Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit402

1269, 1^er juin.

Type de document: Charte: reconnaissance de dette

Objet: Gui, fils d'Aimeri, vicomte de Thouars, reconnaît devoir à Alphonse comte de Poitiers deux mille deux cent cinquante livres pour le rachat de la terre de Talmond.

Support: Charte scellée autrefois de cinq sceaux dont quatre restent.

Lieu de conservation: Archives Nationales, J. 190 A, pièce 56.

Édition antérieure: Publiée, Layettes du Trésor des Chartes, t. IV, pp. 355-356 (n° 5532).

1 À touz ceus qui ces presentes letres verront e orront, 2 Guionnet, fuiz Hemeri, jadis viconte de Thouarz, saluz en nostre Segneur. 3 Je faz à ssavoir à touz que je doi à tres noble \2 segneur, mon segneur Aufonz, fuiz de roi de France, conte de Poitiers e de Tholose, 4 dous mille dous cenz cinquante livres de la monnoie courant de poitevins pour \3 la finance que j'ai faite sur le rachet de tel droit comme j'ai en la terre de Thalemont et es apertenances; 5 la quelle somme de deniers je sui tenuz, e proumis e juré sur \4 Sainz Evangilles, à randre e à paier au dit mon segneur le conte ou à son certein conmandement au termes ci dessouz escriz, toutes excepcions e toutes dilacions ostees; 6 ce \5 est à ssaveir: nuef cenz livres de la dite monnoie courant de poitevins dedanz la feste de la Chandeleur qui vient prouchainement, 7 et sis cenz sexante e quinze livres \6 de la dite monnoie dedanz la feste de la Chandeleur prouchainement ensuivant qui sera en l'an Nostre Segneur mil dous cenz sexante e dis, 8 et les autres sis cenz \7 sexante e quinze livres de la devant dite monnoie dedanz l'autre feste de la Chandeleur qui sera en l'an Nostre Segneur mil dous cenz sexante e onze. 9 Et des diz \8 deniers randre e paier enterinement au termes dessus nommez pour moi e à ma requeste envers le dit mon segneur le conte, se sont establi pleges e prin\9cipaus, deteeurs, chascun pour tout: 10 mi sire Challes de Rochefort, mi sire Moryse de la Haie, mi sire Sabranz Chabouz et mi sire Jeuffroi de Chastiau Bryant, che\10valiers. 11 Et nos Challes de Rochefort, Moryse de la Haie, Sabranz Chabouz e Jeuffroi dessus diz, des devanz diz deniers randre e paier aus termes dessus diz, se \11 li diz Guionnet en estoit diffallant en tout ou en partiie, pour lui e à sa requeste envers le dit mon segneur le conte, 12 nos en fesons et etablissons pleges e prin\12cipaus deteeurs e randeeurs par noz seremenz sur ceu ^[1] de nos faiz sur Sainz Evangilles. 13 Et pour toutes ces choses dessus dites tenir e garder e acomplir en\13terinnement, 14 je devant dit Guionnés, comme principaus, e nos devanz diz Challes, Moryse, Sabranz e Jeuffroi, comme principaus deteeurs e randeeurs, \14 15 obligons au dit mon segneur le conte touz noz biens moibles e non moibles presenz e futurs, en quelcumque leu e en quelcumques choses e souz quelcumque \15 segnorie que il soient. 16 Et volons e ostroions e requerons le dit mon segneur le conte e les autres segneurs de qui nos tenons que au devanz diz deniers \16 randre e paier, si comme il est dessus dit, nos contraingnent; 17 et se nos en estions deffallanz en tout ou en partie, que sanz nos semondre e amenester pus\17sent prandre touz noz biens moibles e non moibles, ou que il soient, e les heritages que nos tenons d'aus en fié, sanz eus meffaire; 18 renoncenz en ce fait, je \18 devant dit Guionnet, comme principaus, et nos devanz diz Challes, Moryse, Sabranz e Jeuffroi comme pleges e principaus deteeurs e randeeurs, chascun \19 pour tout, à tout privilege de croisez e à croisier e à toutes excepcions que li pleges ne puisse avant estre convenu, 19 que li principaus et que nos ne \20 puissons dire ou alleguer que chascun ne seit tenuz pour le tout, et à toutes autres deffensses e barres qui nos porroient aidier, e à mon segneur le \21 conte nuire en ceste chose. 20 Et en tesmoing de toutes ces choses, je devant dit Guionnet, et nos Challes, Moryse, Sabranz e Jeuffroi, comme pleges \22 e principaus deteeurs, avons donné à mon segneur le conte devant dit ces letres saeellees de noz propres seaus de nostre volenté e à la requeste \23 de Guionnet devant dit. 21 Ce fu fait à Longpont le samedi aprés la quinzainne de la Penthecouste en l'an nostre Segneur mil dous cenz sexante e nuef ou \24 mois de juing.

Notes de transcription
^[1] cen .