Téléchargement du document

Documents linguistiques galloromans
Corpus : chartes de Saône-et-Loire (chSL)
Responsable du corpus : Martin-D. Glessgen
Édition de la charte : Julia Alletsgruber (révision: D. Kihaï)

chSL 039

Le lundi avant la Saint-Denis, 3 ocobre 1306

Type de document: charte: arbitrage

Objet: [1s.] Le bailli de Dijon fait part de son jugement [5s.] dans le litige qui oppose le duc de Bourgogne au chapitre d'Autun. [9s.] Le procureur du duc accuse le chapitre d'Autun d'avoir pris à tort un cerf dans les terres de Corbigny, dont le duc a la saisine. [14s.] Il réclame la restitution du cerf et la condamnation des religieux à cesser d'empêcher le duc de jouir de la saisine des terres en question. [20s.] Le procureur du chapitre d'Autun conteste les droits du duc dans ces terres et prétend que les religieux avaient le droit de prendre le cerf. [24s.] Après l'audition des témoins et ayant entendu les arguments des deux parties, le vieux duc étant mort entretemps, le bailli convoque les deux parties à Autun pour qu'ils entendent son jugement. [33s.] Il donne raison au duc dans la question du cerf, [41s.] mais il attribue la saisine et la juridiction dans les terres de Corbigny au chapitre d'Autun.

Auteur: Jean de Granges, bailli de Dijon

Sceau: Auteur

Bénéficiaire: Chapitre d'Autun

Autres Acteurs: Robert le Fort d'Autun, procureur du duc de Bourgogne; Humbert de Vulai, procureur du doyen et du chapitre d'Autun

Support: Original parchemin jadis scellé

Lieu de conservation: AD SL 5 G 191

1 En non de nostre Seignour amen.· 2 A touz cels qui verront ces presentes lettres:· 3 Nous Jehans des Granges baillis de Digenois 4 façons savoir 5 que cum \2 cause fust mehue par-devant nous entre maitre Robert le Fort d'Ostun clerc procureour de clere memoire monseignor· R· jadis duc de Bourgoigne, 6 en non de procureour \3 dou-dit monseignor le duc et pour li d'une part,· 7 et monseignor Humbert de Vulai prevoire procureour de honorables hommes et saiges dou·· doien et dou·· chapitre de l'e\4glise d'Ostun, 8 en non de procureour d'aux et par aux d'autre part,· 9 sus ce que li diz Robers procureours disoit et proposoit en non que dessus en jugement par-devant nous \5 encontre les diz doien et chapitre 10 que cum li diz messires li dux par soi ou par autre fust et heust esté par lonc_temps en saisine et en possession ou ansic com\6me en possession, 11 et encor soit de la justice des terres que l'on appele vulgaument les terres de Corbigne, assises derrier Cohart là par où l'on vait de Ostun \7 à Auce,· 12 uns cers despavé vint· et cheit ou-dit leu,· 13 que li-devant dit doiens et chapitres par aux· ou par autre· en lour non havient pris et tenoient pris à tort \8 et ou prejudice dou-dit monseignor le duc,· 14 pour quoi demandoit li-diz Robers procureour en non que dessus es devant diz doien et chapitre que il le-dit leu ressaisissesseint \9 dou-dit cer,· 15 et que le-dit leu ressaisi,· li diz cers li fust renduz et delivrez en non comme dessus.· 16 Et que li-dit doiens et chapitres fussient condampné à cesser dou \10 trouble et de l'empeschement qu'il mestient au-dit monseignor le duc en sa dicte saisine,· 17 et que li-dit doiens et chapitres fussient condampnez en ce à li· en non comme dessus \11 par nostre sentence diffinitive.· 18 Et ne s'estroignoit à prover li-diz procureours des choses dessus dictes fors ce que li suffirent,· 19 en protestant que ce qu'il en proveroit vausit à-monseignor \12 le duc.· 20 Item et sus ce que li-diz Humbers procureours en non comme dessus disoit et proposoit par-devant nous en jugement contre l'autre partie, 21 que li-diz doiens et chapitres, \13 au temps de la-dicte prise havient esté par lonc_temps· et estient en saisine et en possession ou ansic comme en saisine de la justice es dictes terres de Corbigne,· 22 et especialment \14 et· de-prandre et de havoir les bestes qui sunt venues de espave et esthaetes es dictes terres.· 23 Et se offroit li diz Humbers procureours en non que dessus de prover des choses dessus \15 dictes tant solement ce que li en suffiroit.· 24 Le plait sus ces choses entammé de l'un procureour et de-l'autre en non que dessus,· 25 tesmoinz trahiz et amenez d'une partie \16 et d'autre à prover lors entencions,· 26 recehuz,· jurez· et diligemment examinez,· lors depositions mises en escript· et publiees,· plusours raisons mises avant d'une \17 partie et d'autre,· 27 plusours jours assignez es dictes parties à oir droit sus la dicte cause,· le dit monseignor le duc ala de vie à mort.· 28 A-la-par_fin le lundi devant la feste saint \18 Denis assigné es dictes parties par-devant nous à Ostun à oir droit sus la-dicte cause,· 29 le-dit maitre Robert procureour de tres hauz· et tres nobles madame Agnes· du\19chesse,· et Hugue monseignor duc de Bourgoigne,· 30 en non de procureour d'aux et par aux d'une part,· 31 et le-dit monseignor Humbert procureour des-diz doien et chapitre en non de procureour d'aux \20 et par aux· d'autre part, 32 comparenz en jugement par-devant nous à Ostun· et requeranz droit.· 33 Nous le-dit jour, vehu et entendu diligemment les procés et les \21 actes de-la dicte cause,· 34 et tout ce que les parties ont volu dire et proposer,· et ce que nous puet movre à dire droit,· 35 dou consoil de prodomes et saiges de droit \22 usé en cest fait,· Dieu solement haienz devant les eaux pronunçons· et à droit,· 36 en non dou Pere· et dou Fil· et dou Saint Esperit amen, par nostre sentence di\23ffinitive, 37 le-dit procureour monseignor le duc havoir plus suffisamment prové s'entencion quant à l'espave· ou à la prise de la beste sauvaige· 38 que li doiens et li cha\24pitres ou lor procureour· dessus-dit,· 39 pour quoi par la-dicte sentence nous condempnons les-diz doien et chapitre en la parsone de lor-dit procureour 40 à fere restitucion \25 dou-dit cer au leu contentioux,· et à rendre le-di-cer à-monseignor le duc· ou à son-dit procureour.· 41 Item nous pronunçons par la-dicte sentence le-dit procureour monseignor le duc \26 non havoir suffisamment prové s'entencion quant es autres articles contenuz en icele, 42 par quoi nous absolons les-diz doien et chapitre de l'impeticion dou \27 dit procureour monseignor quant es-diz articles non provez, 43 sauf à monseignor le duc la question sus la proprieté des-dictes choses s'il entant que à le li appartiegne.· 44 Item nous pronunçons \28 par nostre dicte sentence le procureour des-diz doien et chapitre havoir plus suffisamment prové s'entencion 45 quant à-la saisine et possession ou ansic comme saisine et possession de \29 la justice es-dictes terres de Corbigne que li-diz procureour monseignor le duc.· 46 Ou tesmoing de la quel chose nous metons à ces lettres le seaul de la court dou bailliai\30ge de Digenois· dou quel nous usons.· 47 Doné en noz assises d'Ostun le-dit lundi devant la feste saint Denis,· l'an de grace· mil·. trois-cenz· et. six·.