Téléchargement du document

Documents linguistiques galloromans
Corpus : (docNorm)
Responsable du corpus : M. Glessgen
Édition de la charte : F. Dubosc

docNorm096

1295

Type de document: charte: vente de rente

Objet: Acte de vente passé devant le vicomte de Coutances: Jean du Gardin, augmente la rente annuelle qu'il doit aux religieux du couvent de La Luzerne de trois boisseaux de froment.

Auteur: vicomte de Coutances

Disposant: Jean du Gardin

Sceau: auteur; Jean du Gardin

Bénéficiaire: l'abbaye de La Luzerne

Support: Fragments du sceau de la vicomté de Coutances et du sceau de Jean du Gardin. Ce dernier, grossièrement gravé, présente dans le champ une hache debout. Légende: "S. JOH' du garDIn".

Lieu de conservation: original perdu

Édition antérieure: Dubosc, 1878, Cartulaire Factice de l'Abbaye de La Luzerne, n^oCXXVII, p. 140-1; SCRIPTA. Base des actes normands médiévaux, 2010-19, dir. P. Bauduin, CRAHAM-MRSH, acte n^o4367.

Verso: Sig. .XII. d. R. idem. Scriptura .XII. d.^[a]

1 De tribus bussellis frumenti super domum filie Portejoie, apud Constancias.
2 À touz ceus qui ces letres verront et orront, 3 le visconte de Constances saluz. 4 Sachent touz que endroit par-devant nos present Johan deu Gardin de la parroisse Seint Pierre de Constances, de sa boene volentei recognut soi 5 avoir vendu, otrié et delessié à fin et à touz jorz 6 à hommes religious l'abbé et le convent de la Luiserne 7 pour sessante et sept souz de torneis donc ledit Johan se tint por bien paei par-devant nos, 8 c'est assavoir trois boisseax de forment à la mesure de Constances de anuel rente à la Seint Michiel en accroissant la rente que ledit Johan lor rendoit, 9 et estoit tenu rendre sus son mesnage et sus une piece de terre assis en la parroisse Seint Pierre de Coustances, 10 lequel mesnage joint au mesnage as hers Raoul deu Perier et au mesnage Guillame l'Aignel et bute à la rue par quoi l'en va à Hienville, 11 et ladite piece de terre joint as terres Dodeman de Raabec et au chemin deu Mesnil et bute à la terre Anthoyne le Bouvier; 12 à tenir, à avoir, à lever et à recevoir asdiz religious et à lor successors lesdiz trois boisseax de forment avecques l'autre rente bien et en pes par la main deldit Johan et de ses hers sanz nul contredit. 14 E porront lesdiz religious et lor successors ou lor mandement fere lor justice sus ledit tenement por ladite rente toutes foiz que mestier en sera. 15 E quant à cen tenir et à emplir, asdiz religious et à lor successors ledit Johan obliga par-devant nos soi et ses hers son cors à tenir prison et touz ses biens meubles et non meubles, presenz et à venir, où que il soient, à vendre et à despendre par la justice le roy por deffaute de enterigner les choses dessus dites 16 e por les couz et les despens rendre qui en seroient fez donc le portoor de ces lectres seroit creu par son serement sanz autre preuve. 17 E renunça quant à cen ledit Johan à tout privilege de croiz et à toutes exceptions et defenses de fet et de droit. 18 E en tesmoing de cen, nos avon mis à ces letres le scel de la viscontei de Constances o le scel audit Johan sauf le droit nostre sire le roy et autrui. 19 Cen fut fet l'an de grace mil .CC. nonante et cinc, le vendredi devant la feste seint Cler.

Notes de fiche
^[a] Sur le repli.