Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit307

1276, octobre.

Type de document: Charte: accord

Objet: Accord entre Geoffroy, seigneur de Montbason et de Montsoreau, et l'abbaye de Fontevrault, au sujet des justices de Fontevrault et du fief de dame Marie de Maillé.

Disposant: Vidimus et confirmation de l'acte précédent, N° 306.

Support: Charte autrefois scellée.

Lieu de conservation: Archives Départementales de Maine-et-Loire, 189. H. 4.

1 À toz ceos qui verront cestes presentes letres, Aeliz de Fretevaus, dame de Montsoreau, saluz en Nostre Seignor. Sachent tuit que nos \2 avons veü unes letres saelees au seau à noble home Jofroy, seignor de Montbason e de Montsoreau, chevaler, en cez mouz: 2 À toz ceos qui verront e orront cestes presentes letres, 3 Joffroy, seignor de Montbason e de Montsoreau, chevaler, saluz en Nostre Seignor. 4 Come contenz fust entre nos d'une partie, e religioses dames l'abaesse e le convent de Ffonteuraut de l'autre, 5 des joutisees de Fontevraut e dou fié ma dame Marie de Mayllé e d'un four, d'une vigne, d'un omeau e d'un larron que la dite abbaesse e le convent avoient laissé aler, si come nos disions; 6 en la bone fin des diz contenz, ou le conseil de bone gent, a esté acordé entre nos e les dites religiouses e pacefié en ceste meinere: 7 ceu est à savoir que le comandement à la dite abbaesse e au covent prendra les maufaitors au diz leus e les tendra juques à tant que il seent convencu ou delivré par droit, 8 e de la conoissance les jugera que il devront perdre, e puis fera savoir à nos ou à nostre comandement à Montsoreau que nos ou nostre comandement les avion querre à la grant porte de Ffonteuraut. 9 E si li maufaitors sont des homes la dite abbaesse e au couent, la dite abbaesse e le covent auront tote l'amende e tot l'emolument. 10 E se li maufaitors sont estranges, nos aurons tote l'amende e tot l'emolument. 11 E se il avenoet que aucun de ceos maufaitors eüst mort deservie, le comandement la dite abbaesse e au covent le jugeroet, e nos ou nostre comandement metrions le jugement à execucion. 12 E si nos ou nostre comandement le changions, la dite abbaesse e le covent ne nos en porreent segre. 13 E cil qui auront fait mendre meffait don il n'auront pas mort deservie ou se il aveent mort deservie par cas qui soit de vairie, 14 le comandement à la dite abbaesse e au covent les juigera de la penitence que il en deivent porter, e nos ou nostre comandement metron le juigement à execucion, e ne le porrons changer sanz l'assentement à la dite abbaesse e au covent. 15 E n'est pas tenue la dite abbaesse e le covent bailler ne rendre les maufaitors, ne mes dou fié ma dame Marie de Maillé e de Ffonteuraut e de ceu qui meut de la chatelerie de Montsoreau. 16 E quant lo gaige de la bataille sera jugé en la cort de la dite abbaesse e au covent, la dite abbaesse le baudra à nos ou à nostre comandement à espleter, si come oul est contenu en une letre comune à la dite abbaesse e au covent e à nos. 17 E ne remaindra pas por cest acort desus dit que la dite letre comune à la dite abbaesse e au covent e à nos ne remainge en sa vertu aus austres arthicles des queles n'est pas faite mencion en ceste letre. 18 E remaint la dite abbaesse e le covent quites des demandes que nos faisions dou dit four, de la vigne, de l'omeau e dou larron que la dite abbaesse e le covent avoient lessé aler, si come nos disions. 19 E ne porrons demander à la dite abbaesse e au covent nul domaiges, ne eles à nos, por raison de ceste chose. 20 E en tesmoig de totes les choses desus dites nos saelames cetes presentes letres de nostre seau. Ceu fut fait en l'an de grace mil soixante e seze eu mois de septembre. 21 E nos la paez \3 e la conposicion desus dite approvons e loons e confermons, e prometons en bone foi, en tant come il en apartient à \4 nos, por raison de nostre doaire ou por austre raison, à la tenir e garder leaument e fermement. En tesmoig de \5 la quau chose, nos avons saelé cestes presentes letres de nostre seau. Ceu fut fait en l'an de grace mil .CC. seixante \6 e seze au mois de octobre.