Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit396

1300, 22 octobre.

Type de document: Charte: vente

Objet: Hyolent, femme de Pierre Bouchart, seigneur de Cornellon, avec l'assentiment des siens, vend à Guillaume Larchevêque pour quatre mille livres toutes les possessions qu'elle avait reçues de sa sœur Ayliz de Rochefort, exceptée la terre de Fouras.

Support: Charte autrefois scellée.

Lieu de conservation: Archives Nationales, J. 180 B, pièce 46.

1 À touz ceaus qui ceste presente chartre veiront e oiront, 2 Guillaume Larcevesque, chevalers, seignor de Partenay, de Vouvent e de Taillebort, Piere Bouchart, chevalers, sires de Cornellon, e Hyolent sa feme, dame d'icelui luec, saluz \2 pardurable en Nostre Seignor. 3 À vostre université faisom à ssaveir nous Pieres Bouchart e Hyolent sa femme 4 que, comme çayenarreres Ayliz de Rocheffort, suer de mei Hyolent, eüst doné à mon sire Hugues, jadis seignor de Surgeres, fahu, 5 la \3 tierce partie de touz ses biens ensembleement ob son arbergement de Loayres à aveir durablement à lui e à ses heirs e à ses successors e à ceaus qui cause avreient d'eaus emprés la mort de la dite Ayliz, e tout le dreit que ele poeit aveir en cele tierce partie \4 e ou dit arbergement; 6 le dreit de la quele tierce partie e dau dit arbergement Ayliz, dame de Surgeres, e Guillaume Mengou, fil e heriter dau dit fahu seignor de Surgeres, ont cessé e tresporté en nous. 7 Nous, sus ceu heüe deliberacion e diligent conseil, à ffaire nostre \5 plus grant proffit e acreissement, aillors de communau acort e assentement, icelui dreit ensembleement ob le dreit qui nous peüst avenir ou temps à venir en la succession e eschaeite de la dite Ayliz, suer de mei Hyolent dessus dite, exceptee la terre de Fforras, 8 e \6 ob toutes les garnisons dau chastea de Rocheffort e les dreiz e les actions que nos avions e aveir devions e poyons en mil libres en deners en quei nous esteient tenuz les mencionaires de la terre de Rocheffort e ceaus à qui apartient par abatre la garenne des bestes en certains \7 luecs, 9 avom vendu e livré e otreié e confessom nous aveir vendu e livré e otreié aus diz mon sire Guillaume Larcevesque. 10 Et nous en sommes devestuz e dessaizis desja de tout en tout e l'en avom vestu e saizi e mis e metom em plenere e corporau possession e em \8 pazible e perpetuau saizine 11 en tresportant e metant de noz parsones en sa parsonne tout quanque de dreit, d'action, d'obligacion, de domaine, de possession, de seignorie e de raison e de tytre nous y avions e aveir poyons e devions par quaucunque dreit e par quaucunque cause, 12 e li \9 en avom fait plenere cession e l'en establissom procureor en la chouse à aveir e à tenir e à expleiter e à demander e à lever e à prendre e à receveir à domaine e à durableté à lui e à ses heirs e à ses successors e à ceaus qui cause ont e avront d'eaus 13 e à lor coman\10dement e à ffaire en toute lor volunté delivrement à vie e à mort sanz contredit, 14 por le prez de quatre mile libres de moneie corant garies, quiptes à nos de ventes e d'onors, que il nous en a doné e paié desja enterinement en deners contez; 15 e nos les avom eüz e receüz e \11 nos nos en tenismes e tenom por bien paiez. 