Téléchargement du document

Documents linguistiques galloromans
Corpus : (docNorm)
Responsable du corpus : M. Glessgen
Édition de la charte : L. Delisle / J. Meierhofer (collation)

docNorm075

1290, 8 mars (n. st)

Type de document: charte: bail

Objet: Bail d'une partie des murs et fossés de la ville de Rouen consenti par le bailli de Rouen au profit de Richard du Framboisier.

Auteur: bailli de Rouen

Disposant: auteur

Sceau: auteur

Bénéficiaire: Richard du Framboisier

Lieu de conservation: AD Seine-Maritime (fonds de Saint-Ouen de Rouen)^[a]

Édition antérieure: Delisle, 1904, Recueil des Historiens des Gaules et de la France, t. XXIV, p. 354.

1 À touz ceus qui ces presentes lettres verront et orront, 2 le baillif de Rouen, saluz. 3 Sachiez que, comme maistre Richart du Framboisier nous eust requis 4 que nous li baillissons les fosseiz et les murs de la ville de Rouen qui sunt des parroisses de Saint Gueudart et de Saint Oen de Rouen oveques la moitié de la porte Biauvoisine, 5 lesqeuls fosseiz et les murs sunt assiz entre ladite porte Biauvoizine et les murs de l'abbeye de Saint Oen de Rouen, 6 et nous eussons fait asavoir par boenes genz jurez de la ville de Rouen dessus dite combien lesdites choses valoient de rente par an, pour ce que nostre seigneur le roy n'en fust en rien deceu. 7 Et les devant diz jurez nous eussent raporté par leur seremenz que lesdites choses ne valoient que sexante soulz de rente par an tant seulement, 8 et nous eussons commandé aus serjanz nostre seigneur le roy que il feissent crier es parroisses où lesdites choses sunt que nous, ou non et pour le profit nostre seigneur le roy, avions baillié et fieufé toutes lesdites choses par sexante soulz tournois cascun an de rente à maistre Richart du Framboisier et à ses hoirs, 9 et se il i avoit aucuns qui plus i vousist donner, que il venist avant et li baudroit se il estoit suffisant; 10 et les devant diz seirjanz nous eussent raporté par leur seremenz que il ont crié et fait crier par pluseurs foiz es devant dites parroisses, et nus ne soit venus avant qui s'i opposast; 11 nous fesons asavoir à touz que nous, ou non de nostre seigneur le rois, et pour lui, pour ce que nus ne venoit avant qui plus i vousist donner, nous avons baillié audit mestre Richart du Framboisier et à ses hoirs les devant diz fosseiz et les murs oveques la moitié de ladite porte Biauvoisine, si comme il se pourportent en lonc et en lé 12 à ferme perpetuel et en heritage par les devant diz sexante soulz de rente cascun an à rendre audit nostre seigneur le roy et à ses hoirs dudit maistre Richart et de ses hoirs, en la maniere qui ensieut: 13 c'est asavoir la moitié cascun an à l'Eschequier de la Saint Michel et l'autre moitié à l'Eschequier de Pasques, 14 à tenir, à avoir et à pourseer toutes lesdites choses audit maistre Richart et à ses hoirs, bien et em pes, francement et quitement, de nostre seigneur le roy et de ses hoirs, par la rente dessus dite tant seulement aus termes dessus diz; 15 et prometons pour nostre seigneur le roy toutes les devant dites choses à garantir et deffendre contre toutes genz par la rente dessus dite. 16 Et fesons asavoir que nous avons baillié audit mestre Richart et à ses hoirs toutes les devant dites choses par la devant dite rente, si comme il est dessus dit. 17 En tesmoing de ce, nous avons mis à ces lettres le seel de la baillie de Rouen. 18 Ce fu fet en l'an de grace .M. .CC. quatre-vinz et noef, le proucein merquedi devant la mi-karesme.

Notes de fiche
^[a] copie sous la cote 14 H 471