Téléchargement du document

Documents linguistiques galloromans
Corpus : chartes de Saône-et-Loire (chSL)
Responsable du corpus : Martin-D. Glessgen
Édition de la charte : Julia Alletsgruber (révision: D. Kihaï)

chSL 030

Le lundi après la St-Barnabé, 13 juin 1300

Type de document: charte: appel

Objet: [1s.] Le bailli de Chalon fait part de son jugement [4s.] dans un litige qui oppose les paysans Bernard le Chapotat et Bernard de Fley à l'abbaye de La Ferté. [7s.] Les paysans demandent une audition chez le bailli pour prouver leur droit à la vaine pâture dans une pièce de bois, [13s.] et pour porter plainte contre l'abbaye de La Ferté qui les empêche de jouir de ce droit. [15s.] Après l'audition des témoins et après la mort de Bernard de Fley, le bailli convoque les deux parties. [21s.] A cette occasion, le procureur de La Ferté se défend contre la plainte des paysans, en alléguant entre autres que ceux-ci avaient fait appel contre une amende que l'ancien procureur leur avait imposée pour avoir usé du droit de la vaine pâture. [29s.] Le procureur prétend que cette amende avait été justifiée, les paysans disent pouvoir prouver le contraire. [38s.] Le bailli de Chalon convoque une nouvelle fois les deux parties pour confirmer la décision de l'ancien procureur de La Ferté et rejeter l'appel des paysans.

Auteur: Henri de Dulphie, bailli de Chalon

Sceau: Auteur

Bénéficiaire: Abbaye de La Ferté

Autres Acteurs: Frère Jean, moine cellérier et procureur de La Ferté; Bernard le Chapotat et Bernard de Fley;frère Simon d'Annores, cellérier et procureur de La Ferté