16 E est parlé e acordé speciaument entre nous Piere Bouchart e Hyolent sa femme e le dit mon sire Guillaume Larcevesque ou contrait de la dite vente que nous Piere Bouchart e Hyolent sa femme ne noz heirs ne noz \12 successors ne noz biens 17 ne sommes, ne ne serom en ryens tenuz ne obligez au dit mon sire Guillaume Larcevesque ne à ses heirs ne autres por eaus à ffaire nule manere de gariment ne à les garder ne à les deffendre de nule eviction par raison de toutes les choses dessus dites \13 vendues ou d'aucunes d'eles par sei, 18 mes que tant solement des deptes deües de nous ou de l'un de nous e de fahu Aymeri, jadis seignor de Rocheffort, e de touz ses ancestres; 19 e de noz faiz ous quaus deptes ne sereient pas parcontees ne entendues laisses ne aumosnes tem\14poraus, perpetuaus, si n'esteit daus arrerages dau temps passé, ains en sont fors chouses par especiau convenance; 20 les quaus deptes apartenanz au ffait de noz parsones ou dau dit Aymeri ou de ses ancestres, nous e chascun de nous por sei e principaument por le tout \15 21 prometons au dit Guillaume Larcevesque, souz l'obligacion expresse e speciau de touz noz biens e de toutes les noz choses enterinement presenz e futurs, mobles e non mobles, e de chascune chose por sei e por le tout, 22 à garir e à deffendre durablement lui e ses heirs e \16 ses successors e lor biens vers touz e contre touz de touz empechemenz e de touz partorbemenz qui faiz ou mis lor i ssereient par raison des dites deptes e de noz faiz tant solement. 23 Encores prometons nous Piere Bouchart e sa femme, souz la dite obligation, ren\17dre e bailler au dit seignor de Partenay, ou à ceaus qui de lui avront cause, 24 toutes les lettres e instrumenz, quausques il seient, que nous avons e aveir poons qui lor sont ou porreient estre ou proffitables ou necessaires au titre e au dreit e à la deffense \18 des chouses dessus dites 25 en tele manere que il les nous devent e sont tenuz de bailler ou d'aporter en jugement por en user à toutes les faiz que besoing nos sereit. 26 E nous Guillaume Larcevesque dessus nommez faisom à ssaver à toz 27 que nos avom achaté \19 dau dit mon sire Piere Bouchart e de la dite ma dame Hyolent sa femme les dessus dites choses exceptees de la terre de Forras por les dites quatre mile libres e en la manere dessus devisee, e nos nos en tenismes e tenom por bien paiez. 28 E est convenant exprés entre nos \20 e eaus que il ne lor heirs ne lor successors ne ceaus qui cause ont e avront d'eaus ne les lor choses ne sont, ne ne seront tenuz à nos ne à noz heirs ne à noz successors ne à autres por nous 29 à ffaire nul gariment des dites choses que il nous ont vendues ne \21 d'aucunes d'eles por sei, ne à les nous garder ne nule eviction envers nule manere de parsones, 30 mes que tant solement des deptes deües de eaus ou d'aucun d'eaus por sei e de fahu Aymeri, jadis sires de Rocheffort, e de toz ses ancestres 31 ous quaus deptes ne sereient \22 pas parcontees ne entendues laisses ne aumosnes temporaus ne perpetuaus, 32 si n'esteit des perpetuaus les arrerages dau temps passé, ainz en sont fors chouses par especiau convenances 33 e d'enpaistrement e empeschement qui fait ou mis nous i ssereit por \23 raison des obligacions e des faiz dau dit mon sire Piere Bouchart e de sa femme tant solement. 34 E est convenanz, e prometoms e sommes tenuz souz l'obligation de touz noz biens e de toutes les noz choses enterinement presenz e futurs, mobles e non mobles, 35 e de \24 chascune chose por sei e principaument por le tout à ffaire e à acomplir e à enteriner icelui gariment à la dite dame de Surgeres e à ses heirs e à ceaus qui cause ont e avront d'eaus que li diz mon sire Piere Bouchart e sa dite femme e los lor e cil qui cause \25 avront d'eaus 36 lor esteient tenuz de faire par raison d'aucunes compozitions e convenances faites entre eaus par raison de la terre d'Espanes e de Crem e des apartenances. 