Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit348

1272, mars ou 1273, mars.

Type de document: Charte: donation

Objet: Pierre de Notre-Dame de Celle, clerc, fils de feu Richart de Gorges et de feu Agaice, sa femme, se donne avec tous ses biens à l'abbaye de Fontevrault.

Support: Charte autrefois scellée.

Lieu de conservation: Archives Départementales de Maine-et-Loire, 217. H. 1. - Abbaye de Fontevraud: Sainte-Catherine de La Rochelle.

1 Ge Pere de Nostre Dame de Cele, clerc, filz fahu Richart de Gorges e fil de fahue Agayce, jadis sa femme, 2 ffois à ssaveir à toz ceaus qui ceste presente chartre verront e orront, 3 que \2 ge estanz en ferme e sayne conscience e en mon bon memoyre, comme ge soye d'eage e temporaus e fors de tout bail e de tote tutele e en mon bon e lige poër e sires e governeres de mei \3 e de mes biens, non amonesté, non contraint, non circunvenu e non deceü, coveitanz à faire la salu de m'ame, 4 ay doné e otreié e encores donc e otrei à Deu e à l'abaye Nostre Dame Sain\4te Marie de l'ordre de Fonteuraud 5 mei tout premerement, e en aprés speciaument, generaument e expressement totes les meies chouses enterinement, quauscumques eles seient ne poënt estre, celes \5 que ge ay e que ge aurai mobles e non mobles, 6 nomeement vint livres de cens que ge aveie chascun an en la vile de La Rochele dunt les dis livres sunt assises sus une \6 maison de pere, e sus ses apertenances, qui est en la rue aus Chauderers e fut çaienarrere fahu Piere de Monboer; 7 la quau maisson se tient d'une part à la maison qui fut fau \7 Pere de Wuerce, e d'autre part à la maison Bertran de Navarre; 8 e sunt en enforcement de rendre icestes dis livres de cens totes les chouses qui furent au dit Pere de Mont\8boer. 9 E daus autres dis livres de cens, sunt assises les sept livres sus les maisons qui furent Deusaye le Juef e sus totes lor apartenances qui sont en la dite rue aus Chau\9derers entre la maison sire Bartholomé Costet e le celer de pere qui muet de l'Aumosnerie Nove de La Rochele; 10 e les seissante solz de cens sont assis sus une autre \10 maison, e sus les apartenances, qui est autresi en la dite rue aus Chauderers; 11 la quau maison fut çayenarreres fahu Johan Talebot, e se tient d'une part à la maison aus en\11fanz Helyes dau Broil, e d'autre part se tient à la maison qui fut çayenarreres fahu Gilebert Vender. 12 Daus quaus davant dites vint livres de cens einssi assises, \12 com desus est dit, e de tote la raison e de tote la dreiture que ge Pere de Nostre Dame de Cele desus nommez i aveie, e que ge aveir i poeie ne deveie, 13 ge me \13 sui desvestuz e dessaizit, e en ay vestu e saizi ma dame Johanne de Breme, adonques abbaesse per la grace de Deu de l'abaye de Fontevraud, e le convent \14 de cele meësme abbaye, 14 e mis en plenere e en corporau possession e en paisible e perpetuau saizine à tenir e à prendre e à aveir e à esploiter à domaine e à \15 durableté à eos e à lor successors e à lor commandement, 15 per les quatre quarterons de l'an, cent solz à chascun quarteron, de la moneie qui sera prise censau par la vi\16le de La Rochele, 16 e à faire en tote lor volunté delivrement sanz contredit e sanz reclamacion ne dreiture nule que ge ne mi heir ne autres por mei i puissom ja\17mais faire ne aveir ne demander par riens qui seit. 17 E si tout ge estoie veüz preneres ou receveres daus dites vint livres de cens, de totes ou de partie d'eles, 18 ge \18 n'i ai riens à domaine ne riens n'i puis demander, fors que à mon viage, quar ge n'i sui, fors quant fruiters, 19 e ou nom de ma dame l'abbaesse de Fontevraud e dau \19 convent; 20 e por eaus en sui ge espleiters comme lor commandemenz e lor donez que ge sui. 21 E ne puis, ne ne dei faire don ne obligacion ne covenance à tens ne à du\20rableté daus davant dites vint livres de cens de totes ne de partie d'eles; 22 e si ge le feseie por aucune volunté qui me venist, riens ne vaudreit, quar en ceste manere e por tau \21 convenent lor ai ge fait e fois le davant dit don daus davant dites vint livres de cens. 23 E ai renoncié en icest davant dit don e en icez davant diz convenanz e \22 en icest mien fait, 24 ge Pere de Nostre Dame de Cele, desus nommez, e renonci encores expresseement à tote force e à tote aiüe de leis e de canon e à toz privileges e benefices \23 empetrez e à empetrer e à totes costumes e usages e franchises de viles e de païs e à totes veilles e noveles institucions e constitucions faites ou à faire e à to\24te excepcion de fait e de dreit e de decevance e à tout dreit escript e non escript 25 e à la copie de ceste chartre e à tout libeau demander en escript contre icest mien fait \25 e à tote fraude e à tote boidie e nonmeement à tout benefice de menor eage e à condicion sanz cause e à totes autres chouses speciaument, generaument e expres\26seement qui de fait ou de dreit me porreient aiuër à venir encontre, fust en cort d'yglise ou en cort laye. 26 E ai juré sus Saint Euvangile Nostre Seignor touché \27 corporaument, de mon bon gré e de ma bone volenté, à tenir e à garder fermement toz les davant diz convenanz e les diz e la tenor de ceste chartre e \28 chascum por sei bien e leiaument, 27 e que encontre ne vendrai ne autres por mei, ne n'assaierai à venir encontre en dit ne en fait ne en negune autre ma\29nere. 28 E en garentie e fermeté durable de ceste chouse, ge Perre de Nostre Dame de Cele, dessus nommez, en ai doné à ma dame l'abbaasse de Fontevraut e au con\30vent de celui meïsmes luec ceste presente chartre; 29 la quau maistre Pierre Sorin, adonques arcidiacres d'Aunis, par davant cui totes les davant dites convenances \31 e chascune por sei furent reconeües e ajugees en dreit, saiela e conferma, à ma requeste, de son seiau en mayre garentie de verité. 30 Ceu fut fait l'an de \32 l'incarnacion Jhesu Crist .M.CC. seissante e doze ou meis de marz.