Téléchargement du document

Documents linguistiques galloromans
Corpus : (docNorm)
Responsable du corpus : M. Glessgen
Édition de la charte : Société Jersiaise

docNorm017

ca 1270

Type de document: liste: franchises

Objet: Liste des franchises du roi d'Angleterre et du peuple en l'Île de Guernesey.

Auteur: non annoncé

Bénéficiaire: le roi d'Angleterre; les habitants de l'Île de Guernesey

Lieu de conservation: original perdu (jadis Archives de la Manche)

Édition antérieure: Société Jersiaise, 1924, Cartulaire Factice de Jersey, Guernesey et des Autres Îles Normandes..., p. 224-6; Havet, Cours Royales, p. 8; Dupont, Histoire du Cotentin, t. II, p. 213-5.

Verso: Copie des franchises que le roi d'Engleterre a en Guernerie et que les hommes de Guernerie ont.

1 Ce sont les franchises nostre segnor le rey d'Engleterre en l'iste de Guernerye:
2 Premierement, il a la segnorie sus toz e ses franchises si come segnor e ses briés e toutes les choses qui apartienent à la corone. 3 Emprés il a sassise de trois anz en trois ans e par son brief tenue. 4 Emprés il a son moneage ensuiant de trois ans en trois anz par tout le païs exceptez ceus qui en sont franz. 5 Emprés il a son champart sus son fieu e ses melages e ses polages e ses moulins e ses autres franchises. 6 Emprés nostre segnor le rey a ses veres par toute l'isle exceptez les drouitures à l'abey de Mont Seint Michiel e à ma dame de Chaene ^[i] e à Matheot de Saumares e en toute l'isle il prent la veue e ou Vale et en Lihou e en Guethehou e or e seie nemie ovree e escarlate nemie trenchie e mantel d'escarlate sanz ataches e esturjon. 7 Emprés il a sa costume des neis, c'est à savoir de celes qui puent guinder à lor mast un tonel de vin, pour quei la neif en la marchaandise set dehors le pouer nostre segnor le rey, demie marc d'argent. 8 Emprés il a ses esperqueries e devent les pescheors aporter lor peisson de deus marees clos es places se il poent venir e se il ne poent venir il le puent fendre; 9 e quant il vendront es places se les marchaanz e les pescheors ne poent estre à un acort, le peisson doit estre prisiez par ledit de .II. homes leaument dedens un flo e une ebe. 10 Emprés il prent .LXX. lib. de torneis d'aide par trois termes en l'an, c'est à savoir à Noël, à Pasques e à la Seint Michiel. 11 Emprés il a ses chiés plais trois fez en l'an, c'est à Noël e à Pasques e à la Seint Michiel e ses plez d'eritage de quinzaine en quinzaine. 12 Emprés il a les bestes gaives en tens de defens, e devent estre gardees au marchie si quau samedi prochain emprés la Seint Johan, e d'iluec en avant se il n'aura garant il deivent estre au rey. 13 Emprés il a toutes forfetures un an e un jor par toute l'isle, e emprés le fie vient es segnors donc il muet. 14 Emprés il a son pasnage sus son fieu quant son manoir est clos. 15 Emprés les prisons nostre segnor le rey doivent estre mis ou chastel por trois cas, c'est à savoir por murtre por larrechin e por rap; 16 et por toz autres cas doivent estre mis en franches prisons, c'est à savoir es Gazeaus e à la Vilete e es Rohays. 17 E nostre segnor le rey prent un de ses hostes à estre son grangier por deservir sa terre; 18 e se il ne fet le servise, le ballif ne doit prendre denier se il ne fait fere le servise por luy. 19 Emprés il a le cors de la mare d'orguil.
20 Ce sont les franchises es genz de Guernerie. 21 Premierement, por .LXX. lib. d'aide que nostre segnor le rey prent por toute l'isle de Guernerie, doivent estre quités d'ost e de chevauchie e de talle, 22 excepté por le cors nostre segnor le rey se il estoit tenus en prison, don Diex le gart, 23 e por ^[1] avoir droit ou païs par le jugement de .XII. jurez sanz issir dou païs, 24 se n'est por doner gage e plege que il aient fet faus jugement. 25 Emprés des peissons, ou tens de secheisons poent les bones genz dou païs venir es pors où les bateaus arivent e achater du peisson, des congres et des autres peissonz à lor mengier, 26 e se les marchaanz lesdis peissons avoient achatez, il en poent prendre por le covenant que il costent e es esperqueries par le covenant que il costent a besoig. 27 E en toz tens le menu peisson doit estre aporté es places qui sunt establies ou païs .III. foiz la semaine e en quaresme toz les jors, 28 et toz peissons sans istre en point dou païs, e ne doivent point achater les regratiers siqu'à tant que la gent dou païs aient achaté. 29 E des chars ne devent point le bouchiers tenir dentiere que il n'en aient de depecie sus les estaus que la gent en puissent avoir. 30 E des blez les boulengiers doivent fere quant le forment est dedens le pris de .II. s. moitié à .II. deniers e moitié à .I. denier, 31 e ou pain ne doivent metre point de leveure; 32 e se il est seu que il li metent e que le pain ne soit dou fuer ^[ii] dou bley, il doit estre doné es meseaus ou es povres, 33 et à ce fere doivent estre veeurs establiz. 34 Emprés es moulins doit avoir .III. mesures, c'est à savoir une du tiers dou boissel e une d'un denerel e une de demie denerel. 35 E doivent estre seelees e la boive gent doivent à ces mesures mesurer lor bley en l'aire dou moulin e iluec rendre lor moutures, e ne doivent les monniers point prendre de fermeage. 36 E les monniers, dou bley que il baillent, doivent prendre le fuer que il vant communaument .XV. jors devant la Seint Jehen ou .XV. aprés, 37 e doit estre le fuer jurez par bones gens et par leaus. 38 Emprés les jurés dou païs doivent mengier oveques les ballif le jor que il tient sa harele e le jor que il voient les chemins e le jors que il fet ses merchis de l'asise; 39 e doivent estre fetes par les jurés, e celes de toz les autres plez; 40 e doivent encore mengier oveques le ballif quant il tient ses .III. chiés plais, e quant il i a forfeture, e quant batalle est gagié, e quant ele fiert; 41 e sont les .XII. jurez quités dou monneage e les homes le roy ne doivent nul garbage sauf le champart le rois.

Notes de transcription
^[1] L'édition indique qu'il faut lire doivent(Soc. Jers., Cartulaire factice..., p. 225).

Notes linguistiques
^[i] « Félicie, veuve de Guillaume de Cheney; ce qui permet d' inférer que ce document doit être du 13^e siècle » (Soc. Jers., Cartulaire Factice..., p. 224).
^[ii] Dans l'édition de la Société Jersiaise (p. 225) il est proposé de traduire fuerpar "prix".