[vers une autre interface]
|
Téléchargement du document fichier xml fichier pdf |
Documents linguistiques galloromans
Corpus : (docNorm)
Responsable du corpus : M. Glessgen
Édition de la charte : F. Dubosc
docNorm086
1293, mars (n. st.)
Type de document: charte: vente de rente
Objet: Acte de vente passé devant le vicomte d'Avranches: Gilbert Renoul de la paroisse de Saint-Aubin vend une rente annuelle à Guillaume le Boc et Bienvenue, sa femme.
Auteur: vicomte d'Avranches
Disposant: Gilbert Renoul
Sceau: auteur; Gilbert Renoul
Bénéficiaire: Guillaume le Boc et Bienvenue, sa femme
Lieu de conservation: original perdu
Édition antérieure: Dubosc, 1878,
2 À touz ceus qui ces presentes letres verront et orunt, 3 le visconte d'Avrenches saluz. 4 Sachent touz que Gillebert Renoul, de la parroisse de Seint Aubin de la Terre Gaste, recognut par devant nos 5 que il avoit vendu, otroié et deu tout en tout delessié à Guillaume le Boc borgeis de Seint Jame de Bevron et à Bienvenue sa fame eu nom d'ele por sexante et cinc souz de torneis, de coi il se tint à bien paié par devant nos, 6 cil est à savoir sis souz de torneis d'anuel rente souzerene sus tout le fieu que il tient deudit Guillaume et de ladite Bienvenue par la reson d'ele en la parroisse Seint Aubin en l'ainnage Marie de Seint Aubin, sus sa meson et sus tout son herbergement qui siet eu bout deu mostier et sus trois pieces de terre qui ont non la premiere le Clos sus la rue Adan 7 ; la segonde si a non le Clos Tréhier, 8 e la tierce piece si a non le Champ de souz la Haye, 9 à tenir, à avoir, à apercevoir et à porsooir endroit heritage ladite rente oveuques la chief rente deudit heritaige asdiz Guillaume et Bienvenue sa fame et à lor heirs franchement, peziblement et quitement, sanz nul reclaim et sanz nul contredit desore$en$avant en nule maniere deudit Gillebert ne de ses heirs. 10 E est tenu lui et ses heirs la vente fete en la maniere dessus dite garantir, delivrer et defendre vers touz et contre touz asdiz Guillaume et Bienvenue sa fame et à lor heirs 11 ou aillors value à value en son propre heritaige eschangier se mestier en estoit. 12 E veut et octroie ledit Gillebert que ledit Guillaume et sa fame ou lor heirs ou qui cause auroit d'eus facent planiere justise sus ladite meson o le herbergement et sus les trois dite [1] pieces de terre por lesdiz sis souz d'anuel rente chescun an touz jorz més à ladite feste, ausi bien comme por la principal rente. 13 E quant à ce qui est contenu en ceste letre tenir et entrignier [2], ledit Gillebert oblige lui et ses heirs et touz ses biens mobles et immobles, presenz et à venir en queil lieu que il soient trovez, à prendre, à tenir et à vendre par la main de la justise duques [3] à la value de ladite rente, tant que elle fust paié [4] bien et entierement, chescun an à chescune feste, et les maus et les domaiges rendus que ils auroient eus et lor heirs en ladite rente porchacier. 14 E en tesmoig de verité et que ce soit ferme et estable à fin et à touz dis [5], à la requeste des parties nos avon seellé ces letres deu seel de la visconté d'Avrenches oveuques le seel audit Gillebert, sauf le droit le roi et autrui. 15 Ce fut fet l'an de grace mil dous cenz nonante et dous, le mecredi devant Paques eu mois de marz.
Notes de transcription
[1]
[2]
[3]
[4]
[5]
