Téléchargement du document

fichier xml fichier pdf

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit414

1283, 9 août

Type de document: Testament

Objet: Testament de Hugue le Brun, comte de la Marche et d'Angoulême, et seigneur de Fougères.

Support: Charte scellée autrefois de neuf sceaux dont trois subsistent.

Lieu de conservation: Archives Nationales, J. 407, pièce 5.

1 En non dou Pere e dou Filz e dou Saint Esperit amen. 2 Nous Hugue li Bruns, cuens de la Marche e d'Engolesme, sires de Fougeres, en nostre bone santé e en nostre bone memoyre, regardanz à la salu \2 de nostre ame, 3 faysons e ordenons nostre testament e nostre derraine volenté en ceste manere: 4 c'est à savoir que premerement nos volons e conmandons que li testament nostre segnor de pere e de nostre \3 dame de mere, don Deus ait les ames, saent acompliz e enterignez sanz delay. 5 Emprés volons e conmandons que nostres dettes saent paés e noz amandes saent entierement e planierement faites 6 qui devant \4 noz exequtors seront provees de plain sanz riote de plait. 7 Derechef nous faisons e establissons nostre heritier en totes noz terres e en toz noz biens nostre chier frere Guy ^[1] de Lezignen, 8 si il avient que nos muirons sanz her descendant de nostre cors de notre fenme. 9 E se il aveneit, la quele chose Deus ne vuille, que le avant dit Guy muire sanz her de son cors de sa fenme, \5 loyal espouse, 10 nous establissons e sozestablissons heritier en l'avant dite nostre terre e en toz noz biens nostre cherime oncle, mon segnor Guy de Lezignen, frere nostre chier pere feu. 11 E se il esteit \6 trové por dreit ou par coustume que il ne peüst estre heritiers en tout l'enterin de nostre terre e de toz noz biens, 12 nos le establissons e le sozestablissons en ceu e en cele partie que nos \7 poons par dreit ou por coustume ou por l'un e por l'autre. 13 Encore volons e ordenons que se il esteit trové que le davant dit Guy, nostre oncle, ne peüst estre nostre her por aucune \8 reson en tout ou en partie, 14 nous le establissons en l'eschayte e en l'esperance de l'eschayte qui nos est à avenir par le decés nostre chier oncle, mon segnor Guy de Lezignen, segnor de \9 Compnac; 15 la quele eschaite nos volons que le devant dit Guy ait por dreit de institucion ou por don de entre vis ou por les que nos li faisons ou en cele manere que plus li porra porter \10 de proffit. 16 E si il avient que nos aeons hers de nostre char de nostre femne espouse, 17 nous volons que li diz nostre frere, Guy de Lezignen, ayt celuy appanement que nostre feu pere li fiist, \11, 18 comment que il le feïst, ou en testament ou en autre ordinacion. 19 E conmandons e volons que se il avient de nos par mort avant que li diz Guy nostre frere vienge en haage à fayre \12 homage par usage de pays, que li diz nostre oncle, frere nostre pere, ayt le bayl de ly e de nostre terre de ci à tant que il seit en aage. 20 E si li diz nostre oncle ne voleit ou ne poet aveir \13 ou prendre le dit bayl, 21 nos volons que il vienge à nostre chier cousin, monsor Morice, segnor de Creon; 22 e se il ne le voleit ou ne poët aveir ou prendre le dit bayl, 23 nous vo\14lons que nostre chiers cousins, le viconte de Thoarz, qui ore est, ayt le dit bayl e le tiegne, si comme est desus dit à de certes, 24 kar mout nos est à cour que nostre terre e nostres he\15ritages demuert e viengne à heyr malle descendant de un de noz oncles e oncle de nostre pere; 25 por ce maemement que li nons de nostre lygnage denurge en du\16rable memoyre, 26 establissons e sozestablissons heritiers ous terres e es biens devant diz, si il avient par mort des devant diz Guy, nostre frere, e Guy, nostre \17 oncle, frere nostre pere, sanz her descendant de l'un de ceus e de lor fenme loyal espouse, nostre chier cousin Geffrey de Lezignen, segnor de Jarnac. 