Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit337

1269, juillet.

Type de document: Charte: renonciation

Objet: Arembort, femme de Geoffroi Borreau de Nieuil et fille de feu Guillaume du Payaud, renonce aux réclamations qu'elle faisait contre Pierre Penchener, bourgeois de La Rochelle, exécuteur testamentaire de son père, au sujet des biens laissés par celui-ci et lui verse soixante sous pour le règlement des dettes et des dépenses de la succession.

Support: Charte partie par AB, faits deux fois.

Lieu de conservation: Archives Départementales de Maine-et-Loire, 217. H. 1. — Abbaye de Fontevraud: Sainte-Catherine de La Rochelle.

1 Ge Pere Penchener, borgeis de la Rochele, aumosner e exequtor dau testament fahu Guillaume dau Poyau, 2 fois à ssaveir à toz ceaus qui ceste presente chartre verront e orront 3 que, cum contenz fust entre mei d'une \2 part, e Arembort, fille dau davant dit fahu Guillaume dau Poyau, femme Joffrei Borreau de Nioil, d'autre part 4 sus ceu que ele me damandot que ge li rendisse conte e raison daus prises e daus receptes e daus levees que \3 ge aveie pris e receü e levé de sa partie qui li esteit eschaete e avenue daus biens e daus choses qui furent à son davant dit pere; 5 e ge demandasse, d'autre partie, à la dite Arembort granz deners que li diz \4 Guillaumes dau Poyau, sis peres, me deveit, 6 e que ge aveie assez plus paié por le dit fahu Guillaume dau Poyau, son pere, que n'aveient monté les receptes que ge aveie fait de ses davant diz biens, dont la partie \5 qui affereit à paier à la dite Arembort daus deners dessus diz monteit bien cent livres e plus; 7 les quaus ge li demandoe que ele me rendist e paiast; 8 à la parfin, en aprés mainz contenz sus iceu entre nos \6 longement demenez, por le conseil de prodes hommes e daus amis de l'une partie e de l'autre, 9 venismes entre mei e la dite Arembort à fin e à paiz dau dessus dit contenz 10 en tau manere que la dite Arembort, e li \7 diz Joffreiz Borreaus, sis sires, por raison de lie, m'ont rendu e paié seissante livres de la monee corant en deners contez por la partie qui affereit à paier à la dite Arembort daus deners que sis davant diz peres me \8 deveit, e daus deners que ge aveie plus mis e paié por lui que ne montot la recepte que ge aveie fait daus soes choses; 11 les quaus seissante livres dessus dites ge ogui e recegui, e m'en tengui e tienc por bien \9 paiez. 12 E ai renuncié à tote excepcion de non nombree e de non receüe peccune. 13 E por ceu, ge Pere Penchener dessus nommez ai quité e claim quite, por mei e por mes heirs e por toz les miens à toz jorz mais e \10 à perpetuauté, la davant dite Aremborc e ses heirs e totes les lor choses, 14 e nommeement toz les biens e totes les choses qui sunt eschaetes em partie à la dite Aremborc de part son davant dit pere de totes de\11mandes, de totes requestes, de totes quereles e de totes actions que ge ou mi heir ou autres por nos lor puissom faire 15 ne demander ne aveir ne moveir envers eaus ne envers les lor davant dites choses ja \12 mais en nul tens por raison de deptes que li diz Guillaumes dau Poyau me deguist onques, 16 ne por raison de quaucumque depte que ge eüsse paié por lui, ne por raison de l'exequcion de son testament, ne en negune autre \13 manere por raison dau davant dit fahu Guillaume dau Poyau. 17 E si tant esteit chose que Giraut d'Andela, ou autres por raison de lui, se traissist avant en aucun tens e feïst demande ou requeste ou dreçast action \14 ou querele à la davant dite Aremborc ou à ses heirs ou aus lor choses por raison de deptes que li diz Guillaumes dau Poyau deguist au dit Giraut d'Andela, 18 ge Pere Penchener dessus nommez e totes les meies choses, \15 celes que ge ai e que ge ^[1] avrai, mobles e non mobles, sommes tenu à la dite Aremborc e aus sons de faire taisanz sanz delay le dit Giraut d'Andela e toz ceaus qui, por raison de lui, riens lor en demandereent, e \16 de garir e de garder en eaus e totes les lor choses de toz maus e de toz damages; 19 daus quaus damages, se il les i aveient, il ou li uns d'eaus por sei ou lor comandement sereient creü por lor sairement sanz \17 autre prove. 20 Veritez est que ge ne fois nule quitance aus autres heirs dau davant dit fahu Guillaume dau Poyau, ne mes que à la dite Aremborc e à ses heirs descendant de sa charn e aus lor choses e aus \18 choses qui sunt eschaetes em partie à la dite Aremborc de part son davant dit pere, si cum dessus est dit tant solement. 21 E ge Aremborc dessus nommee fois à ssaveir à toz que ge, de mon plain gré e de ma propre \19 volunté, ob l'otrei e ob l'assentement dau davant dit Joffrei Borreau, mon seignor, 22 ai autressi quité e claim quite, por mei e por mes heirs e por toz les miens à toz jorz mais e à perpetuauté, le davant dit Pere \20 Penchener e ses heirs e totes les lor choses, celes que il ont e que il avront, tant mobles quant non mobles, 23 de totes demandes, de totes requestes, de totes quereles e de totes actions que ge ou mi heir ou au\21tres por nos lor puissom faire ne demander ne aveir ne moveir envers eaus ne envers les lor davant dites choses, ja mais en nul tens, 24 por raison de prises ne de receptes ne de levees que li diz Peres Penchener \22 ou autres por lui aient eü ou pris ou receü ou levé daus choses qui furent au davant dit Guillaume dau Poyau, ne en negune autre manere por raison dau davant dit fahu Guillaume dau Poyau. 25 E ge Joffrei \23 Borreaus dessus nommez, sires, espous de la davant dite Aremborc, fois à ssaveir à toz que la davant dite Aremborc ma femme a fait la davant dite quitance ob mon otrei e ob mon assentement; 26 e ge m'en ten\24gui e tienc por bien paiez, sanz ceu que ge ou autres por mei puissom venir encontre ja mais en nul tens por negune manere. 27 E avom renuncié, en icestes davant dites quitances e en icest nostre fait, en tot e por tot, \25 ge Pere Penchener e ge Aremborc e ge Joffrei Borreau, sis sires dessus nommé, 28 à tote force e à tote aiüe de leis e de canon e à toz privileges e à totes costumes e à totes noveles institucions e à toz privileges \26 de femes e à tot benefice de croiz donee e à doner e à tot dreit escrit e non escrit e à tote fraude e à tote boydie e à tote decevance 29 e à totes autres choses enterinement qui, de fait ou de dreit, ou por raison \27 de chose ou de persone, nos porreient aiuer à venir encontre, fust en cort d'iglise ou en cort laye. 30 E avom juré sus le Saint Evangele Nostre Seignor touché corporaument, de noz propres voluntez, à tenir e à gar\28der les davant dites quitances e toz les diz e la tenor de ceste chartre ferms e estables durablement, e que ja mais encontre ne vendrom ne autres por nos en nule manere. 31 E en garentie de ceste \29 chose, mis sire Pere Viger, adonques arcedeacres d'Aunis, saiela e conferma, à la requeste de l'une partie e de l'autre, ceste presente chartre de son saiau. 32 Ceu fut fait l'an de l'incarnacion Jhesu Crist \30 .M.CC. e seissante e nuef ou meis de juingnet.

Notes de transcription
^[1] equegeécrit deux fois .