37 Encores prometons nos e otreions e sommes tenuz, nos Guillaume Larcevesque, 38 de bailler \26 au dit mon sire Piere Bouchart e à sa femme e à lor heirs e à ceaus qui cause avront d'eaus ou de lor aporter ou faire aporter en jugement toutes les davant dites lettres e instrumenz e toutes autres lettres e instrumenz e chascun por sei 39 que nos avom e \27 avrom dau chastea e de la chastelanie e de la terre de Rocheffort por en user toutes les faiz que mester lor sera. 40 E prometom e otreiom e sommes tenuz, nos Guillaume Larcevesque, Piere Bouchart e Hyolent sa femme dessus nommez, les uns de nous \28 aus autres, 41 à rendre e à amander couz, missions e damages, se l'on les y aveit ou sosteneit em plaideant ou en autre manere por deffaute de gariment ou d'enterinance des choses dessus dites ou d'aucunes d'eles por sei, faire e acomplir en la manere dessus \29 dite 42 au sairement de ceaus de nos qui les avreient ou sostendreient ou de l'un de nos por sei ou de nostre comandement ou de celui qui ceste chartre aportera sanz autre prove e sanz ceu que l'on l'en puisset à plus aler. 43 E avom renuncié en iceste vente e en touz icez \30 davant diz convenanz e en chascun por sei e en icest nostre fait en tout e par tout, nous toutes les parties e parsones dessus dites e chascune por sei, 44 à toutes costumes e usages e franchises, e establimenz de viles e de païs e à toute excepcion de non nombree e \31 de non eüe e receüe pecune e à toute excepcion de fait e de decevance e à condicion sanz cause e de non dreiturere cause e à tout bail e benefice d'enterine restitucion apartenant à parsone ou à cause, 45 e à ceu que l'on dit que une chose est dite e convenancee e autre chose \32 est escrite, e à l'espistre de dyvi Adrien e à l'auctantique presente e à la constitucion de dous deptors; 46 e speciaument ge la dite Hyolent à l'ayde dau benefice de velleyen e à touz privileges e beneffices e indulgences de la court de Romme, empetrez e à empetrer, e de \33 croiz donee e à doner e à touz les dreiz escriz e non escriz qui nos porreient aiuer à venir encontre, fust en court d'yglese ou en court laye. 47 E touz les diz e la tenor de ceste chartre avom juré, nos toutes les parsones dessus dites e chascune por sei, sus les Sainz \34 Evangiles Nostre Seignor touché corporaument, 48 à tenir e à garder bien e leyaument sanz ja mais venir encontre por nos ne por autres por nule manere qui seit ou puisset estre. 49 E en garentie e en fermeté durable e creable de toutes les choses dessus \35 dites e de chascune por sei, nous Guillaume Larcevesque, Pieres Bouchart e Hyolent, sa femme, dessus nommez, 50 en avom fait entre nous ceste presente chartre, la quau Johan Gaucher, tenanz adonques en la Rochele le sayau de la seneschaucie de \36 Xainctonge por nostre seignor le rey de France 51 en cui juridiction nos sozmetom nos e toz noz biens, quant à ceu, sanz autre seignorie avoher 52 sayela à nos requestes dau dit sayau. 53 E nos Johan Gaucher dessus nommez, à la requeste des davant diz nobles \37 hommes, mon sire Guillaume Larcevesque e mon sire Piere Bouchart chevalers, e de la dite Yolent sa femmme, 54 avom apposé à ceste chartre le dit sayau, sauve la dreiture nostre seignor le rey e l'autrui. 55 à ceu oïr e otreier, furent presenz, requis por garenties, \38 mon sire Chales de Rocheffort, mon sire Robert Guichart, chevalers, e maistre Guillaume Thomas. 56 E nos Piere Bouchart e Hyolent sa femme dessus nommez y avom apposé les noz propres sayaus en maire garentie de verité. 57 Ceu fut fait le semady emprés \39 la saint Luc l'an de l'incarnacion Jhesu Crist .M. e treis cenz.