Support: Original parchemin jadis scellé

Lieu de conservation: AD SL H 31, n°35

1 Au non de nostre Soigneur amen.· 2 Nos Henris de Dulphie bailliz de Chalon, 3 façons savoir à-touz celz qui verront et orront ces presentes lectres 4 que cum cause fust \2 mehue à Buxi par-devant nos entre frere Jehan moyne adonques celerer et procureour de religiours hommes l'abbé et lou convant de la Forté, 5 ou non de procureour des diz \3 religiours et par aux d'une part,· 6 et Bernart le Chapotat· et Bernart de Fley de l'abbergement de Maisse d'autre part,· 7 sur ce que li diz Bernarz li Chapotaz et Bernarz de Flayz \4 havoient propousé une demande contre le dit procureour ou non que dessus, 8 li quele lour fut nehie et lour fut jornee assignee dou prover,· 9 à-la quele il amenerent \5 plusours tesmoinz, les quelx nos fiesmes jurez· et commandesmes estre diligemmant examinez,· 10 et à-la quele jornee il baillerent· en escript une antancion en la quele il estoit \6 contenuz que il estoient et havoient esté saisi et vestuz par plusours annees et par les derrieres de la veinne paisture d'une piece de bois 11 assise entre les bois d'Argenche \7 d'une part· et le bois es hommes de Chenoues d'autre,· tant por aux cum por ceaulx des quelx il havoient cause,· 12 jusque au tamps que li diz religious lour y havoient mis empau\8chemant.· 13 Por quoy nos requeroient li diz Bernarz li Chapotaz et Bernarz de Fley que nos controignessoiens les diz religious à cesser dou dit trouble et empeschement,· 14 et que nos \9 les condempnessoiens à ce fare par nostre santance diffinitive.· 15 Li quelx tesmoinz hont esté examinez bien et diligemment et ha esté faite publicacion de lour attestacion.· 16 Apres ce freres \10 Symons d'Annores fut celerex et procureour des diz religious,· 17 et li diz Bernarz de Flay degrepissa la dicte cause,· et apres ala de vie à-mort.·· 18 Et fut jornee assignee à Buxy \11 par-devant nos au dit Bernart le Chapotat d'une part,· 19 et au dit frere Symon, procureour des diz religious d'autre,· 20 à dire de part le dit procureour contre les tesmoinz et lors diz, \12 traiz et amenez de part l'autre partie,· 21 à-la quele jornee li diz procureour ou non que dessus dist et proposa· et baillay en escript en jugemant par-devant nos plusours raisons de droit \13 et de fait 22 contre l'autre partie· et contre les tesmoinz et lorz diz traiz et amenez de part sa partie adversse,· 23 es quelex raisons estoit contenuz especiaulment li fait cy desoz escripz, \14 24 c'est asavoir que li diz Bernarz li Chapotat et Bernarz de Flay havoient fait à ajorner par-devant nos à Buxy le procureour de la Ferté en cause d'appeaul.· 25 Item que il ou autres por aux le cuy \15 fait il hehurent agreauble propouserent en jugemant par-devant nos contre le dit frere Jehan, adonques celerex et procureour des diz religiours 26 que il les havoient condampnez ou \16 non des diz religious en aucunes amandes des quelex il disoient qu'il havoient appelé à nos.· 27 Item que li diz Bernarz li Chapotat· et Bernarz de Fley se offrerent de prover \17 par-devant nos les choses contenues en lour demande faite sur la dicte cause d'appeaul,· 28 et que à ces choses prover jornee lour fut assignee par-devant nos.· 29 Item \18 que-au tamps que li devant diz Bernarz fierent à-ajorner par-devant nos le dit procureour des diz religiours en la dicte cause d'appeaul,· 30 et au tamps que li dicte jornee \19 lor fut donee de prover, et un an apres· et un an devant li bois contenuz en l'antancion des diz Bernarz estoit en bant et an copeiz,· et danz la quarte fuille, \20 31 les quelex raisons de fait dessus escriptes li diz Bernarz li Chapotaz mit en ny.· 32 Et li diz procureour s'offray de prover ce qu'il en voudroit ou pourroit prover, \21 33 et nos requist que ou cas qu'il les proveroit que nos prononcessoiens, desclaressoiens les diz Bernarz por nostre santance diffinitive estre chaoiz de la dite \22 cause d'appeaul,· 34 et les diz religiours estre absoulz des choses contenues en l'antancion de l'autre partie. 35 Comme li diz Bernarz ne hahussoient riens prover des choses \23 contenues en lour dite demande faite sur la cause d'appeaul et sur l'autre dit contenu en lour entancion, 36 ne fut onques faite demande par aux par-devant nos \24 ne response faite dou procureour de la Forté,· 37 et il laisse à un-chascun par la costume generaul de Borgoigne tenir et à garder en bant ses bois jusque à-la quarte \25 fuille, si cum disoit li diz procureour.· 38 A-la quele jornee assignee es parties à prover de part le dit procureour de ses dictes raisons de fait ce qu'il en voudroit \26 ou porroit prover, 39 li diz procureour amoynai plusours tesmoinz, les quelx jurez et diligemment examinez, faite publicacion de lour attestacions, 40 les dites parties se \27 boterent en droit, plusours jornees assignees es dictes parties à oir droit sur la dicte cause.· 41 A la par_fin le lundi apres la Saint Bernabé assignez es dictes parties à Buxi por \28 devant nos à oir droit tranchiemant sur la dicte cause,· 42 au quel lundi le dit procureour ou non que dessus d'une part,· 43 et le dit Bernart le Chapotat por-luy d'autre \29 part,· 44 presanz et estanz en jugemant à Buxi par-devant nos,· et nos requerant droit sur la dicte cause.· 45 Nos vehu· et diligemment examinez tout le procés de la dite \30 cause, oy et antandu tot ce que les dictes parties hont volu dire et proposer,· 46 dou consoil de prodommes et saiges usé en ceste bessoigne, Deu haianz tant sou\31lemant devant les eaulz, prononçons et à droit 47 que li diz procureour de la Forté ha bien prononcié sur l'amande de. sexante et cinc. soulz· en la quele \32 il havoit condampné le dit Bernart le Chapotat ou non des diz religious,· 48 non obstant chose que li diz Bernarz hahussoient proposé,· et que li diz Bernarz \33 li Chapotaz ha maul appelé,· 49 por quoy nos conformons la dicte santance donee dou dit procureour contre le dit Bernart le Chapotat.· 50 Ou tesmoignaige de la quel \34 chose nos havons mis en ces presantes lectres nostre seaul dou quel nos usons en nostre bailliaige, 51 faites et donees le lundi dessus dit,· l'an de grace· mil·. trois·. cenz·.