit d'user et de peschier en la dicte rive à la trule et au verveu.· 61 Et en ce pronunçons par nostre dicte sentence le dit priour commissaire havoir mal pronun\35cié.· 62 Et les diz procureurs en nom des diz habitanz havoir bien appelei.· 63 Ou tesmoignage de la quel chouse nous havons sealees ces lettres au seal de nostre bailliaige,· 64 faites et donees à Saint \36 Juhan le mardi devant dit l'an de grace. mil. trois cenz· dix et sept·.