27 Encore volons e \18 conmandons que le ordenement e les lais que nostre chier pere fiist en son testament ou en autre manere de damoisele Marie, nostre sour, 28 seit tenuz \19 e acompliz, e que la dite Marie ayt en l'eritage e en la terre nostre dame de mere cele partie que ele doyt aveir, segont la coustume e le usage dou païs. 29 Derechef volons e conmandons que Beatriz, nostre fenme, ayt son doayre enterignement en nostre terre, segont les usages e les coustumes des païs ou sont \20 noz terres; 30 e exceptez à le retenuz e noz hers les chasteaux qui furent exceptez en la convenance dou mariage de nos e de ly, si ce n'est dou chastel dou \21 Dorac, 31 le quel nos volons que li seit baillé especiaument por reson de son doayre, e les fiez o les rentes e o les essues e les avenues des choses que nos avons en la dite chastelanie dou dit chastel, 32 \22 e o tout ce que nos i aurons en la dite chastelanie por reson dou dit chastel dou Dorac tant solement 33 en tele manere que nos volons que, segont que les dites choses vaudront \23 par assise de rente, par l'usage dou païs, li saent contees en son doayre, 34 sauve la cloyson dou dit chastel tout nu por li ester, que nous ne volons que li seit por rien asis ne \24 contez. 35 E volons e conmandons que le remagnant de ce que l'en li asserra de son doayre li seit asis segont les coustumes des païs ou l'asisse li sera faite. 36 Derechef nous donons \25 e lessons à l'abbaye de Valence, en la quelle nos volons que nostre ossemente seit sevelie, diz livres de rente, ou sis vinz e dis livres une feiz paiés por achater les dites dis livres de \26 rente en noz fiez, por fayre chescun an nostre anniversare en cele abbaye le jor de nostre decés. 37 Emprés nos volons que quelque part nos morons, nostre cour seit aporté e sevely en \27 l'iglise aux Freres Menors d'Engolesme honorablement. 38 Derechef nous prenons cinc mille livres de corant monae sus toz noz biens mobles e non mobles à departir par \28 les mains de noz exequtors desoz nomez; 39 des queles cinc mille livres volons e conmandons estre baillé especiaument e payé cent livres à l'abé e à l'abaye de Savigné por \29 achaster rente à la dite abbaye por nostre anniversayre illec fayre chescun an à tel jor comme sera nostre decés; 40 e de cele somme des devant dites cinc mille livres, volons e \30 conmandons que saent baillees e paiés especiaument cinquante livres au diz Freres Menors d'Engolesme; 41 e aux Freres Menors de Compnac dis livres; 42 e aux Freres Menors de La Rochele dis livres; 43 e \31 aux Freres Precheors de cele ville dis livres; 44 e aux Freres Prescheors de Ponz cent soz; 45 e aux Freres Menors de cel lou cent soz; 46 e aux Freres Menors de Saintes cenz soz; 47 e aux Fre\32res Menors de Saint Johan de Angely cenz soz; 48 e aux Freres Prescheors de cel lou cent soz; 49 e aux Freres Menors de Poyters vint livres; 50 e aux Freres Prescheors de cil lou dis livres; 51 e aux Freres \33 Menors de Renes dis livres e cinquante livres à deviser segont la dispo[s]icion dou menistre de Tourayne por les autres convenz de sa province qui ci ne sont nomez; 52 e les autres remagnanz à departir \34 por le sauvement de nostre ame à yglises à povres religious e autres povres mesaisiez es evesquez de Poiters e d'Engolesme; 53 e par nostre autre terre, segont que meuz semblera à noz \35 exequtors por le salu de nostre ame; 54 e le remagnant à departir à ceus qui nos aront servi e à sexante povres pucelles marier, plus ou mains, segont l'avisement de noz exequtors. 