Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit353

1275, août.

Type de document: Charte: donation

Objet: Pierre Penecher du Payaud et Jeanne sa femme se donnent avec tous leurs biens à l'abbaye de Fontevrault et au prieuré de Sainte-Catherine de La Rochelle.

Support: Charte scellée.

Lieu de conservation: Archives Départementales de Maine-et-Loire, 271. H. 1. - Abbaye de Fontevraud: Sainte-Catherine de La Rochelle.

1 Ge Pere Panchener dau Poyau e ge Johanne, sa femme, 2 foisom à ssaveir à touz ceaus qui ceste presente chartre veiront e oiront 3 que nos, por la grant \2 devotion e la grant reverance e por la grant fiance e la grant fei que nos avom, 4 lonc temps a, eu e avom encores ous granz biens faiz e ous oraisons, \3 ous messes, ous matines, ous geunes, ous deciplines e ous astinances e ous granz autres biens faiz e à faire, tant en l'abbaye e ous membres \4 de Fontevraut; 5 e nomeement e spetiaument por ceu que nos ensemble, e chascuns de nos par sei, fussom receü e acoilli comme frere e \5 doné e parçoniers ous davant diz biens faiz e ous autres biens, tant spirituax quant temporaus, à vie e à mort, 6 nos, par comunau assen\6timent e par comunau volunté, de noz bons grez e de noz bones e pleines voluntez, senz tote force e senz tote destrece e senz monici\7on ne coaction nule qui à ceu faire nos aient esté faites de nului, 7 avom doné e ottreié e encores donom e ottreeom vrae donation faite \8 entre vives genz par manere de perpetuau e de non revocable don 8 à Dieu e à nostre Dame sainte Marie e à l'abbaesse e aus nonains e aus \9 suers e aus freres de la dite abbaye de Fontevraut, e au prioré e aus prior de Sainte Katherine de La Rochele, 9 nos à freres e à \10 renduz daus dessus diz leucs, e totes les noz choses ensembleement ob nos, quauque part e en quauque leuc e en quauque seignorie que nos les \11 eüssom, e quauques eles fussent, e par quauque nom que eles seient nomees e appelees, tant mobles quant non mobles. 10 Daus quaus totes davant \12 dites choses e de chascune por sei, nos nos sommes devestu e dessaisi, de tot en tot desja, e en avom vestu e saisi la davant dite abbaesse e le co\13vent de Fontevraut e le dit prior de Sainte Katherine; 11 e les en avom mis en plenere e en corporau possession e en paisible e perpetuau saisi\14ne, à tenir e à aveir e à espleiter à eaus e à lor successors e à lor comandement, 12 e à faire en tote lor plaine volunté quitement, \15 franchement e delivrement, durablement senz contredit e senz delayement e senz possession e senz saisine ne proprieté ne dreiture ne raison \16 ne action ne seignorie ne demande ne requeste ne reclamation nule 13 que nos, ne autres por nos ne por raison ne por ochison de nos, \17 y puissom aveir ne demander ne requerre ne avoher ne reclamer ne faire ne moveir por nos ne por autres, jamais en nul temps, por \18 nule manere; 14 car tot seit il issi que à eaus place que nos teignein e espleiteim les davant dites choses ou aucunes d'eles, 15 nos ne les tenom \19 ne n'espleitom por dreiture ne por raison ne por proprieté ne saisine ne dreiture nule que nos y aiom, mais que tant solement comme lor coman\20demenz; 16 aynz nos en puënt e porreent oster e remuër en autre leuc, là ont à eaus pleireit, comme lor donez e lor obedienz à totes \21 hores e à toz termes que à eaus pleireit. 17 E en totes icez davant dites choses e ottreiz e en chascune por sei, avom renuntié e renunti\22om, ge Pere Panchener e ge Johanne sa femme dessu nommé, 18 à tote fraude e à tote boidie e à tote exception de fait e de decevance e à \23 tote enterine restitucion à totes costumes e à touz usaiges e à totes franchises e à touz establimenz de viles e de pays. 19 E ge Johanne dessus \24 dite, acertannee diligentement dau benefice de velleyain, ay renuntié spetiaument à icelui benefice, à tot dreit escrit e non escrit e à tote for\25ce e à tote adïue de leys e de canon e à totes autres choses enterinement qui, de fait ou de dreit, nos porreent adiüer à venir encontre les \26 diz e la tenor de ceste chartre, fust en cort d'egliese ou en cort laye. 20 E tout ceu avom juré au Saint Evangele Nostre Seignor, toché corporaument \27 de noz propres mains, 21 à tenir e à garder bien e leaument senz venir encontre, par nos ne par autre, jamais en nul temps, par nule manere. \28 22 E en garentie de ceste chose, nos en avom doné à la dite abbaesse e au dit convent de Fontevraut e au dit prior de Saincte Katherine \29 e à lor successors ceste presente chartre, la quau sire Poynz de Mauretaigne, dayeins adonques de Xainctes par la grace de Dieu, saiela, à noz re\30questes, de son seau. 23 E nos Poyns de Mauretaygne, dayeins de Xainctes dessus nommé, y avom apposé le nostre dit seau, à la requeste dau davant \31 dit Pere Penchener e de sa dite femme, en maire garentie de ceste chose. 24 Ceu fut fait l'an de l'incarnation Jhesu Crist .M.CC. e seissante e quinze \32 ou meis d'aost.