Téléchargement du document

Documents linguistiques galloromans
Corpus : (chPoit)
Responsable du corpus : -
Édition de la charte : -

chPoit250

1276, 1^er juin.

Type de document: Charte: diminution

Objet: Barthélemy, seigneur de la Haye et de Passavant, diminue de cent sous la rente annuelle de dix livres due par Rogier, abbé de Saint-Florent-lès-Saumur pour le prieuré de Montilliers en raison d'un prêt que lui avait consenti l'abbé.

Support: Charte autrefois scellée.

Lieu de conservation: Archives Départementales de Maine-et-Loire, H, 3542. — Abbaye de Saint-Florent de Saumur.

1 À toz ceus qui ces presentes letres veront et oront, 2 Barthellemé, seigneur de la Haye et de Passavant, chevalier, saluz en Nostre Seigneur. 3 Sachent toz que comme nos aveom \2 dez livres de rente toz les ans à Monteglis payés par la main au prieus du dit lou et toz en aveom quité les cent soz de rente toz les ans par rezon de prest que l'abbé Rogier feu \3 noz avoiet fet en deners nombrés; 4 les ques deners noz avon bien por enterin rendus et payés et plenement, et nos veïsmes et considerasmes que le davant dit abbé ne le poiet \4 fere par dreit ne par rezon ne sans pechié en la maniere desus dite; 5 por que noz demandiom au prieuz de Monteglis les dites dez livres de rente toz les ans à avoier et à prendre \5 en la maniere que noz feziom avant que le davant dit abbé Rogier, adonc abbé de Saient Florens jouste Saumur, nos fezist le prest des deners, por le quel prest \6 nos li quition los cent soz de rente. 6 Et nos pensant et entendant en fere le porfite et le preu de nostre ame por Dé et en aumosne purement, vozisimes tenir le don desus \7 dit des cent soz de rente toz les ans 7 et les donons por Dé et en aumosne et por aveir los preieieres de la mezon et estre en es biens de la mezon, et por fere nostre service emprés \8 nostre mort en l'eglise de mon segneur Sainct Illaier de Monteglis, et volom et otroieom bonnement et por le salut de nostre ame. 8 Et que los diz cent soz de rente toz les \9 ans remaiegnent au prieus de Monteglis et à mon seigneur Sainct Illere du dit leu por fere nostre service, 9 derecief nos quitom por Dé en aumosne por nos et por nos hers \10 au prieuz du dit leu totes les tallies qi nos poieent escheoier ne à nos ne à nos hers, ne venir en quele maniere que ce seiet, 10 exepte les tallies qi nos poieent avenir \11 de nos seigneurs susheraiens dunt nos ne les quitom pas, et exepte les cent soz de rente que noz y avom et prendom toz les ans par la main e du dit prieus que nos ne quitom pas. \12 11 Derecief nos donom et quitom per Dé et en aumosne au prious du dit leu et à la meson toz les piviens et les foullies que noz y aviom sus la dite mezon 12 et volom que totes les choses \13 desuz dites, en tot et en partie, remeignent au prieus du dit leu et à le eglize mon seigneur Sainct Illaiere de Monteglis et à la mezon en la maniere desus dite, et en feront \14 enprés nostre mort nostre service toz les ans. 13 Ce fut donné à Passavant l'an de l'incarnacion nostre Seigneur mil douz cens et sexante et seze le \15 lundi emprés les octabes de Pentecouste.