55 Encore \36 lessons à l'iglise Saint Cybart d'Engolesme, c'est saver l'abbaye, trente soz de rente por nostre anniversayre illec fayre chescun an le jor de nostre decés; 56 e à l'abaie de la Corone trente soz de rente por \37 faire nostre anniversare chescun an le jor de nostre decés; 57 encore à l'abbaie de Gronc Box dis soz de rente por celle meyme \38 reson; 58 encore au convent de Botaville dis soz de rente par cele meyme \39 reson; 59 encore à l'abaye de Aun en la Marche dis soz de rente por cele meïme reson; 60 encore [à] [l]'abbaye de Saint Ossanny d'Engolesme .V. soz de rente por cele meyme reson. 61 Derechef les\40sons à monsor Guillaume jJocelin en guerredon dou servise que il ha fait entor nos e les noz, cent livres; 62 e à Helyon de la Broce cinquante livres par cele reson; 63 e à mestre Jaques, \41 phisicien, quarante livres par cele reson. 64 E volon e conmandons que nostre exequtor tegnent, pregnent e lievent toz les fruiz, totes les rentes e totes les essues de noz terres \42 de ci que à tant que cesti nostre testament e nostre derraine volenté saent acomply e enterigné, 65 e que nostre heriter n'aent avant sesine de fait por la quele nostre exequtor aent empesche\43ment à prendre les essuehes de nostre terre. 66 E cestui nostre testament ou derrayne volenté volons valoir comme testament, ou comme codicille, s'il ne poest valor comme testament, ou par dreit ou \44 cele rayson que derraine ordinacion ou derraine volenté puëst ou doit valoir par dreit ou par costume. 67 E fayson exequtors de cestui nostre testament nostre cher oncle, mon\45sor Guy de Lezignen, segnor de Chohec e monsor Morice, saignor de Creon, nostre chier cousin e mestre Pierre Ode d'Engolesme, nostre clerc, e monsor Symon de Baudiment, chevaler. \46 68 E volons que si il aveneit que tuyt quatre ne fussont ensemble par quelque manere, 69 que li duy puissent possievre e encigre cestui nostre present testament ou nostre ordinacion. \47 70 Encore volons e conmandons que totes ces choses devant dites saent faites par les devant diz exequtors toz ensemble ou aucuns de ous, si comme il est devisé, 71 o le \48 conseil dou menistre aux Freres Menors de la province de Torayne requis e eü, ou quant il n'i porra entendre, o le conseil dou gardien d'Engolesme. 72 E prions \49 e requerons nostre chier segnor le rey de France que cestui nostre testament face garder e enterigner; 73 e sus toz, le establissons deffendeors de cest nostre testament. 74 E en \50 tesmoign de verité, nous avons posé à cest testament nostre sael, 75 e le avons fait saeler à nostre requeste des seaux nostre chier oncle, ffrere nostre chier \51 pere devant dit, e dou devant dit menistre de Torayne e dou gardien des Frerres Menors d'Engolesme e de monsor Symon de Baudiment, chevalier, e de monsor \52 Pierre d'Orlley, nostre chevalier, e de mestre Pierre Ode e Lambert, noz clers, e de monsor Raoul, nostre chapelain; 76 les queus nos avons apelé e requis à tesmoignz à cestuy \53 nostre testament. 77 E nos li devan dit Guy de Lezignen e li menistres e li gardiens Symon, e Pierre d'Orlley, Pierre Ode, Lambert e Raoul Cherel, à la requeste dou \54 devant [dit] monsegnor le conte, 78 avon posé noz seaux à cest present testament. 79 Ce fut fait à Tovre le lundi avant la feste de l'Ascenssion, l'an de grace mil \55 dous cenz quatrevinz e trays.

Notes de transcription
^[1] Après Guion lit delezdans le ms .